Ko ha Fepōtalanoaʻaki mo Siomala fekauʻaki mo e Hiki Foʻou ki he Kau Finemuí
ʻOku haʻu ʻa Siomala mei Siapasi, ko ha siteiti ʻi he fakatonga ʻo Mekisikoú. Naʻá ne toki hiki pē ki he Kau Finemuí.
ʻUluakí, ʻoku mau fie maheni mo koe.
Ko e hā e meʻa fakafiefia ʻokú ke saiʻia aí?
Heka pasikala, vaʻinga soka, mo feimeʻatokoni. Ko e meʻa ʻoku ou saiʻia taha ke ngaohí ko e kesitiá!
Ko e hā e lanu ʻokú ke saiʻia taha ai?
Engeenga.
Ko e hā naʻá ke nofo ʻamanaki lahi taha ki ai ʻi he hiki mei he Palaimelí ki he Kau Finemuí?
Naʻá ku fuʻu fiefia ʻaupito ke ʻalu ki he temipalé ʻo fakahoko e papitaisó.
Ko e hā e ongo naʻá ke maʻu ʻi hoʻo fuofua ʻalu ki he Kau Finemuí?
Ne faingataʻa he kamataʻangá. Naʻá ku hohaʻa pe ko e hā e fakakaukau mai ʻa e tamaiki fefine lalahí kiate aú. Naʻá ku kiʻi manavasiʻi ʻo aʻu ki heʻemau ō fakataha ki he temipalé. Ko e taimi ia naʻa mau kaungāmeʻa lelei aí.
Naʻe fēfē ʻa e fuofua ʻalu ki he temipalé?
Naʻe makehe ʻaupito ia. Ko ha aʻusia fakalaumālie ʻa e hū ki he temipale ʻo e ʻEikí. Kuó u fakaʻamu maʻu pē ke u ʻalu ki he temipalé. Naʻa mau hiva ʻi he Palaimelí, “Fie siofia ha temipale. Ha ʻaho.” Te u lava he taimí ni ʻo pehē, “ʻOku ou saiʻia he ʻalu ki he temipalé.”
ʻI he fuofua taimi ko ia ʻi he temipalé, naʻá ku fakahoko ai ha papitaiso maʻa ha niʻihi ʻo hoku ngaahi mehikitangá, kāinga ʻe niʻihi ʻo ʻeku kui fefiné (faʻē ʻeku faʻeé), mo ha kakai kehe naʻe ʻikai ke u ʻilo. Ko e temipalé mo e hisitōlia fakafāmilí ko ha konga ia ʻo ʻeku fakamoʻoní.
Ko e hā ha ngaahi ʻekitivitī fakafiefia kuó ke fakahoko mo hoʻo kulupu ʻo e Kau Finemuí?
Taʻo kūkisi! Naʻa mau taʻo ha kūkisi ʻe 150. Naʻa mau vahevahe leva ia mo e kakai kehé. ʻOku fakafiefia ʻa e ngaahi ʻekitivitī ʻa e Kau Finemuí. ʻOku fonu ʻi he ngaahi lēsoni leleí, fakaʻaiʻaí, mo e fakahinohinó ke tokoniʻi kimautolu ke hoko ko ha kau faifekau ʻi he kahaʻú.
ʻOku ʻi ai mo ha tamaiki fefine kehe ʻi ho toʻú ʻi homou uōtí?
Ko au pē. Ko au pē foki ʻi heʻeku kalasi ʻi he akó ʻoku mēmipa ʻi he Siasí.
ʻOku faingataʻa nai ke hoko ko e mēmipa pē ʻo e Siasí ʻi he akó?
ʻIkai. ʻOku ʻiloʻi kotoa ʻe hoku ngaahi kaungāmeʻá ʻoku ou muimui ʻi ha tui fakalotu kehe meiate kinautolu, ka ʻoku ʻikai kehe ʻenau fakafeangai mai kiate aú.
Ko e hā ʻokú ke saiʻia taha ai ʻi he kau ki he Kau Finemuí?
ʻOku ou saiʻia ke ako lahi ange fekauʻaki mo e Fakamoʻuí pea mo e palani ʻo e fakamoʻuí. Ko ha tāpuaki maʻongoʻonga ia ke fakahoko e ngāue hisitōlia fakafāmilí. ʻOku ou saiʻia ke fakahoko ʻa e papitaiso ʻi he temipalé ke foaki ha ʻamanaki lelei ki hotau kāinga kuo nau ʻosi mavahe mei he māmaní.
ʻOku ou saiʻia ke kau ʻi he polokalama ʻa e Kau Finemuí!
Ngaahi tā fakatātā ʻa Alyssa Tallent