Mga Suga, Kamera, Serbisyo!
Ang pagkaanaa sa balay lang wala makapugong nila sa pagserbisyo.
Si Antonella ug si Mariana ganahan kaayo nga moadto sa simbahan matag semana. Apan karon dili na sila makaadto sa simbahan tungod sa COVID-19 nga pandemya. Aduna silay klase sa Primary sa online, apan lahi ra gyud kini.
Si Antonella ug si Mariana gimingaw moadto sa Primary nga magkitaay sa personal. Sa miaging tuig, ang ilang pamilya mibalhin gikan sa Chile ngadto sa Canada. Ang pandemya nakapalisod maghimo og bag-ong mga higala. Gimingaw sila nga magkat-on mahitungod sa mga istorya sa kasulatan kauban ang ubang mga bata. Ug gimingaw sila nga may mga leksiyon sa Kinatsila sama sa ilang gibuhat didto sa Chile.
Usa ka adlaw, human sa pagsimba diha sa balay, si Antonella ug si Mariana mitan-aw sa online alang sa usa ka butang nga makatabang kanila sa pagtuon sa Dali, Sunod Kanako.
“Maayo unta makakita ta og dugang pa nga mga video sa Kinatsila,” miingon si Antonella. Naghunahuna siya sa makadiyot. Dayon duna siyay nindot nga ideya. “Makahimo kita og atong kaugalingong mga video sa Dali, Sunod Kanako matag semana.”
“Oo, ug makahimo kita niini sa Kinatsila!” miingon si Mariana. “Dayon ato kining ipakigbahin sa ubang mga bata usab.”
Si Mamá ug si Papá miingon nga sila makatabang. Ang tibuok pamilya naghinam-hinam na!
Una ang pamilya nagbasa sa mga kasulatan alang niana nga semana nga leksiyon. Ang mga batang babaye nagplano unsa ang ilang isulti. Dayon nagsugod sila og himo sa mga video. Si Antonella ug si Mariana nagpuli-puli sa pag-record sa ilang kaugalingon samtang nagsulti sila mahitungod sa mga istorya sa Basahon ni Mormon. Sa katapusan sa matag video, usa nila mipakigbahin og usa ka butang nga ilang nakat-unan gikan sa leksiyon. Dayon si Mamá ug si Papá mitabang nila sa paghimo sa video aron i-post online.
Una ato, wala gayud sila kahibalo unsay isulti. Apan ang pagbasa sa mga kasulatan ug pagkat-on og dugang pa mahitungod sa mga leksiyon nakatabang nila.
Usa ka Dominggo, si Antonella ug si Mariana milingkod atubangan sa computer alang sa ilang klase sa Primary. Kini nga semana nga leksiyon mao ang mahitungod sa batan-ong mga manggugubat diha sa Basahon ni Mormon. “Nganong ang batan-ong mga manggugubat miadto sa gubat?” nangutana ang ilang magtutudlo.
Gipalong ni Mariana ang iyang mikropono. “Kahibalo ko!” siya miingon. Siya ug si Antonella mihimo og video mahitungod niana nga istorya sa miaging semana. “Ang ilang mga amahan misaad sa Dios nga dili sila makig-away, mao nga ang mga anak nga lalaki ang miadto.”
Mitando si Antonella. “Ang ilang mga inahan mitudlo kanila nga kon sila adunay hugot nga pagtuo, ang Dios moluwas kanila.” Mipahiyom siya ni Mariana. Makalingaw ang pagtuon og dungan sa mga kasulatan.
Nianang gabhiona sa panihapon, si Mamá nangutana, “Kumusta man ang Primary?”
“Maayo!” Miingon si Antonella. “Ang paghimo sa mga video nakatabang kanako nga makat-on og daghan mahitungod sa mga kasulatan.”
“Ako sab,” miingon si Mariana. “Makatubag ko sa daghang pangutana sa Primary. Ug kami mas nakahibalo sa mga istorya sa kasulatan.”
“Nalipay ko nga ang mga video nakatabang kaninyo,” miingon si Papá. “Tingali nakatabang usab ni sa daghang mga tawo!”
“Eksakto na,” miingon si Mamá. “Ang pagpakigbahin sa unsay imong nakat-onan ug unsay imong gibati bahin sa ebanghelyo usa ka nindot kaayo nga paagi sa pagserbisyo!”
Mipahiyom si Mariana. “Ganahan ko nga makaserbisyo kami niini nga paagi,” miingon siya. Dayon milingi siya ni Antonella. “Magsugod tag plano sa video para sa sunod semana!”
Paghulagway pinaagi ni Kristin Sorra