Māmá, Meʻafaitaá, Ngāue Tokoní!
Naʻe ʻikai taʻofi kinaua ʻe heʻena nofo ʻi ʻapí mei heʻena ngāue tokoní.
Naʻe saiʻia ʻa ʻAnitonila mo Maliana ke ʻalu ki he lotú he uike kotoa. Ka ko ʻeni kuo ʻikai ke na lava ʻo ʻalu ki he lotú koeʻuhí ko e mahaki fakaʻauha COVID-19. Naʻe fai e ngaahi kalasi Palaimelí he ʻinitanetí, ka naʻe ʻikai pē ke tatau ia.
Naʻe manatu ʻofa ʻa ʻAnitonila mo Maliana ki heʻena aʻutonu ki he Palaimelí. ʻI he taʻu ʻe taha kuohilí, naʻe hiki honau fāmilí mei Silei ki Kānata. Naʻe hoko e mahaki fakaʻauhá ke faingataʻa ai e fakakaungāmeʻa foʻoú. Naʻá na taʻeoliʻia he ʻikai lava ʻo ako fakataha mo e fānau kehé ki he ngaahi talanoa ʻi he folofolá. Pea naʻá na manatu ʻofa ki hono fakahoko faka-Sipeini ʻa e ngaahi lēsoní ʻo hangē ko ia ne fai ʻi Sileí.
ʻI ha ʻaho ʻe taha, hili e lotu ʻa ʻAnitonila mo Maliana ʻi ʻapí, naʻá na kumi ʻi he ʻinitanetí ha meʻa ke tokoniʻi kinaua ke na ako ʻa e Haʻu, ʻo Muimui ʻIate Aú.
Naʻe pehē ʻe ʻAnitonila, “Fakaʻamu ange naʻe maʻu ha ngaahi vitiō lahi ange ʻi he lea faka-Sipeiní.” Naʻá ne fakakaukau ʻi ha kiʻi taimi. Peá ne maʻu leva ha fakakaukau lelei. “Te ta lava ʻo faʻu ʻeta vitiō pē ʻataua ki he Haʻu, ʻo Muimui ʻIate Aú he uike kotoa pē.”
Naʻe pehē ange ʻe Maliana, “ʻIo, pea te ta lava ʻo faʻu ia ʻi he lea faka-Sipeiní! Pea te ta lava foki ʻo vahevahe ia mo e fānau kehé.”
Naʻe pehē ʻe Mama mo Papa te na lava ʻo tokoni. Naʻe fiefia kotoa ʻa e fāmilí!
ʻUluakí, naʻe lau ʻe he fāmilí ʻa e folofola ki he lēsoni ʻo e uiké. Naʻe palani ʻe he ongo tamaiki fefiné ʻa e meʻa ke na talanoa ki aí. Pea naʻá na kamata leva ke faʻu e ngaahi vitioó. Naʻe taufetongi ʻa ʻAnitonila mo Maliana ʻi hono lekooti kinaua ʻi heʻena talanoa fekauʻaki mo e ngaahi talanoa ʻi he Tohi ʻa Molomoná. ʻI he fakaʻosinga ʻo e foʻi vitiō takitaha, naʻe vahevahe ʻe ha taha ha meʻa naʻá ne ako mei he lēsoní. Pea tokoni leva ʻa Mama mo Papa ke na faʻu ʻa e foʻi vitioó ke vahevahe ʻi he ʻinitanetí.
ʻI he kamataʻangá, naʻe ʻikai ke na ʻilo maʻu pē ʻa e meʻa ke lea ʻakí. Ka naʻe tokoniʻi kinaua ʻe hono lau e folofolá mo hono ako lahi ange e lēsoní.
ʻI ha Sāpate ʻe taha, naʻe tangutu ʻa ʻAnitonila mo Maliana ʻi muʻa he komipiutá ke fai ʻena kalasi Palaimelí. Ko e lēsoni ʻo e uike ní naʻe fekauʻaki ia mo e kau tau kei talavou ʻi he Tohi ʻa Molomoná. Naʻe fehuʻi ange ʻe heʻena faiakó, “Ko e hā naʻe ʻalu ai ʻa e kau tau kei talavoú ki he taú?”
Naʻe fakamoʻui ʻe Maliana ʻena maiká. Naʻá ne pehē ange, “ʻOku ou ʻiloʻi ʻe au!” Naʻá ne faʻu mo ʻAnitonila ha foʻi vitiō fekauʻaki mo e talanoa ko iá ʻi he uike kuo ʻosí. “Naʻe palōmesi ʻenau ngaahi tamaí ki he ʻOtuá he ʻikai ke nau tau, ko ia ne ʻalu leva e ngaahi fohá.”
Naʻe kamokamo pē ʻa ʻAnitonila. “Pea naʻe akoʻi kinautolu heʻenau faʻeé kapau te nau maʻu ʻa e tuí, ʻe maluʻi kinautolu ʻe he ʻOtuá.” Naʻá ne malimali kia Maliana. Naʻe fakafiefia ke ako fakataha ʻa e folofolá.
ʻI he maʻu meʻatokoni he pō ko iá, naʻe fehuʻi ange ʻe Mama, “Naʻe fēfē e Palaimelí?”
“Sai!” Ko ʻAnitonila atu ia. “Naʻe tokoniʻi au ʻe hono faʻu e ngaahi vitioó ke u ako lahi ange kau ki he folofolá.”
Naʻe pehē ange ʻe Maliana, “Mo au pē! ʻOku ou lava ʻo tali ha ngaahi fehuʻi lahi ʻi he Palaimelí. Pea ʻokú ma ʻilo lelei ange ʻa e ngaahi talanoa mei he folofolá.”
Naʻe pehē ange ʻe Papa, “ʻOku ou fiefia ne tokoni atu e ngaahi vitioó. ʻOku ou tui kuo nau tokoniʻi foki mo ha kakai tokolahi!”
Naʻe talaange ʻe Mama, “ʻOku moʻoni ia. Ko hono vahevahe ko ia e meʻa kuó ke akó mo hoʻo ongo kau ki he ongoongoleleí ko ha founga lelei ia ʻo e ngāue tokoní!”
Naʻe malimali ʻa Maliana. Naʻá ne pehē ange, “ʻOku ou saiʻia ʻi heʻetau lava ʻo tokoni ʻi he founga ko ʻení.” Naʻá ne tafoki leva kia ʻAnitonila. “Ta kamata palani e vitiō ki he uike kahaʻú!”
Tā fakatātā ʻa Kristin Sorra