‘Faavavau ma Taimi Uma,” Uo, Ape. 2023, 12–13.
Faavavau ma Taimi Uma
“Pe ou te toe vaai ea ia Rosie?” O le fesili lea a James.
O lenei tala sa tupu i le ISA.
Sa nofo James na o ia i luga o lona moega. Sa lagona le matuai saō o le fale. Sa ia misia lona tuafafine pepe, o Rosie. E le’i leva atu talu ona maliu o ia. Sa na o le lua vaiaso lona matua.
Sa maua atu e James ia Tina i lona potu. Sa ia tilotilo atu i le moega gaogao o Rosie. Sa ia faanoanoa ai.
“Tina,” sa ia fai atu lemu ai, “Ua ou misia lava Rosie.”
Sa ataata Tina, ae sa foliga faanoanoa foi o ia. Sa ia opoa James i se opo lapoa. “E faapena foi a’u.”
“Pe ou te toe vaai ea ia te ia?” O le fesili lea a James.
“Ioe,” o le tali lea a Tina. “E i ai se aso o le a tatou toe vaai uma ai ia Rosie.”
Sa taumafai James e vaai faalemafaufau ia Rosie i lona mafaufau. Sa ia mafaufau i lona lauulu kelikeli ma lima laiti. Sa alofa tele o ia ia Rosie. Sa fiafia o ia o le a ia toe vaai ia te ia i se aso. Ae i le taimi nei, sa ia faanoanoa ina ua leai o ia.
I ni nai aso mulimuli ane, ua oo i le taimi mo le afiafi faaleaiga. O nisi taimi e aoao atu ai e Tina po o Tama se lesona. O isi taimi sa la faia faatasi ai se mea manaia. Ae o le vaiaso lenei na fai mai ai Tama, “Tatou o e tietie taavale.”
Sa uu mai e Tina se tusi lapoa, ma sa latou o i totonu o le taavale. E le’i umi ae vaai James i se togalaau o tulipe piniki, lanumumu, ma sasama. Sa ia vaaia se fale umi, paepae ma se faatagata auro i le pito i luga. Sa i ai se lagona faapitoa i lenei nofoaga.
“E te iloa le mea o tatou i ai?” O le fesili lea a Tama.
“O le malumalu!” Na fai mai ai James.
“E sa’o oe,” o le tala lea a Tina. “O iinei na ma faaipoipo ai ma Tama.”
Sa latou o ese mai le taavale ma saofafai i luga o se nofoa umi. Sa tatala e Tina le tusi. Na vaaia e James se ata o le malumalu. Sa i ai foi Tina ma Tama i le ata. Sa ofu e Tina se ofu umi, paepae.
“E pei oe o se masiofo,” na fai atu ai James ia Tina. “Ma e foliga mai le malumalu o se olo.”
Na ataata Tina. “O le malumalu e sili atu le faapitoa nai lo o se olo. Ona o le malumalu, e mafai ai ona tatou faatasi ma o tatou aiga e faavavau.”
Sa susue e Tina le itulau. Sa tusi atu James i se ata o se pepe tama. “O a’u lena?” na ia fesili ai.
“Ioe,” o le tali lea a Tina. “O oe o se pepe lelei tele. Ua ou fiafia lava ua mafai ona ma faatasi ma oe e faavavau.”
Sa toe susue e Tina le itulau. Sa i ai i totonu se ata o Rosie.
“Rosie foi?” O le fesili lea a James.
“Rosie foi,” o le tala lea a Tama. “A oo i le taimi tatou te o atu ai i le lagi, e mafai ona tatou toe faatasi ma Rosie.”
“E faavavau?” na fesili atu ai James.
“E faavavau ma taimi uma,” o le tala lea a Tina. Sa ia susue atu i le itulau mulimuli. Na vaaia e James se ata o ia lava ma Tama, Tina, ma Rosie.
Sa tilotilo atu James i le malumalu. Sa ia misia Rosie. Ae sa fiafia o ia na faia e le Tama Faalelagi se ala mo lona aiga e faatasia ai e faavavau.
Ata na tusia e Hollie Hibbert