Ko e Tohi Makehé
Naʻe pehē ange ʻe Peanisi, “Papa, ko koe ʻeni ʻoku laú.” Naʻá ne fakaava e folofolá. Naʻe tangutu ʻa Maman (Mama) mo Papa ʻi hono tafaʻakí ʻi he seá.
Naʻe lau ʻe Papa ʻa e ʻuluaki potufolofolá. “ʻOku ou ʻilo ʻokú ne ʻofa ki heʻene fānaú,”
Naʻe toe fakaongo mai ʻe Peanisi, “ʻOku ou ʻilo ʻokú ne ʻofa ki heʻene fānaú.”
Naʻe pehē ʻe Papa, “Ka neongo iá, ʻoku ʻikai te u ʻiloʻi hono ʻuhinga ʻo e meʻa kotoa pē.”*
Ko ha lea faingataʻa ʻa e ka neongo iá. Naʻe teʻeki ke lava ʻa Peanisi ʻo laukonga, pea naʻe ʻikai ke ne ʻiloʻi e ʻuhinga ʻo e ngaahi leá kotoa. Ka naʻá ne saiʻia ke toutou lea ʻaki e ngaahi leá ʻi he taimi naʻe lau folofola fakataha ai hono fāmilí.
ʻI he ʻaho hono hokó ʻi he taimi lau folofolá, naʻe ʻi ai ha meʻaʻofa fakaʻohovale ʻa Papa. Naʻá ne pehē, “ʻOku ou maʻu ha meʻa makehe maʻau.” Naʻá ne ʻoange kia Peanisi ha tohi. Naʻe ʻi ai ha fakatātā ʻo ha kakai mo ha vaka ʻi muʻa.
“Ko e ʻomai ʻeni maʻaku?” Ko e fehuʻi ange ia ʻa Peanisí. Naʻá ne fāʻofua ki he fuʻu tohi lahi naʻá ne puké.
Naʻe talaange ʻe Papa, “ʻAi maʻau. Sio ki loto.”
Naʻe fakaava hake ʻe Peanisi ʻa e tohí. Naʻá ne ʻohovale. Naʻe lahi ʻaupito ha ʻū fakatātā fakaʻofoʻofa ai.
“Ko e hā hono uí?” Ko e fehuʻi ange ia ʻa Peanisí.
Naʻe tuhu ʻa Papa ki he ngaahi lea ʻi he takafí. Naʻá ne talaange, “Ngaahi Talanoa ʻo e Tohi ʻa Molomoná.”
Naʻe muimuiʻi ʻe Peanisi e ngaahi foʻi lea ʻi he takafí. Naʻá ne pehē, “Ngaahi Talanoa ʻo e Tohi ʻa Molomoná.”
Naʻe pehē ʻe Maman, “ʻOku ʻi ai e ngaahi talanoa tatau ʻoku tau lau ki ai ʻi he folofolá.”
Naʻe tuhu ʻa Peanisi ki he taha ʻo e ngaahi fakatātaá. Naʻá ne ʻeke ange, “Ko hai ē?”
“Sai. ʻOkú ke sio ki he kaufaná mo e ngahaú?” Ko e ʻeke ange ia ʻa Maman.
Naʻe kamo ʻa Peanisi.
“ʻOkú ke manatuʻi haʻo lau fekauʻaki mo ha taha naʻe motu ʻene kaufaná?” Ko e fehuʻi ange ia ʻa Papá.
“Nīfai?” Ko Peanisi ange ia.
Naʻe pehē ange ʻe Papa, “ʻIo, ko Nīfai ia.”
Naʻe malimali ʻa Peanisi. “Mālō ʻaupito, Papa. Mālō ʻaupito Maman. ʻOku ou saiʻia he tohi ko ʻení.”
ʻI he pō kotoa pē, naʻe lau ʻe Peanisi ʻene tohi folofolá mo Maman mo Papa. Naʻá ne tuhu ki he ngaahi fakatātaá. Naʻá ne ako ke puʻaki ha ngaahi lea faingataʻa. Pea naʻá ne ako ke lau ha ngaahi foʻi lea faingofua ʻiate ia pē!
Naʻá ne fiefia ʻi hono lau e folofolá. Naʻá ne fiefia ʻi heʻene lava ʻo lau ia mo Maman pea mo Papá!
Tā fakatātā ʻa Adam Record