Kōjparok Kallim̧ur eo An

Jān Lucy Stevenson Ewell

Māākjiin ko an Kabun̄ in

(Pedped ioon juon bwebwenato em̧ool)

Iaar riabe Baba. Kiiō ta?

Bwebwenato in ekar bōk jikin ilo Ghana.

“Jiljino wōt raan m̧ae iien peptaij eo aō!” Happiness ekar ba. Raan eo enan̄in itok!

“Kopojak ke?” Baba ekar kajjitōk.

“Ij ļōmņak,” Happiness ekar ba.

“N̄e kwoj peptaij, kwoj kōm̧m̧ane juon bujen,” Baba ekar ba. “Kwoj ke keememej ta meļeļe in?”

“Ej juon kallim̧ur, ejim̧we ke?”

Baba eaar em̧ajidjid. “Aaet! Kwoj kallim̧ur n̄an ļoor Jisōs Kraist im kōjparok kien ko. Jemedwōj Ilan̄ ej kallim̧ur n̄an kōjeram̧m̧an im jipan̄ eok.”

Happiness ekar ettōn̄dikdik. Eaar jeļā ekar juon kallim̧ur aorōk. Ekar m̧ōņōņō in kōm̧m̧ani!

Ilo raan eo āliktata n̄an iien peptaij eo an. Happiness ekar jānij n̄an nuknuk ko remouj. Ruo bar ajri rekar bar peptaij. Raar aolep lale an booļ jikin peptaij eo.

Ke ej iien eo an, Happiness im jemān rekar deļo̧n̄e jikin peptaij eo. Jemān ekar ba jar in peptaij eo. Innām Happiness ekar pinej bo̧tin, im jemān ekar lelaļļo̧k e ium̧win dān eo.

Ke ej waļo̧ktok, Happiness ekar en̄jake m̧ōņōņō itulowa! Ekar kōņaan kōjparok kallim̧ur eo an n̄an ļoor Jisōs. Ekar kōņaan en̄jake erreeo in im m̧ōņōņō in indeeo. Ekar jab kōņaan kōm̧m̧an kālet ko rebōd.

Jejjo̧ raan tokālik, Happiness eaar jerkak im kejo̧ dān bwiļ eo bwe en maron̄ tutu. Ebōk iien aitok n̄an an dān eomānāān. Kōn menin Happiness ekar kōjo TV eo. Ekar kōņaan alooj pijaan cartoon m̧ōka ilo an kōttar.

Happiness ekar ettōn̄ ke ej alooje an menin mour ko kennaan ilo tv eo. Pija in ekar kam̧ōņōņō! Innām ekar meļo̧kļo̧k dān bwiļ eo.

Juon awa tok ālik, jemān ej deļo̧n̄tok ilo ruum̧ eo. “Ewi toon an dān bwiļ eo jo?” Eaar ba,

Happiness ekar reilōn̄ļo̧k. Ekar alooj TV aitokļo̧k jān an aikuj in kar!

“Ejjab to.” Happiness ekar ba, “Jejjo̧ wōt minit.” Ekar kune TV eo im etal im tutu.

Ak ilo aolepen raan eo, Happiness ekar būromōj ilowa. Ālkin peptaij eo an ekar kōņaan bwe en jab bar kōm̧m̧ani kāālet ko rebōd. Bōtaab ej kab m̧ōj an riabe Jemān!

Happiness ekar bōk kūtuwōn. Ekar jeļā ta eo ej aikuj kōm̧m̧ane

“Ekwe, Baba e,” Happiness ekar ba. “Ikar ba juon riab. Ekar to an dān bwiļ eo jo̧, ak ikar meļo̧kļo̧k e. Joļo̧k aō bōd.”

“Em̧m̧an wōt. Kom̧m̧ool kōn am̧ ba tok.” Jemān ekar ba

“Ikar būrom̧ōj kōnke ikar rubwe kallim̧ur in peptaij eo aō.” Happiness ekar ba.

Jemān ekar jijōt ippān Happiness ilo kauuj eo. “Ke kwaar peptaij, kwaar jab kallim̧ur n̄an wāppen. Kwaar kallim̧ur n̄an kajjieon̄ n̄an ļoor Jisōs.”

Happiness ekar em̧akjidjid. Bwe menin ekar kōm̧m̧an bwe en em̧m̧anļo̧k jidik an pād.

“Im kwojeļā ta eo kwomaron̄ kōm̧m̧ane n̄e kwoj kōm̧m̧an juon kālet ebōd?” Jemān ekar kajjitōk.

Happiness ekar ba, “ukweļo̧k?”

“Ejim̧we! N̄e jej ukweļo̧k, Jemedwōj Ilan̄ ej jeo̧rļo̧k ad bōd. Innām jemaron̄ bar erreeo āinwōt raan eo jaar peptaij. Ukweļo̧k ej m̧ōttan kallim̧ur in peptaij eo kwoj kōjparoke.”

Happiness ekar ettōn̄dikdik. “Ij tin jar im kajjitōk ippān Jemedwōj Ilan̄ n̄an jeo̧rļo̧k aō bōd.” Ekar m̧ōņōņō bwe emaron̄ kar kōjparok kallim̧ur in peptaij eo an.

Kōmeļeļe jān Macky Pamintuan