Higala ngadto sa Higala

Pagtabang sa Buhat sa Langitnong Amahan

Ni Sister Susan H. Porter

Kinatibuk-ang Presidente sa Primary

Gikan sa usa ka interbyo ni Richard M. Romney.

Nahibalo ka ba nga gidapit ka sa pagtabang sa importante nga buhat sa Langitnong Amahan? Kana nga buhat mao ang pagtabang sa tanan Niyang mga anak sa pagbalik ug pagpuyo uban Kaniya (tan-awa diha sa Moises 1:39). Makatabang ka samtang mobuhat ka niining upat ka butang: mopuyo, moatiman, modapit, ug mohiusa.

Mopuyo sa ebanghelyo ni Jesukristo. Makapuyo ka sa ebanghelyo kon mosunod ka sa ehemplo ni Jesus. Mahimo kang mag-ampo, magbasa sa mga kasulatan o mga istorya sa libro sa kasulatan, mopasaylo sa uban, ug moadto sa simbahan.

Moatiman niadtong nanginahanglan. Mahimo kang motapad sa usa ka tawo kinsa nag-inusara. O mahimo kang motawag sa usa ka higala nga nasakit ug lingawon nimo sila.

Modapit sa uban sa pagdawat sa ebanghelyo. Mahimo kang modapit og mga higala ngadto sa simbahan o sa usa ka kalihokan sa Primary. Mahimo kang modapit og mga higala sa imong bunyag.

Mohiusa sa mga pamilya alang sa kahangtoran. Mahimo kang makig-istorya sa imong mga apohan aron makahibalo bahin sa ilang kinabuhi. Mahimo kang tigpasiugda og kalinaw diha sa inyong panimalay. Mahimo kang mangandam sa imong kaugalingon sa pagsulod sa templo.

Ako mosaad nga imong bation ang kalipay samtang maninguha ka nga mopuyo, moatiman, modapit, ug mohiusa diha sa panimalay, sa eskwelahan, ug sa Primary. Ang Langitnong Amahan nahigugma kaninyo! Ug ikaw makatabang sa Iyang importante nga buhat.

Sulayi Kini nga mga Aksyon!

Mopuyo: Isaka imong bukton og pataas samtang motan-aw ka sa langit. Kini mao ang mopahinumdom nimo nga ang Langitnong Amahan motabang nimo sa pagpuyo sa ebanghelyo samtang mag-ampo ka ngadto Niya.

Moatiman: Ikiyugpos imong mga bukton ug hatagi ang imong kaugalingon og usa ka dakong gakos! Kini mao ang mopahinumdom nimo sa pag-atiman sa uban sama sa gibuhat ni Jesus.

Modapit: Ituyhad ang imong mga bukton sa imong atubangan. Kini mao ang mopahinumdom nimo sa pagdapit sa uban sa pagtagamtam sa mga panalangin sa ebanghelyo.

Mohiusa: Ipagawas ang imong mga kamot nga ang imong mga tudlo naglambigit. Kini mao ang mopahinumdom nimo nga mahimo kang makatabang sa mga pamilya nga mahiusa.

Mga paghulagway pinaagi ni Augusto Zambonato