Pagkamaisogon
Karon mao ang programa sa Primary, ug si Brayden gikulbaan. Gibalik-balik niya og praktis ang iyang bahin. Apan nahadlok siya nga mamulong atubangan sa daghan kaayong mga tawo.
“Dili ko gusto nga moadto sa simbahan karon!” Miingon si Brayden. “Makahahadlok kaayo nga mosulti sa akong bahin.”
Gigakos siya pag-ayo ni Mama. “Nasayod ko nga makahahadlok ang pag-istorya diha sa simbahan. Apan nagpraktis na ka og maayo. Nasayod ko makahimo ka niini.”
“Pwede ba nga mag-ampo ta?” Nangutana si Papa. “Makahangyo kita sa Langitnong Amahan sa pagtabang kanimo nga magmaisogon.”
Mitando si Brayden.
Sila si Mama, Papa, ug Brayden miluhod ug mikiyugpos sa ilang mga bukton.
“Minahal nga Langitnong Amahan,” nag-ampo si Mama, “palihog tabangi si Brayden nga magmaisogon. Tabangi siya nga makasulti sa iyang bahin.”
Human sa pag-ampo, misakay si Brayden sa sakyanan, ug silang tanan mipadulong sa simbahan.
Gikulbaan si Brayden dihang milingkod siya sa atubangan kauban ang ubang mga bata. Pero nahinumdoman niya ang pag-ampo. Kini nakatabang niya nga moarang-arang ang pamati.
Sa wala madugay panahon na ni Brayden nga mamulong. Mitan-aw siya sa mga tawo nga nagpahiyom kaniya. Naa didto sila si Mama ug Papa! Miginhawa siya og lawom. Dayon misulti sa iyang bahin nga kusog ug klaro. Iya ganing nahinumdoman ang tanang pulong.
“Maayo kaayo ang imong gibuhat,” miingon si Mama human sa simba. “Morag gitubag ang atong pag-ampo.”
Mipahiyom si Brayden. “Ang Langitnong Amahan mitabang kanako!”
Nag-uban sila sa paglakaw balik sa sakyanan. “Unsay imong gibati sa kahiladman?” Nangutana si Papa.
“Nahadlok gihapon ko, apan OK na,” miingon si Brayden. “Ug maayo akong gibati human nako masulti ang akong bahin.”
“Nasayod ka ba unsa kanang maayong pagbati?” nangutana si Mama.
Naghunahuna si Brayden sa makadiyot. “Tingali ang Espiritu Santo kadto.”
“Tingali usab,” miingon si Mama. “Ug bisan nahadlok ka, ang Espiritu Santo mitabang nimo nga magmaisogon.”
Mga paghulagway pinaagi ni Adam Howling