Video Game nga Stoplight
Unsay buhaton ni Nathan aron makaabot sa berde?
Gipindot sa mga tudlo ni Nathan ang mga button sa controller. Hapit na siya makalatas niini nga lebel! Mitutok siya sa TV samtang ang iyang rocket ship milikay sa mobuto nga berde.
“Nathan, oras na sa panihapon!” Tawag ni Mama.
Bang! Ang ship ni Nathan naigo. Mipiyait si Nathan. Karon magsugod na usab siya. Pero kahibalo siya nga makalampos siya niini nga lebel kon mosulay siya og usa pa ka higayon.
Misulod si Papa sa lawak. “Nakadungog ka sa imong Mama? Tingkaon na.”
Nanghupaw si Nathan ug mihunong sa dula. Siya ug si Papa milingkod uban ang tibuok pamilya. Gipaspasan ni Nathan og kaon ang iyang pagkaon kutob sa iyang mahimo. Gusto niyang makabalik dayon sa iyang dula.
“Salamat! Kana lami kaayo.” Mibarog dayon siya gikan sa lamesa.
“Kadyot lang, dong,” miingon si Papa. “Si Mama ug ako gustong makig-istorya nimo.”
Uh-oh. Si Nathan may problema?
Dihang nahuman na ang tanan, si Mama ug Papa nagpabilin diha sa lamesa uban ni Nathan.
“Nakamatikod mi nga migahin ka og dakong panahon sa pagdula og mga video game,” miingon si Papa.
Mihiko-hiko si Nathan. “Makalingaw man gud.”
“Tinuod kana,” miingon si Mama. “Apan ang ubang butang makalingaw usab. Gipangita ka namo gahapon dihang nagdula mi isip pamilya. Kanunay ming malingaw kon kauban ka namo!”
Si Nathan nagtrabaho sa pinakahinam nga lebel sa bonus kagabii. Sa higayon nga iya kining mahuman, ang iyang pamilya nahuman na sa pagdula. Siya medyo naguol nga wala siya kaapil nila.
Nagmug-ot si Nathan. “Nagpasabot ba kini nga dili na ko makadula og mga video game?”
“Wala mi magsulti niana,” miingon si Papa. “Gusto lang namo nga magmatngon ka kon pila ka oras ang imong igahin niini. Ug sa pagsiguro nga kini wala magpalayo nimo sa ubang importanteng mga butang, sama sa mga buluhaton ug homework ug pagtuon sa kasulatan.”
Miduko si Nathan. “Tingali nabalewala nako ang ubang butang aron lang makadula og mga video game.”
“Sigurado mi nga makahimo ka og mas maayo nga pagbalanse,” miingon si Papa.
“Makatabang ba mo nako?” Nangutana si Nathan.
Mipahiyom si Mama. “Siyempre.”
Magkauban, sila si Nathan, Mama, ug Papa sa paghukom kon pila ka oras si Nathan magdula og video game matag adlaw. Dayon nakahimo sila og plano. Mobutang sila og poster sa usa ka stoplight tupad sa TV. Kon si Nathan makahunong sa pagdula dihang tawagon siya ni Mama ug Papa, ang stoplight mahimong dalag. Kon sila mohangyo kaniya sobra pa sa kausa, mahimo kining pula. Ug kon mohunong siya sa iyang kaugalingon sa dili pa sila manawag, mahimo kining berde.
Matag gabii sa dili pa matulog, istoryahan nila kon unsay nabuhat ni Nathan nianang adlawa. Kon ang stoplight pula, aduna lang siyay dyutay nga oras sa pagdula sa sunod adlaw. Apan kon magpabilin kining berde, si Mama ug Papa modala kaniya ngadto sa space museum!
Nasayod si Nathan nga lisod kaayo pag-usab sa iyang naandan nga gibuhat. Apan andam siya sa maong hagit.
Sa unang pipila ka adlaw, ang stoplight nagpabiling dalag. Dayon si Nathan mas nagkadugay, ug kinahanglang mahimo kining pula. Gusto niyang maningkamot og maayo sunod higayon. Busa pagkasunod adlaw, nag-andam siya og alarm aron masayod siya unsa na kadugay siya nga nagdula. Sa kataposan, nakahimo siya niini ngadto sa berde!
Human sa pipila ka adlaw nga berde, si Mama ug Papa midala kaniya ngadto sa space museum. Si Nathan mitutok sa usa ka higante nga rocket. Mora kini og sama usa sa iyang dula, apan mas nindot. Mingisi si Papa. Makalingaw nga makauban nila ni Mama ug Papa. Gusto niyang makakita kon hangtod kanus-a siya makapabilin sa berde!
Mga paghulagway pinaagi ni Carolina Farías