Ngaahi ‘Ekitivitī ki he Ha‘u, ‘o Muimui ‘Iate Aú
Ako e folofolá pe fakahoko ha meʻa fakafiefia ʻi he efiafi ʻi ʻapí!
‘Oku ‘Ikai Ha Me‘a ‘e Ta‘emalava!
Talanoá: Naʻe fiemaʻu ʻe ʻIlisapeti mo Sakalia ha pēpē, ka naʻe fuʻu motuʻa ʻa ʻIlisapeti. ʻI ha ʻaho ʻe taha, naʻe talaange ʻe ha ʻāngelo kia Sakalia te na maʻu ha foha! Ko hona fohá ʻa Sione Papitaiso. Naʻe ako ai ʻe ʻIlisapeti mo Sakalia ʻoku ʻikai ha meʻa ʻe taʻemalava ki he ʻOtuá. (Vakai, Luke 1:11–14, 37.)
Hivá: “Lotu ʻa ha Kiʻi Tamasiʻi” (Tohi Hiva ʻa e Fānaú, 6–7)
ʻEkitivitī: ʻAhiʻahi ʻa e ngāue “taʻemalava” ko ʻení! ʻUluakí, peluki ho foʻi tuhu ʻi lotomālié. Hili ho nimá ʻi ha funga tēpile, ʻo fakahanga ki lalo. Feinga leva he taimí ni ke hiki ho foʻi tuhu tui mamá (ring finger). Hili iá peá ke kole ki ha taha kehe ke ne hiki hake ia. Kuo tokoniʻi fēfē koe ʻe he Tamai Hēvaní ke ke fai ha meʻa naʻe ngali taʻemalava?
Ko Ha Talanoa ‘o e ‘Alo‘í
Talanoá: Naʻe ʻaloʻi ʻa Sīsū Kalaisi ʻi ha ʻaiʻangakai ʻo e manú ʻi he kolo ko Pētelihemá. Ne omi e kau tauhisipí, kau ʻāngeló, mo e Kau Tangata Potó ke mamata kiate Ia. Te ke lava ʻo ako lahi ange fekauʻaki mo e Kau Tangata Potó ʻi he peesi 46.
Hivá: “Ko Sīsuú Naʻá Ne Hangē ha kiʻi Tamasiʻí” (Tohi Hiva ʻa e Fānaú, 34)
ʻEkitivitī: Taufetongi ʻi hono fai ha talanoa ʻo ha fāʻeleʻi ha mēmipa ʻo e fāmilí. Te mou lava ʻo talanoa fekauʻaki mo e feituʻu naʻe fāʻeleʻi ai kinautolú, taimi naʻe fāʻeleʻi ai kinautolú, ko hai ʻenau mātuʻá, pe ngaahi meʻa kehe ʻokú ke ʻilo fekauʻaki mo honau fāʻeleʻí.
Ko e Maama Mo‘oní
Maʻá e Sione 1
Talanoá: Ko e taimi ʻe niʻihi ʻoku faʻa ui ʻa Sīsū Kalaisi ko e “Maama moʻoní” (Sione 1:9). ʻOku akoʻi mai ʻe he folofolá ʻoku totonu ke tau tauhi ʻEne ngaahi fekaú mo muimui kiate Ia. Pea te tau maʻu ʻa e “monūʻia ke hoko ko e fānau ʻa e ʻOtuá” (Sione 1:12).
Hivá: “Ko Sīsū ʻa ʻEku Maama Moʻoní” (peesi 23)
ʻEkitivitī: Tā ha fakatātā ʻo haʻo taumuʻa. ʻAi ha taha ke ne fufuuʻi hoʻo fakatātaá ʻi ha feituʻu ʻi he lokí pea tāmateʻi ʻa e māmá. Mai leva ha kiʻi maama pea huluʻi takai ia ʻi he lokí. Te ke lava nai ke ʻilo ho fakatātaá? Talanoa fekauʻaki mo e founga ʻe lava ke tokoniʻi ai koe ʻe Sīsū Kalaisi ke ke aʻusia ho ngaahi taumuʻá.
Ko e Hala ‘o e Fuakavá
Maʻá e Mātiu 3; Maʻake 1; Luke 3
Talanoá: Naʻe hāʻele ʻa Sīsū Kalaisi kia Sione Papitaiso ke papitaiso Ia kae lava ke Ne “fai ki he māʻoniʻoni kotoa pē” (Mātiu 3:15). Naʻe papitaiso ʻa Sīsū ke fakahaaʻi ha sīpinga ʻo e talangofua ki he Tamai Hēvaní. Te tau lava foki ʻo muimui ʻia Sīsū ʻaki ʻetau papitaiso!
Hivá: “Muimui ʻIate Au” (Ngaahi Himi, fika 57)
ʻEkitivitī: ʻAlu ki he peesi 9 ke ako kau ki he hala ʻo e fuakavá. Pea fai ʻa e ʻekitivitií. ʻI he peesi ko ʻení ʻi he māhina takitaha, te ke ako ai fekauʻaki mo ha tāpuaki maʻau ʻi hoʻo muimui ʻi he hala ke foki ki he Tamai Hēvaní!
Ngaahi tā fakatātā ʻa Katy Dockrill