O le Feau Tusitusia Matuai, Leaga, [ma] Lē Lelei

Saunia e Chelsea Bagley Dyreng

(E faavae i se tala moni)

“Auoi leai!” Na fai mai ai Zack.

O lenei tala sa tupu i le ISA.

“Faamolemole, Rasela!” Sa aioi atu ai Zack i lona tuafafine matua. “Faamolemole toe taalo tasi lava ma i matou!”

“E le mafai, Zack. E i ai a’u meaaoga,” o le tala lea a Rasela. “Atonu sei oo taeao.” Sa savali atu o ia i fafo o le potu.

“Ua e le toe taalo lava ma a’u!” Sa fai atu ai Zack, ma se leotele teisi atu nai lo le mea sa ia manatu i ai.

“Zack,” na fai mai ai Tamā, “tuu o ia e fai lana meaaoga.” Na ia tufaina atu vaega eseese mo le taaloga a o faapalasi ifo Zack i lona nofoa. Sa foliga mai sa fai meaaoga lava Rasela i taimi uma . Ma o le tausaga a sau o le a i ai o ia i le kolisi! O le a tau leai sona taimi e vaai ai ia te ia.

“Zack, o oe,” o le tala lea a Tinā.

Sa faaminoi e Zack lana maa o le taaloga ma faatalitali mo le isi ona taimi. Na tilotilo atu o ia i le telefoni a Tina. Sa iai sona manatu. Na piki i luga e Zack le telefoni ma vave ona taina se feau tusitusia.

Talofa, Rasela. O oe o se tagata le alofa sili ona leaga ma lē lelei. Alofa, Zack.

Ia lena. Sa ataata Zack ma oomi le auina atu. Sa toe sosō ma nofo faalelei i lona nofoa. Ia o le manumalo loa i le taaloga.

I ni nai faasologa mulimuli ane, sa ī’ī le telefoni a Tina. Sa ia faitauina le lau.

“Oi, Zack?” o lana tala lea. “Ou te manatu e mo oe le feau tusitusia lea.”

Sa ataata Zack. Sa ia mafaufau po o le a le tali mai a Rasela. Sa ia ave le telefoni ma faitau le tesi.

Talofa, Zack. O oe o se atalii faalelagi o le Atua! Alofa, Sister Stewart.

Na faateia le mānava a Zack. “OI LEAI!” sa ia tau manavanava ai. “Oi leai, oi leai, oi leai!”

“O le a?” O le fesili lea a Tama.

E le’i tesi Zack i lona tuafafine o Rasela. Sa ia auina atu le feau tusitusia ia Sister Stewart! Rachel Stewart. Sa ia ta’u atu i le soa o auaunaga a Tina o ia o se tagata matuai, leaga ma lē lelei! Sa tanuma’i e Zack ona foliga i ona lima. Sa manao o ia e tolotolo i lalo o le laulau ma nofo ai iina mo le selau tausaga. Atonu e afe.

“O le a le mea ua tupu, Zack?” O le fesili lea a Tina.

“Sa ou auina atu se feau tusitusia le migao ia Sister Stewart nai lo Rasela. Ou te le’i faamoemoeina!” Sa vave ona toe tesi atu Zack ia Sister Stewart.

Faamalie atu, Sister Stewart. O lena feau tusitusia sa mo lo’u tuafafine.

Sa u e Zack lona laugutu, ma faatalitali mo sana tali. Pe o le a ita o ia? Sa agalelei tele Sister Stewart i tagata i taimi uma. Ae faapefea pe afai ua ia faatiga i ona lagona?

Sa ī’ī le telefoni a Tina.

Zack, ua ou faamagalo ia oe! Sa ou fiafia lava e faalogo atu ia te oe, e ui e le tutusa upu ma oe. Ua leva ona ou iloaina oe, ma ou te iloa o oe o se tama lelei o le a faia ni mea maoae i se aso. Atonu o le a e faia foi se mea maoae i le po nei!

Sa mapuea Zack. Sa lelei atili ona lagona i le taimi lena.

“O lelei mea uma?” O le fesili lea a Tina.

“Ou te manatu o loo lelei,” o le tala lea a Zack.

“Ua laki lou tesi ia Sister Stewart ae le o se isi tagata,” o le tala lea a Tina. “E vave lava ona ia faamagalo atu.”

Sa luelue le ulu o Zack. O Sister Stewart o se faataitaiga lelei. Ma sa ia iloa sa le tatau lava ona ia auina atu lena feau tusitusia, e oo lava i lona tuafafine. Sa ia iloa e taua le faaaoga o ana upu e fai atu ai mea lelei, ae le o le faatiga i isi.

Na ia tu i luga. “Ou te toe vave mai lava. E i ai se mea e tatau ona ou alu e ta’u atu ia Rasela!”

Ata na tusia e Mike Laughead