“O Se Mea na Faateia ai i le Aso Sa,” Uo, Ape. 2023, 28–29.
O Se Mea na Faateia ai i le Aso Sa
“Tama, aisea e te le sau ai i le lotu faatasi ma ma’ua?”
O lenei tala sa tupu i Meleisia.
Sa fiafia Janarthn e alu i le lotu i vaiaso taitasi. Sa le’i manao o ia e misi se Aso Sa se tasi! Sa na o ia le tamaitiiti i lona aiga, o lea sa pei ai ana uo i le Peraimeri o ni ona tei. Sa fiafia o ia e aoao e uiga ia Iesu faatasi ma i latou ma usu pese faatasi ma i latou. Sa la o ma lona tina i le lotu, ae sa le’i alu lava lona tamā. O Tamā e le o se tagata o le Ekalesia.
I se tasi po i le taumafataga o le afiafi, sa fesili ai Janarthn, “Tamā, aisea tatou te le o ai i le lotu?”
Sa ea a’e Tamā mai lana ipu mafolafola. “Ou te pisi tele i Aso Sa.”
“Ae, Tamā, e taua le tausia o le paia o le aso Sapati,” o le tala lea a Janarthn. “O loo ta’u mai i tusitusiga paia.”
Sa te’i Tina. “Sa e faalogo moni lava i le taimi o au lesona i le lotu. Ae e le afaina le le sau o lou tamā ma i ta’ua. E fesoasoani o ia iai ta’ua i le tele o isi auala.”
A o sauni Janarthn e moe, sa ia mafaufau pe faape’i pe a sau Tama i le lotu. O nisi taimi sa ia lagonaina sina faanoanoa teisi pe a vaai i ana uo o nonofo faatasi ma o latou matua. Sa ia moomoo maimau pe ana i ai Tamā iina faatasi ma ia ma Tina.
A o le’i moe, sa tootuli Janarthn e tatalo. “Tama Faalelagi pele,” na ia fai atu ai, “faamolemole tuu atu i lo’u tama ia lava se taimi i Aso Sa ina ia mafai ona matou o faatasi ai ma Tina. Ou te fia nofo faatasi ma ia i le lotu.”
I se tasi Aso Sa i ni nai vaiaso mulimuli ane, sa valaau atu ai Tina ia Janarthn i lona potu.
“Ou te faamalie atu, ae e le mafai ona ta o i le lotu i le asō, o lana tala lea. “E le o lelei la’u faalogo.”
Sa faanunumi le pupula a Janarthn. “Ae o le a ou misia a’u uo ma le lesona i le asō. Ou te fia alu lava i le lotu.”
“Aua e te popole,” na fai atu ai Tina. “Ua na o le tasi lava le Aso Sa. Ma afai e te manao ai, e mafai ona ta valaau atu i lou faiaoga Peraimeri ina ia e iloa le mea o talanoaina i le lesona.”
Sa sogi Janarthn i le muaulu o Tina. “E le afaina. Fai sau malologa, Tina. Ou te iloa o le a silafia e le Tama Faalelagi le mafuaaga e le mafai ai ona ou alu i le lotu i le aso.”
Sa alu Janarthn i lona potu ma uu mai se kopi o le mekasini o le Uo . E tusa lava pe le mafai ona alu o ia i le lotu, e mafai lava ona ia faitau i tala e tausia ai le Sapati ia paia.
“Janarthn!” Na valaau mai ai Tamā.
Sa sau i fafo Janarthn mai lona potu. “O le a, Tamā?”
Sa ataata Tamā. “Fai ou lavalava. Ou te iloa lelei lou fiafia i le lotu, ma ou te le manao e te misi. O le a ta o.”
Na faaatoatoa le pupula a Janarthn. Sa le talitonu i ai o ia! Sa ataata tele o ia a o faanatinati atu e sauni.
I le lotu na faailoa atu ai e Janarthn ia Tamā i ana uo. Sa nofo Tamā i ona autafa i le taimi o le sauniga faamanatuga. Sa lagona e Janarthn le fiafia tele e faatasi ma lona tamā i le lotu!
Ina ua uma le lotu, sa fai atu Tamā, “O loo i ai se mea e tatau ona ou alu i ai. O le a ou pikiina oe pe a uma lau vasega Peraimeri, ua e iloa?”
“Lelei la,” na fai atu ai Janarthn. Sa ia moomoo maimau pe ana nofo Tamā, ae sa fiafia na sau o ia. Sa o se mea manaia tele na faateia ai i le Aso Sa!
Ata na tusia e Nadiyah Suyatna