Dali, Sunod Kanako nga mga Kalihokan
Alang sa home evening, pagtuon sa kasulatan, o kalingawan lamang!
Walay Butang nga Imposible!
Istorya: Si Elisabet ug Zacarias gusto nga makabaton og anak, apan si Elisabet tigulang na kaayo. Usa ka adlaw, usa ka anghel ang misulti ni Zacarias nga sila makabaton og anak nga lalaki! Ang ilang anak nga lalaki mao si Juan Bautista. Si Elisabet ug Zacarias nakat-on nga sa Dios, walay butang nga imposible. (Tan-awa sa Lucas 1:11–14, 37.)
Awit: “Ampo sa Usa ka Bata” (Songbook sa mga Bata, 6–7)
Kalihokan: Sulayi kining “imposible” nga tahas! Una, pikoa ang imong tunga-tunga nga tudlo sa ilalom. Dayon ibutang ang imong kamot sa lamesa, nga ang palad nagkulob. Karon sulayi sa pag-isa ang imong tudlo nga butanganan og singsing [ring finger]. Dayon hangyoa ang usa ka tawo sa pag-isa niini alang nimo. Giunsa sa Langitnong Amahan pagtabang nimo nga makabuhat og usa ka butang nga mora og dili posible?
Usa ka Istorya kabahin sa Pagkatawo ni Jesus
Istorya: Si Jesukristo natawo sa usa ka pasungan sa siyudad sa Betlehem. Ang mga magbalantay sa karnero, mga anghel, ug Maalamon nga mga Tawo miabot aron nga makita Siya. Makabasa ka og dugang mahitungod sa Maalamon nga mga Tawo diha sa pahina 46.
Awit: “Sa Bata pa si Jesus” (Songbook sa mga Bata, 34)
Kalihokan: Pagpuli-puli og sugilon sa istorya kabahin sa pagkatawo sa usa ka sakop sa pamilya. Ikaw mahimong mosulti kabahin kon asa sila natawo, kanus-a sila natawo, kinsa ilang mga ginikanan, o uban pang butang nga inyong nahibaloan kabahin sa ilang pagkatawo.
Ang Tinuod nga Kahayag
Alang sa Juan 1
Istorya: Si Jesukristo usahay gitawag og ang “tinuod nga Kahayag” (Juan 1:9). Ang mga kasulatan nagtudlo nga kita kinahanglan nga motuman sa Iyang mga kasugoan ug mosunod Kaniya. Dayon kita makabaton og “gahom nga mahimong mga anak nga lalaki [ug babaye] sa Dios” (Juan 1:12).
Awit: “Si Jesus Mao ang Akong Tinuod nga Kahayag” (pahina 23)
Kalihokan: Pagdrowing og hulagway sa usa nimo ka tumong. Patagoi sa usa ka tawo ang imong litrato sa usa ka dapit diha sa lawak ug palonga ang mga suga. Karon pagkuha og gamay nga suga og pasigaha kini libot sa lawak. Makit-an ba nimo ang imong litrato karon? Pag-istorya kabahin kon unsaon ni Jesukristo pagtabang nimo nga makab-ot ang imong mga tumong.
Ang Dalan sa Pakigsaad
Alang sa Mateo 3; Marcos 1; Lucas 3
Istorya: Si Jesukristo miadto kang Juan Bautista aron magpabunyag aron Siya “[makatuman] sa tibuok nga pagkamatarong” (Mateo 3:15). Si Jesus gibunyagan aron sa pagpakita og ehemplo sa pagtuman sa Langitnong Amahan. Kita makasunod ni Jesus pinaagi usab sa pagpabunyag!
Awit: “Dali, Sunod Mo Kanako,” (Mga Himno, nu. 64)
Kalihokan: Adto sa pahina 9 aron makat-on kabahin sa dalan sa pakigsaad. Dayon buhata ang kalihokan. Niini nga pahina matag bulan, ikaw makat-on kabahin sa usa ka panalangin alang kanimo samtang mosunod ka sa dalan pabalik ngadto sa Langitnong Amahan!
Mga paghulagway pinaagi ni Katy Dockrill