“Fai ha Lotu, Hilamani”
Ko e fuofua ʻaho ʻeni ʻo Hilamani ʻi he akó. Naʻá ne tui hono sote naʻá ne saiʻia taha aí, pea naʻe ʻi ai ʻene penivahevahe foʻou. Naʻe fakaʻatā ia ʻe heʻene faiako foʻoú ke tangutu ʻi ha tēpile mo hono ngaahi kaungāmeʻa ko Silivesitā, Siaosi, mo Maikolo. Ko ha ʻaho fakaʻofoʻofa ia.
Naʻe pehē ange ʻa Señora Mātini, “Fakamaau ho ngaʻotoʻotá. Ko e taimi kai ʻeni.”
Naʻe lotu fakataha maʻu pē ʻa e fāmili ʻo Hilamaní kimuʻa ʻi he maʻu meʻatokoní. Naʻá ne hiki hake hono nimá. “Señora Mātini, te tau ʻuluaki lotu pea toki kaí?”
Naʻe malimali atu ʻa Señora Mātini kia Hilamani. “Te ke lava ʻo tāpuakiʻi hoʻo meʻakaí kapau te ke loto ki ai.”
Naʻe fakaava ʻe Hilamani mo hono kaungāmeʻá ʻenau kai hoʻataá.
Naʻe fehuʻi ange ʻe Silivesitā, “Ko e hā ʻa e lotú?”
Naʻe pehē ange ʻe Hilamani, “Ko e talanoa ia ki he Tamai Hēvaní. Ko e founga ia ʻoku tau fakamālō ai kiate Ia ko ʻetau meʻakaí.”
Naʻe fehuʻi ange ʻe Maikolo, “Te ke lava nai ʻo lotu maʻatautolu kotoa?”
Naʻe kūnima ʻa Hilamani. Naʻe kūnima foki mo hono kaungāmeʻa ʻe toko tolú. Naʻe kuikui ʻa Hilamani pea punou hono ʻulú. Naʻe fai ʻe hono kaungāmeʻá e meʻa tatau.
Naʻe fai leva ʻe Hilamani e lotú, ʻo hangē pē ko hono fai ʻe hono fāmilí. Naʻá ne fakamālō ki he Tamai Hēvaní ʻi he ʻaho lelei naʻa nau maʻú mo ʻenau kai hoʻataá. Naʻá ne kole ke tāpuakiʻi ʻenau meʻakaí. Naʻá ne fakaʻosi ʻaki e huafa ʻo Sīsū Kalaisí peá ne pehē, “ʻĒmeni.”
Naʻe hanga hake ʻa Silivesitā, Siaosi, mo Maikolo.
Naʻe pehē ange ʻa Hilamani, “Te mou lava foki ʻo pehē ʻēmeni.”
Naʻe mamali hono kaungāmeʻá mo pehē, “ʻĒmeni.”
ʻI he kai hoʻatā ʻo e ʻaho hono hokó, naʻe pehē ʻe Silivesitā, “Fai ha lotu, Hilamani.”
Naʻe pehē ʻe Maikolo, “Io, fai ha lotu, Hilamani.” Naʻe kamo pē ʻa Siaosi.
Ko ia naʻe toe lotu ʻa Hilamani. ʻI he taimi ko ʻení naʻá ne fakamālō ai ʻi hono ngaohi ange ʻe heʻene faʻeé ha sanuisi hami mo e siisi, ʻa hono manakó. Naʻá ne kole ki he Tamai Hēvaní ke tokoniʻi kinautolu ke nau ako ʻi he kalasí he ʻaho ko iá.
ʻI he kai hoʻatā ʻo e ʻaho kotoa pē, naʻe pehē ange ʻe he kaungāmeʻa ʻo Hilamaní, “Fai ha lotu, Hilamani.” Pea naʻe fai ʻe Hilamani ha lotu ʻi he ʻaho kotoa pē. Naʻá ne lotu mo hono kaungāmeʻá ʻi he ʻaho takitaha ʻi ha uike ʻe taha.
ʻI he taimi kai hoʻatā ʻo e Mōnite hono hokó, naʻe pehē ange ʻa Maikolo, “Te u lotu au he ʻahó ni.”
Naʻe ʻohovale ʻa Hilamani. Naʻá ne kūnima, kuikui hono matá, punou hono ʻulú, pea fakafanongo lolotonga e lotu ʻa Maikoló.
Naʻe kamata ʻaki ʻe Makolo ʻene pehē, “ʻE Tamai Hēvani.” Naʻá Ne fakamālō kiate Ia koeʻuhí ko ʻenau meʻakaí peá ne kole ke Ne tāpuakiʻi ia. Naʻá ne fakaʻosi ʻaki e huafa ʻo Sīsū Kalaisí peá ne pehē, “ʻĒmeni.”
Naʻe pehē ʻa Hilamani mo Siaosi, “ʻĒmeni!”
Naʻe pehē ʻa Silivesitā, “ʻĒmeni. ʻIkai ke u ʻilo ʻokú ke lava ʻo lotu.”
Naʻe pehē ange ʻe Maikolo, “Naʻá ku ako ʻi heʻeku fanongo kia Hilamaní. Naʻá ku kole ki heʻeku mātuʻá ke u tāpuakiʻi ʻemau meʻakai ʻi ʻapí. Naʻá na ʻio mai, pea ne u lotu pē ʻo hangē ko ia ne fai ʻe Hilamaní.”
Naʻe pehē ʻe Silivesitā, “Tō atu. ʻOku ou fakakaukau mo au ke kole ki heʻeku mātuʻá ke u fai ʻemau lotu kaí.”
Naʻe pehē ange ʻe Siaosi, “Mo au pē!”
Naʻe malimali ʻa Hilamani. Naʻá ne fiefia ʻi heʻene lava ʻo tokoniʻi hono kaungāmeʻá ke ako ke fakataufolofola ki he Tamai Hēvaní. Naʻá ne ʻiloʻi naʻe ʻofa ʻa e Tamai Hēvaní ʻiate ia, pea naʻe ʻofa foki ʻa e Tamai Hēvaní ʻi hono kaungāmeʻá.
Ngaahi tā fakatātā ʻa Josh Talbot