“O Le Taumafataga o le Afiafi Faa-Ierusalema,” Uo, Ape. 2023, 4–5.
O Le Taumafataga o le Afiafi Faa-Ierusalema
Sa tulimatai atu Kitiona i lenei tu masani i tausaga uma.
O lenei tala sa tupu i le ISA.
O le aso a’o lumanai le Eseta. O lona uiga o le po nei o le a fai ai e Kitiona ma lona aiga le latou taumafataga o le afiafi faa-Ierusalema! Sa tulimatai atu Kitiona i lenei tu masani i tausaga uma. Sa ia moomoo maimau pe ana mafai ona latou faia i le tele o taimi i le tausaga. Ae na fai mai Tina e tatau ona latou faatali seia oo i le Eseta ina ia tumau ai pea lona faapitoa.
‘Sa fofola e Kitiona ma Amelia se palanikeke i luga o le fola mo tagata uma e nonofo ai. Ona alu lea o Kitiona e fesoasoani ia Tina ma Tama i meaai. Sa fiafia o ia e kuka. O le saunia o meaai o le vaega lea e sili ona fiafia i ai Kitiona.
O meaai uma o mea ia atonu na taumafaina e Iesu a o i ai o Ia i le lalolagi. Ioe, latou te le’i mautinoa lelei. Ae sa manaia le mafaufau e uiga ia Iesu o taumafa i nei meaai faatasi ma Ona soo i Ierusalema. O le mafuaaga lena na ta’ua ai e le aiga o Kitiona o se taumafataga o le afiafi faa-Ierusalema!
Sa ave e Kitiona se ato falaoa mafolafola ma se pesini o vine mago. Sa Ia tuuina i luga o le palanikeke. Sa i ai foi le meli e tuu i luga o le falaoa mafolafola. Na aumai e Amelia se fagu olive ma se ipu o moli ma sekati mago. Na sosoo ai ma sina sisi ‘oti ma kukama tipitipi. Ona sosoo lea ma se ipu i’a ma ipu vai. Sa matua faaeteete lava tamaiti i le aveina o meainu ina ia le masaasaa.
Sa saofafai faataamilo tagata uma i le palanikeke. Sa faia e Tina se tatalo o meaai.
“Faafetai i Lau Afio mo lenei taimi e manatua ai Iesu i le Eseta,” sa ia tatalo ai.
Ina ua uma le tatalo, sa pasi atu e tamaiti ipu meaai i le tasi ma le isi. Sa latou aveina ni moli ma ni kukama. Sa taofi e Kitiona le pepe mai le pa’u atu i olive. E taumamafa tagata uma i o latou tamāilima. Sa latou talanoa ma talie.
Sa tuu e Kitiona ni sisi ‘oti i luga o lana falaoa. Ona ia faaopoopo lea i ai o se meli. Sa matuā tofo lelei lava!
“O le a le tala e sili ona e fiafia i ai e uiga ia Iesu?” Sa fesili atu ai Tama i tamaiti.
“Ou te fiafia i le tala ia Iesu o loo savali i luga o le vai!” Sa fai atu ai Sullivan.
Sa tusi atu Kitiona i le ipu i’a. “Ma ou te fiafia ina ua Ia fafagaina tagata uma. Sa Ia fafagaina le faitau afe o tagata i ni nai potoi areto ma ni i’a. O le tala lena ou te fiafia lava i ai.”
“Ou te fiafia foi i na tala,” o le tala lea a Tina. “Ua faia e Iesu mea ia faigofie lea na le mafai ona tatou faia na o i tatou.”
“Ua tatou vaai foi i le tele o vavega i o tatou olaga,” o le tala lea a Tama.
“E pei o le auala tatou te maua ai ni uo fou i taimi uma tatou te siitia ese ai,”o le tala lea a Kitiona.
“Ioe,” o le tala lea a Tina. “E mafai ona tatou vaai i vavega ma faamanuiaga o siomia ai i tatou.”
Ina ua uma le taumafataga o le afiafi, sa latou maoona uma ma fiafia. Sa fesoasoani Kitiona e ave ipu i le faatanoa fuluipu. O le tausaga a sau, o le a latou toe faia ai se taumafataga o le afiafi faa-Ierusalema. Ae na te le’i tau faatali seia oo i lena taimi e mafaufau ai e uiga ia Iesu. E mafai ona ia faia lena mea i aso uma!
Ata na tusia e Tania Rex