2023
Ettōr n̄an Meram eo
M̧aaj 2023

“Ettōr n̄an Meram eo,” Jera, Maj. 2023, 32–33.

Jera n̄an Jera

Ettōr n̄an Meram eo

Jān Elder Peter M. Johnson

Jān Jiljilimjuonn̄oul eo

Pija
Peter M. Johnson

Kakkobaba jān “Running toward the Light” (video), ChurchofJesusChrist.org.

Pija
Ļaddik eo ej ettōr ilo an kōņak pākpāk eo

Kōmeļeļe eo jān Adam Nickel

Ikar rūttoļo̧k ilo m̧ōttan eo ekauwōtata an juon jikin eļap. Juon raan ke ikar etal laļļo̧k n̄an jikuuļ kōn jet jāān ilo bōjo̧ eo aō. Jāān dōkā ko rekar etōn̄tōn̄ ke ikar etetal.

Ij aikuj in etetal eļļāļo̧k jān jet ļaddik ro rōrūttoļo̧k me raar pād ilo juon kāān̄. Iaar kajjieon̄ bwe in peran. Iaar kajjieon̄ jab mijak. Ak raar ron̄ ainikien etōn̄tōn̄. Raar kōņaan būki jāān ko im raar jino kepōļ eō.

Iaar ettōr jon̄an wōt aō maron̄. Iaar jāār ilo juon kōta. Ikar maron̄ lo meram eo ilo jemļo̧kin kōta eo, kōn menin iaar ettōrļo̧k n̄an meram eo. Ekar m̧ōkaj an bōjrak aer ļoor eō, im kar pād ilo ineem̧man.

Menin ekar erom juon jon̄ak n̄an mour eo aō. Iaar ettōr jān ta eo enana, im iaar pukot ta eo em̧m̧an. Jet iien ij ebbweer, ak ij kajjieon̄ wōt in pukot meram eo.

Ke iaar pād ilo college, iaar ikkure ilo tiim in basketball eo. Eiten aolep tiim eo aō raar uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ikar ekkatak kōn gospel eo jān er. Ikar ekkatak bwe n̄aij nejin Anij. Meļeļe bwe imaron̄ kar anjo̧ ioon apan̄ ko aō im em̧m̧anļo̧k. Iaar kobatok ilo Kabun̄ in. Jen iien eo, iaar kajjieon̄ kajjojo raan n̄an erom̧ āinwōt Jema Ilan̄ im Nejin, Jisōs Kraist. Im kwomaron̄ bar kōm̧m̧ane!

N̄e kwoj ettōr n̄an meram eo, ewōr kōjatdikdik. Kwojeļā kwoj ettōr n̄an kajoor, aenōm̧man, im lem̧ōņōņō. Jej aolep aikuj ettōr n̄an meram eo.

Basketball Elimo

Pija
m̧akūtkūt in basketball ko m̧wijiti

Elder Johnson eaar jeļā kōn gospel eo ke ekar ikkure basketball. Kiiō ej am̧ iien in!

  1. Mwijitļo̧k jukaae ko itulaļ im nuknukji bwe en erom booļ.

  2. Bōk an doon iien kadeļo̧n̄ bo̧o̧ļ ko ilo juon booļ.

  3. N̄e juon bo̧o̧ļ ej deļo̧n̄ ilo booļ eo, kōpeļļo̧k peba eo im uwaake kajjitōk eo!

  • Ta juon iaan wāween kwomaron̄ ļoor Jemedwōj Ilan̄?

  • N̄aat eo kwaar kālet jim̧we eo?

  • Elmen am lo meram eo an Jemedwōj Ilan̄ ilo mour eo am̧?

  • Ta eo ejipan̄ eok en̄jake iakwe eo an Jemedwōj Ilan̄?

  • Elmen am kwaļo̧k meram eo an Jemedwōj Ilan̄ n̄an ro jet?

  • Je kajjitōk ko am̧ make!

Būriin