Founga Ne Loto-to‘a ai ‘a Sietá
Naʻe fuʻu ilifia ʻa Sieta ke talanoa ki hono kaungāakó.
Naʻe mihiʻi ʻe Sieta ʻene mānavá pea hū atu ki heʻene lokiako foʻoú. Ko hono ʻuluaki ʻaho ia ʻi he kalasi faá.
Naʻe kalasi ua ʻa Sieta ʻi he taʻu kuo ʻosí. Naʻe fuʻu lelei ʻaupito ʻene akó naʻe loto ai ʻene ʻapiakó ke ne hiki fakalaka ʻi he kalasi tolú. Naʻe vekeveke ʻa Sieta ke fai ha ngaahi fika palopalema faingataʻa ange mo lau ha ʻū tohi lahi ange ʻi he kalasi faá. Ka naʻe ʻikai ke ne fiefia ʻi he pau ke ne mavahe mei hono kaungāmeʻa motuʻá.
ʻI he vakai takai holo ʻa Sieta ʻi he lokí, naʻá ne ongoʻi momou. Naʻe ʻasi matuʻotuʻa mo lōloa ange hono kaungā ako foʻoú kotoa ʻiate ia. Fēfē kapau he ʻikai ke ne lata ai?
Naʻá ne fili ha tesi peá ne tangutu ki lalo. Naʻe tangutu ʻi hono tafaʻakí ha taʻahine lōloa. Naʻe pehē ange ʻe Sieta, “Mālō e lelei.”
Naʻe fehuʻi ange ʻe he taʻahiné, “Ko e hā ʻokú ke ʻi heni aí? Ne u pehē ʻoku totonu ke ke ʻi he kalasi tolú.”
Naʻe manavasiʻi ʻa Sieta mo ne pehē atu, “Naʻe hiki au ʻe he akó ke u fakalaka ʻi ha kalasi ʻe taha.”
Naʻe mata ʻita ʻa e taʻahiné. “Sai pē, ʻoku ʻikai ke u tokanga au pe ʻokú ke poto. ʻOkú ke kei valevale pē.”
Naʻe ongoʻi loto-mamahi ʻa Sieta. ʻI he toenga ʻo e uiké, naʻá ne fuʻu ilifia ke talanoa ki ha taha ʻo hono kaungāakó. Naʻá ne fakafulofula he taimi kotoa pē naʻá ne fanongo ai ki ha taha ʻoku kata pe fanafana. Mahalo naʻa nau lea ʻaki ha ngaahi meʻa taʻeʻofa fekauʻaki mo ia.
ʻI he fakakaukau pē ʻa Sieta he ʻikai fakaʻau ke toe kovi angé, naʻá ne maʻu e ola ʻo ha sivi fika. Naʻá ne fakaʻamu ke tangi ʻi heʻene sio ki hono māká. Ko e fiká ʻa ʻene lēsoni manako tahá. Kuo teʻeki ai ke ne maʻu ha maaka maʻulalo peheni kimuʻa.
ʻI he aʻu ʻa Sieta ki ʻapí, naʻe ʻikai ke ne lava ʻo mapukepuke hono loʻimatá. Naʻá ne talaange ki heʻene mātuʻá, “ʻOku ʻikai haʻaku kaungāmeʻa. ʻOku ʻikai totonu ke u ʻi he kalasi faá. ʻOku ʻikai ke u poto feʻunga.”
Naʻe talaange ʻe he faʻē ʻa e Sietá, “Fakamolemole pē heʻene faingataʻá. Ka ʻokú ke poto. Pea ʻokú ke kei ako pē.”
Naʻe holoholoʻi ʻe Sieta hono matá. “ʻOku ou fakaʻamu au ne lava ke u foki ki he kalasi tolú.”
Naʻe kiʻi fakalongolongo ʻa Teti. Naʻá ne fehuʻi ange, “Te ke fiemaʻu nai ha tāpuaki lakanga fakataulaʻeiki?”
Naʻe kamo ʻa Sieta. Mahalo ʻe tokoniʻi ia ʻe ha tāpuaki meia Teti ke ne ongoʻi fiemālie.
Naʻe tangutu ʻa Sieta ʻi ha sea pea hilifaki ʻe Teti hono ongo nimá ki hono ʻulú.
Naʻe pehē ʻe Teti, “ʻOku ou tāpuakiʻi koe ke ʻoua te ke ilifia. Pea ʻoku ou tāpuakiʻi koe ke ke ʻofa ʻi hoʻo kaungāako foʻoú. ʻI heʻenau maheni pē mo koé, te nau ʻofa foki ʻiate koe.”
Naʻe mafola atu ha ongoʻi nonga ʻia Sieta. Naʻá ne ongoʻi ko e ngaahi lea ʻa ʻene tamaí ko e meʻa ia naʻe finangalo ʻa e Tamai Hēvaní ke ne fanongo ki aí.
Hili e tāpuakí, naʻe tokoni ʻa Mama kia Sieta ke ngāueʻi ʻene ngaahi fika palopalemá. Ne ʻikai fuoloa kuo ongoʻi fiemālie ʻa Sieta.
ʻI he ʻaho hono hokó, naʻe manatuʻi ʻe Sieta hono tāpuakí ʻi he akó peá ne feinga ke loto-toʻa. Naʻá ne malimali ki hono kaungāakó. ʻI heʻene fakahaaʻi e ʻofá, naʻe siʻi ange ai ʻene ongoʻi ilifia ʻiate kinautolú! Naʻe angalelei ʻaupito hanau niʻihi. Naʻá ne ngāue mālohi ke ako, pea ʻikai fuoloa kuo fakalakalaka ʻene māká.
ʻI he fakaʻosinga ʻo e taʻu fakaakó, naʻe tokolahi ha ngaahi kaungāmeʻa ʻo Sieta. Naʻá ne fiefia ʻi hono tokoniʻi ia ʻe he Tamai Hēvaní ke ne loto-toʻá. Pea naʻá ne houngaʻia ʻi heʻene maʻu maʻu pē ʻa e tāpuaki ʻo e mālohi ʻo e lakanga fakataulaʻeikí ke tokoniʻi ia.
ʻŪ tā fakatātā ʻa Susan Keeter