“Jar eo an Makūtkūt in Laļ,” Jera, Maj. 2022, 4–5.
Jar eo an Makūtkūt in Laļ
Ke Violet ekar ruj, men otemjej raar em̧akūtkūt!
Bwebwenato in ekar bōk jikin ilo Peru.
Violet ekar kiki ke juon ainikin eļaaj ekar karuj e. Ilo jinoin, ekar ļōmņak ekar jourur.
Bōtaab ainikien eo eļaaj ekar ļapļo̧k im ļapļo̧k. Ekar idik wintō ko ilo ruum̧ in kiki eo an.
Violet ekar m̧ōkaj in jerkak. Ekar juon m̧akūtkūt in laļ!
E im baam̧le eo an rekar em̧m̧akūtļo̧k n̄an Peru ejjab to. Ekar jeļā bwe m̧akūtkūt in laļ ko ekkā aer waļo̧k ijin. E im baam̧le eo an rekar pojak n̄ani im kar kōmālmel ta eo n̄an kōm̧m̧ane. Bōtaab menin ekar kamijakļo̧k jān an kar lōmņak enaaj kar. Ej en̄jake an ānbwinin udidiid.
Violet ekar ettōrļo̧k n̄an jikin kōmat eo im etabōlbōl ium̧win tabōļ eo. Jejjo jekōn tokālik, ļaddik eo jatin im leddik eo jatin raar kobaļo̧k ippān. Barāinwōt Jinen im Jemān.
“Em̧m̧an bwe kom̧wij keememej ta eo jaar kamminene.” Baba ekar ba. “Ejet an aolep pād?”
Ļaddik eo im leddik eo jatin Violet raar em̧ajidjid.
Bōtaab Violet ekar mijak. Liin ekar kiil mejān. Ekar pen n̄an kejekdoon udiddiid eo iturin.
Violet ekar keememej n̄an jar. Liin ekar bokpā im jillo̧k. “Jemedwōj Ilan̄ jitōnbōro,” ekar unoojdikdik, “jouj im kōjparok baam̧le in aō.”
Violet ekar jar wōt. Eaar en̄jake āinwōt n̄e juon ekar atbokwuji. Ke ekar dedeļo̧k an jar, liin ekar reilōn̄ļo̧k. Jinen im jemān rekar pokpā. Ļaddik eo jatin im leddik eo jatin rekar bokpā barāinwōt. Raar aolep jar! Laļ ekab de kar udiddid. Ak Violet ekar en̄jake aenōm̧m̧an ilo būrowōn im kōļmenļo̧kjeņ.
Ilo jem̧ļo̧kin, ekar bōjrak an m̧akūtkūt. Violet im baam̧le eo an rekar pād wōt ium̧win tabōļ eo aitokļo̧k jidik, n̄an baj kōjparok.
“Ejet am̧ en̄jake?” M̧am̧a eo ekar kajjitōk ippān Violet.
“Em̧m̧an,” Violet eaar ba. “Ilo jinoin ikar kanooj in mijak. Bōtaab jar eo ekar jipan̄ kōkōm̧anm̧anļo̧k aō en̄jake.” Ekar atbokwoje jinen. Ekar m̧ōņōņō bwe Jemedwōj Ilan̄ ekar jipan̄ e en̄jake aenōm̧m̧an.
Kōmeļeļe ko jān Toby Newsome