”Jar, Helamán”
Ekar raan eo jinoin tata an Helamán jikuuļ. Ekar kanōke jin̄ūlij eo an em̧m̧an tata ippān, im ekar wōr an pinjeļ kāāl. Rūkaki eo an ekāāl ekar kōtļo̧k bwe en jijōt ilo juon tebōļ ippān ro m̧ōttan Sylvester, Jorge, im Miguel. Ekar juon raan em̧m̧an.
“Kakoni aolep men ko m̧weiūm̧,” Señora Martínez ekar ba. “Iien m̧ōn̄a in rālep.”
Baam̧le eo an Helamán aolep iien rej jar m̧okta jān m̧ōn̄ā. Ekar kajutak pein. “Señora Martínez, jej ke jar m̧okta jān ad m̧ōn̄ā?”
Señora Martínez ekar ettōn̄ dikdik n̄an Helamán. “Komaron̄ jar kōn m̧ōn̄ā eo kijōm̧ n̄e kwokōņaan.”
Helamán im ro m̧ōttan rej kōppeļļo̧ke m̧ōn̄ā in rālep ko aer.
“Ta in jar?” Sylvester ekar kajjitōk.
“Ej kōnono ippān Jemedwōj Ilan̄,” Helamán ekar ba. “Ej wāween ad kam̧m̧oolol E kōn m̧ōn̄ā ko kijed.”
“Komaron̄ ke jar n̄an kōjean̄ aolep?” Miguel ekar kajjitōk
Helamán ekar pokpā. Ro jilu m̧ōttan rekar barāinwōt pokpā. Helamán ekar kili mejān im jilļo̧k. Ro m̧ōttan rekar barāinwōt kōm̧m̧ane ejja āinwōt in.
Innām Helamán ekar jar, āinwōt an baam̧le eo an kōm̧m̧ane. Ekar kam̧m̧oolol Jemedwōj Ilan̄ kōn raan eo em̧m̧an rekar pād ie im kōn m̧ōn̄ā in rālep ko aer. Ekar kajjitōk kōjeraam̧m̧an n̄an m̧ōn̄ā ko kijeer. Ekar kōjem̧ļo̧k ilo etan Jisōs Kraist im ba, “Amen.”
Sylvester, Jorge, im Miguel rekar reilōn̄ļo̧k.
“Komaron̄ ba amen barāinwōt,” Helamán ekar ba.
Ro m̧ōttan rekar ettōn̄ dikdik im ba, “Amen.”
Raan eo juon ilo iien m̧ōn̄ā in rālep, Sylvester ekar ba, “Jar, Helamán.”
“Aaet, jar, Helamán,” Miguel ekar ba. Jorge ekar em̧ajidjid.
Innām Helamán ekar bar jar. Iien in ekar ba bwe ekar lukkuun kam̧m̧oolol bwe jinen ekar kōm̧m̧an kijen ham im cheese sandwich, eo im ennotata ippān. Ekar kajjitōk ippān Jemedwōj Ilan̄ n̄an jipan̄ er ekkatak ilo kūlaaj raan eo.
Kajjojo raan ilo iien m̧ōn̄ā in rālep, ro m̧ōttan Helamán rekar ba, “Jar, Helamán.” Im kajjojo raan, Helamán ekar jar. Ekar jar ippān ro m̧ōttan kajjojo raan ilo aolepān wiik eo.
Mande eo juon ilo bar ien m̧ōn̄ā in rālep, Miguel ekar ba, “Rainin inaaj jar.”
Helamán ekar bwilōn̄. Ekar pokpā, kili mejān, jilļo̧k, im ron̄jake ilo an Miguel jar.
Miguel ekar jino ilo an ba, “Jemedwōj Ilan̄.” Ekar kam̧m̧oolol E kōn m̧ōn̄ā ko kijeer im kajjitōk Ippān n̄an kōjeraam̧m̧ani. Ekar kōjem̧ļo̧k ilo etan Jisōs Kraist im ba, “Amen.”
“Amen!” Helamán im Jorge rekar ba.
“Amen,” Sylvester ekar ba. “Ikar jab jeļā komaron̄ jar.”
“Ikar ekkatak jān Helamán,” Miguel ekar ba. “Ikar kajjitōk ippān baba im mama n̄e imaron̄ jar ilo iien m̧ōn̄ā ko ilo m̧weo. Rekar ba aaet, innām ikar jar āinwōt an Helamán kōm̧m̧ane.”
“Wow,” Sylvester ekar ba. “Ij lōmņak inaaj kajjitōk ippān mama im baba n̄e imaron̄ jar ilo iien m̧ōn̄ā ko am barāinwōt.”
“Ba n̄a!” Jorge ekar ba.
Helamán ekar ettōn̄ dikdik. Ekar em̧ōņōņō ekar maron̄ jipan̄ ro m̧ōttan ekkatak n̄an kōnono ippān Jemedwōj Ilan̄. Ekar jeļā bwe Jemedwōj Ilan̄ ekar iakwe, im Jemedwōj Ilan̄ ej iakwe ro m̧ōttan barāinwōt.
Kōmeļeļe ko jān Josh Talbot