Fuʻu Longoaʻa ʻAupito!
Naʻe fuʻu longoaʻa e meʻa kotoa pē. ʻE maʻu nai ʻe Luke ʻa e nongá ʻi fē?
Naʻe hanu ʻa Luke. Naʻe fuʻu longoaʻa e meʻa kotoa pē. Naʻe toe kē pē hono ongo tokoua tokoua ko Toti mo Sioné. ʻOkú ne lava pē ʻo fanongo mai ki heʻena kaikailá mei he ngataʻanga ʻo e holó, neongo e tāpuni e matapā hona lokí. Pea naʻe toe fakaleʻolahi ʻe hono tuofefine ko Lisí ʻene mūsiká. Pumu. Pumu. Pumu. ʻOku lava maʻu pē ke ne fanongo ki he tā ʻa e ngaahi nota maʻulaló.
Naʻe feinga ʻa Luke ke kole ki hono ongo tokouá ke tuku. Naʻe talaange ʻe Toti, “ʻAlu mamaʻo.” Naʻe kole ange leva ʻe Luke kia Lisi ke tukuhifo ʻene mūsiká. Naʻá ne tukuhake ke toe leʻolahi ange ʻene mūsiká.
Naʻe fakaʻamu ʻa Luke ke hū ki tuʻa ki ha feituʻu te ne lava ai ʻo fakakaukaú. Ka naʻe ʻuha ia.
Ka naʻe ʻi ai ha feituʻu lōngonoa ʻe taha ʻe lava ʻa Luke ʻo ʻalu ki ai. ʻI he ʻaneafí, naʻe ʻoange ai heʻene ongomātuʻá ha loki maʻana pē—ko ha loki naʻe ʻikai fiemaʻu ke ne vahevahe mo Toti mo Sione. Naʻe ʻi he peisimení ia. Naʻe lahi feʻunga pē ia ki ha mohenga mo ha tēpile. Ka ʻi hono lokí naʻe lava ke tāpuniʻi ʻe Luke ʻa e matapaá peá ne mamaʻo mei he longoaʻá.
Naʻe hifo ʻa Luke ki hono loki foʻoú. Naʻá ne vakavakai holo ki he ʻū puha naʻá ne ʻohifo kimuʻá. Naʻá ne sio ki ha fakatātā ʻo Sīsū ʻoku ʻasi mai ki tuʻa mei ha puha. Naʻe maʻu ʻe Luke ʻa e tā ko iá ʻi he ʻaho naʻe papitaiso aí. Naʻá ne ongoʻi nonga maʻu pē ʻi heʻene sio ki aí.
Naʻe toʻo ʻe Luke ʻa e fakatātaá mei he puhá. Naʻá ne hili ia ʻi he tēpilé. Peá ne tūʻulutui leva ʻo lotu. Naʻe pehē ʻe Luke, “Tamai Hēvani, ʻoku fuʻu longoaʻa ʻeni ʻi he taimi ʻe niʻihi. Kātaki ʻo tokoni mai ke u maʻu ha nonga.”
Naʻe tokoto hifo ʻa Luke ʻi hono mohengá. Naʻá ne fakakaukau kia Sīsū. Naʻá ne ako ʻi he Palaimelí ʻe lava ke ofi maʻu pē ʻa Sīsū kiate ia. Pea naʻe lava ke ʻomi maʻu pē ʻe he Laumālie Māʻoniʻoní ʻa e nongá.
ʻE vavé ni pē ha foki mai ʻa Mami mo Teti mei he ngāué. Te na lea kia Toti mo Sione. ʻE tuku ʻa e keé. ʻI ha kiʻi vahaʻataimi. Te na lea kia Lisi. ʻE fakaleʻosiʻi ʻe Lisi ʻene mūsiká. ʻI ha kiʻi vahaʻataimi. Kae ʻoua pē kuo toe mavahe ʻa Mami mo Teti.
Ka ʻi he taimi ní, naʻe tokoto ʻa Luke ʻi he mohengá. Naʻá ne sio ki he fakatātā ʻo Sīsuú. Naʻe fanafana ʻa Luke, “Kātaki Tamai Hēvani. Kātaki ʻo tokoni mai ke u ongoʻi nonga neongo pe ko e hā e meʻa ʻoku hoko ʻi he toenga ʻo e falé.”
Naʻe fai mai ha tukituki ʻi he matapā hono loki mohé ʻi he hili ange ha taimi mei ai. “ʻE lava nai ke u hū atu?” Ko e fehuʻi ange ia ʻa Mamí. “ʻOkú ke fēfē hake?”
Naʻe talaange ʻe Luke, “Naʻe toe kē pē ʻa Toti mo Sione. Pea tā leʻolahi ʻe Lisi ʻene mūsiká.”
“ʻOku ou ʻiloʻi. ʻOku faingataʻa, ʻikai ko ia?” Ko Mami ange ia. “ʻOku lolotonga talanoa ʻa Teti ki ho ongo tokouá he taimí ni. Pea te u talanoa kia Lisi he pooni. Ka naʻá ku fakaʻamu ke u ʻuluaki ʻiloʻi pe ʻokú ke fēfē.”
Naʻe pehē ange ʻe Luke, “ʻOku ou sai pē. ʻOku ou fiefia ʻi heʻeku maʻu ʻa e loki ko ʻení.”
Naʻe talaange ʻe Mami, “Mo au pē. ʻOku ou sio kuó ke tuku ha tā ʻo Sīsū ʻi he tēpilé.”
Naʻe malimali ʻa Luke. “ʻIo. Pea te Ne tokoni mai ke ngaohi hoku lokí ke hoko ko ha feituʻu ʻo e nonga.”
Ngaahi tā fakatātā ʻa Bryan Beach