Lahi Lelei Pē
Naʻe ʻikai saiʻia ʻa Tiulina ʻi heʻene kehé.
“ʻOkú ke fuʻu siʻisiʻi fau!” Ko Sasa ange ia. “ʻOku totonu ke mau ui koe ko Tiulina Kiti.”
Naʻe feinga ʻa Tiulina ke ne malimali. Naʻe fakamataliliʻi lahi ia ʻe he tamaiki kehe ʻi he akó ko ʻene siʻisiʻí. Naʻe fāʻeleʻi mai ia naʻá ne siʻisiʻi pē, pea naʻe ʻikai ke vave ʻene tupú ʻo hangē ko e fānau kehé. Ka naʻe ʻikai ke ne saiʻia ʻi he hingoa ko e Tiulina Kití. Naʻe ʻikai ke ne saiʻia ʻi heʻene kehé.
Naʻe talaange ʻe Meki ʻi heʻenau hū ki tuʻa ʻi he mālōlō siʻí, “ʻOkú ke fuʻu siʻisiʻi ʻaupito mahalo he ʻikai te ke toe tupu koe.”
Naʻe pehē ange ʻe Tiulina, “ʻOku ou ʻilo ʻoku ou siʻisiʻi. Ka ʻoku ʻikai ha meʻa te u lava ʻo fai ki ai. Tau ō ʻo vaʻinga.”
Naʻe lele ʻa Tiulina ke vaʻinga soka mo e tamaiki kehé. Naʻa nau ʻaka taufetongi ʻa e foʻi pulú. Naʻa nau fiefia fakataha kotoa.
Ka naʻe ʻikai fuoloa kuo fuʻu helaʻia ʻa Tiulina. Naʻá ne lue māmālie atu mei he vaʻingá ʻo tangutu ʻi he musié.
Ne ʻikai fuoloa kuo haʻu kiate ia hono kaungāmeʻa ko Siosí. Naʻá ne kalasi fakataha foki mo Siosi he Palaimelí ʻi he lotú.
“ʻOkú ke SAI PĒ?” Ko e ʻeke ange ia ʻe Siosí.
Naʻe talaange ʻe Tiulina, “ʻIo. ʻOku fiemaʻu pē ke u kiʻi mālōlō. ʻOku helaʻia hoku ongo maʻamaʻá ʻi he taimi ʻoku lahi ai ʻeku lelé. ʻOku ʻikai ke na mālohi fēfē.”
Naʻe tangutu hifo ʻa Siosi he tafaʻaki ʻo Tiuliná. Naʻá na paki ʻa e musié pea ngaohi ha fanga kiʻi mama mo ha ngaahi vesa. Naʻá na talanoa fekauʻaki mo e akó mo e ngaahi kaungāmeʻá pea mo e ngāue fakaako mei ʻapí.
Naʻe pehē ange ʻe Siosi, “Naʻá ku fanongo atu ki he lea ʻa Sasá. Kātaki pē heʻene ui koe ko Tiulina Kití.”
Naʻe kamo pē ʻa Tiulina.
“Ka ʻoku ou tui ʻokú ke lahi lelei pē koe!” Ko Siosi ange ia.
Naʻe malimali ʻa Tiulina. Naʻá ne ʻoange kia Siosi ʻa e vesa musie naʻá ne ngaohí.
ʻI he Sāpate hono hokó, naʻe teuteu ʻa Tiulina ki he lotú. Naʻá ne tui hono kofú pea helu hono ʻulú. Naʻá ne fakafulofula leva ʻi hono kiʻi sū valevale ʻi he tautauʻanga valá. Naʻá ne ʻilo fakapapau ʻoku ʻikai ha toe taha ʻi heʻene kalasi Palaimelí te ne tui ha kiʻi sū siʻisiʻi pehē.
Naʻe lue taʻefie lue pē ʻa Tiulina ʻi he holo ʻi he falelotú. ʻI heʻene aʻu ki heʻene lokiako Palaimelí, naʻe talitali mai ʻa Siosi ʻi tuʻa.
“ʻOku ʻai ke mau fakaʻohovaleʻi koe!” Ko Siosi ange ia. “Haʻu ʻo sio!”
ʻI he hū atu ʻa Tiulina ki he lokí, naʻe tuhu ʻa e tamaikí mo ʻenau faiako ko Sisitā Potí ki ha palakipoe kuo teuteuʻi fakaʻofoʻofa. Naʻe fakapipiki takai ai ha ngaahi foʻi haati. Naʻe ʻi ai ha fanga kiʻi tohi ʻi he ngaahi foʻi hātí naʻe pehē, “ʻOku fakaʻofoʻofa e malimali ʻa Tiulina! ʻOku fōlahi e foʻi mafu ʻo Tiuliná!”
Naʻe fehuʻi ange ʻe Siosi, “ʻOkú ke saiʻia ai? Naʻe tokoni mai ʻa Sisitā Poti ke mau teuteuʻi ia.”
Naʻe pehē ange ʻe Tiulina, “ʻOku ou saiʻia ʻaupito ai! Mālō ʻaupito.”
Naʻe pehē ʻe Sisitā Poti, “Naʻa mau fie fakamanatu atu ha moʻoni lahi. ʻOku ʻofa ʻa e Tamai Hēvaní ʻiate kitautolu takitaha. Nounou. Lōloa. Lahi. Siʻisiʻi. ʻOku ʻikai mahuʻinga e meʻa ia ko iá kiate Ia. Ko ʻEne fānau kotoa ʻa kitautolu, pea ʻokú Ne ʻofa ʻi he tokotaha kotoa pē.”
Naʻe sio hake ʻa Tiulina ki he ngaahi foʻi haati he palakipoé peá ne malimali—fōlahi.
Tā fakatātā ʻa Olga Lee