Ewi wāween an Siedeh kar Peran
Siedeh ekar lukkuun mijak in kōnnaan n̄an ro uwaan kūlaaj eo an.
Siedeh ekar bōk kōtuwōn im deļo̧n̄ lowaan kūlaaj ruum̧ kāāl eo an. Ekar raan eo an jinoin tata ilo kūlaaj emān.
Iiō eo ļo̧k, Siedah ekar kūlaaj ruo. Elukkuun kar em̧m̧an an katak jon̄an jikuuļ eo an ekar kōtļo̧k bwe en eļļā wōt jān kūlaaj jilu. Siedeh ekar lukkuun em̧ōņōņō bwe emaron̄ kōm̧m̧ani jerbal ko an math repenļo̧k im riit eļapļo̧k bok ilo kūlaaj emān. Ak ejjab m̧ōņōņō bwe ej aikuj in etal jān ro kar m̧ōttan.
Ke ej reito reitak ipeļaakin ruum̧ eo, Siedeh ekar en̄jake an dik. Aolepān ro uwaan kūlaaj eo an āinwōt rekar rūttoļo̧k im aitokļo̧k jān e. Ta in im ejjab ekkar n̄an an kar pād ijo?
Ekar kāālet juon tebōļ im jijōt. Juon leddik aitok ekar jijōt tūrin. “Iakwe,” Siedeh ekar ba.
“Kwoj ta ijin?” leddik eo ekar kajjitōk. “Ij ba wōt kwon kar kūlaaj jilu.”
“Jikuuļ eo ekar kōwalōn̄ļo̧k n̄a juon kūlaaj,” Siedeh ekar mijak ilo an ba.
Leddik eo ekar kōnanaik mejān. “Ekwe, ijjab kea ewi jon̄an am̧ mālōtlōt. Kwoj juon nin̄n̄in wōt.”
Siedeh ekar en̄jake an nana an mour itulowa. Ilo aolepān wiik eo, ekar lukkuun mijak n̄an kōnono n̄an aolepān ro uwaan kūlaaj eo an. Aolep iien ej ron̄ an juon armej ettōn̄ ak unoojdikdik, ej jememe. Jon̄an ke rej ba men ko renana kōn e.
Ilo an kar ļōmņak ke aolep men reban nana ļo̧k, rekar bar karo̧o̧lļo̧k math teej eo an. Ekar kōņaan jan̄ ke ekar kalimjōk jikoor eo an. Kūlaaj in math ej em̧m̧an tata ippān. Ejan̄in kar ettā jon̄an eo ilo teej ko an m̧okta.
Ke ekar ro̧o̧l, Siedah ekar jab dāpij dān in kimjaaļaaļ ko an. “Ejjeļo̧k m̧ōtta,” ekar ba n̄an jinen im jemān. “Ijjab ekkar n̄an kūlaaj emān. “Ijjab lukkuun mālōtlōt.”
“Jolok bōd bwe elukkun pen,” jinen Siedeh ekar ba. “Bōtaab kwe kwoj mālōtlōt. Im kwoj ekkatak wōt.”
Siedeh ekar ir mejān. “In kar bar ro̧o̧l n̄an kūlaaj jilu.”
Jemān ekar jab keroro ilo jidik iien. “Kwoj ke kōņaan juon kōjeraam̧m̧an an priesthood?” ekar kajjitōk.
Siedeh ekar kōmakūtkūt bōran im ba aaet. Bōlen juon kōjeraam̧m̧an jān Baba emaron̄ jipan̄ leddik in em̧m̧anļo̧k an mour.
Siedeh ekar jijōt ioon juon jea, im Baba ekar likūt pā ko pein ioon bōran.
“Ij kōjeraam̧m̧ān eok bwe kwon jab mijak,” Baba ekar ba. “Im ij kōjeraam̧m̧an kwe n̄an iakwe ro uwaan kūlaaj eo am̧ ekāāl. Ilo aer jeļā kajeem, renaaj iakwe kwe barāinwōt.”
Juon en̄jake eo elūr ekar ajeeded ippān Siedeh. Ekar en̄jake bwe naan ko an jemān ekar ta eo Jemedwōj Ilan̄ ekar kōņaan bwe en ron̄.
Ālkin kōjeraam̧m̧an eo, M̧am̧a ekar jipan̄ Siedeh jerbale kajjitōk in math ko. Ālkin jidik iien ekar em̧m̧anļo̧k jidik an Siedeh mour.
Raan eo juon ilo jikuuļ, Siedeh ekar keememej kōjeraam̧m̧ane eo an im kajjieon̄ in peran. Ekar ettōn̄ n̄an ro uwaan kūlaaj eo an. Ke ekar kwaļo̧k iakwe, ekar dikļo̧k an mijak er! Jet iaer rekar lukkuun jouj. Ekar kate n̄an ekkatak, im tokālik ekar em̧m̧an grade ko an.
Ilo jemļo̧kin iiō in jikuuļ eo, Siedeh ekar lōn̄ bujin m̧ōttan. Ekar em̧ōņōņō bwe Jemedwōj Ilan̄ ekar jipan̄e n̄an peran. Im ekar m̧ōņōņō bwe ekar maron̄ pād kajoor in kōjeraam̧m̧an an priesthood n̄an jipan̄ e.
Kōmeļeļe ko jān Susan Keeter