“Gaoioiga o leSau, Mulimuli Mai ia te A’u ,” Uo, Ape. 2023, 6–7.
Gaoioiga o le Sau, Mulimuli Mai ia te A’u
Mo afiafi faaleaiga, suesuega o tusitusiga paia, pe tau lava o se mea malie!
Ua Toetu o Ia!
Ata na tusia e Katy Dockrill
Mo le Eseta
Tala: O Iesu Keriso o lo tatou Faaola. Ona sa toetu o Ia, o le a taitasi foi i tatou ma toetutu (tagai 1 Peteru 1:3–4).
Pese: “Ua Toetu Iesu,” (Tusipese a Tamaiti, 44)
Gaoioiga: Fai le galuega taulima o le Eseta i le itulau 14. E mafai foi ona e amata le gaoioiga o le faitauga o aso i le itulau 8.
Fatu o le Faatuatua
Mo le Mataio 15–17; Mareko 7–9
Tala: Na aoao mai Iesu o le faatuatua itiiti e pei o se tamai fatu o le sinapi e mafai ona faia mea faigata (tagai Mataio 17:20).
Pese: “Faatuatua” (Tusipese a Tamaiti, 50–51)
Gaoioiga: Su’e le tele o fatu e te mafaia i fafo. Pe vaavaai mo ata i luga o le initoneti. Mafaufau po o a ituaiga laau e mafai ona latou tutupu a’e ai. E mafai faapefea ona tuputupu a’e lou faatuatua ia Iesu Keriso?
Alofa i Lou Pitonuu
Tala: Na ta’u mai e Iesu ia i tatou e tausi lelei o tatou tuaoi (tagai Luka 10:25–37). O tagata taitoatasi o loo siomia i tatou o o tatou tuaoi ia, e tusa lava pe ese o latou foliga po o amioga nai lo i tatou.
Pese: “Ou Te Savali Ma Oe” (Tusipese a Tamaiti, 78–79)
Gaoioiga: Tusi se ata o lou pitonuu. E mafai ona e faaaofia ai lou aiga, uo, ma tuaoi. O aso uma o lenei vaiaso, filifili se tagata mai lau atatusi ma fai se mea agalelei mo i latou.
O Le Leoleo Mamoe Lelei
Mo le Ioane 7–10
Tala: E tausia e leoleo mamoe a latou mamoe ma tausia i latou ia saogalemu. O Iesu Keriso o lo tatou Leoleo Mamoe. Na Ia fetalai mai, “O a’u nei o le leoleo mamoe lelei, ua ou iloa a’u mamoe” (Ioane 10:14).
Pese: “Le Alofa o Lo’u Faaola” (Tusipese a Tamaiti, 42–43)
Gaoioiga: Taaalo i se taaloga taumatemate o mamoe! Filifili se tagata e toatasi e avea ma leoleo mamoe. O isi tagata uma o le a avea ma mamoe. E moeiini mata o le leoleo mamoe a o faia e se tasi mamoe se leo baa . Tuu atu i le leoleo mamoe e mate mai po o ai o “mamoe” e ona le leo. Talanoa e uiga i le auala e silafia ai e Iesu i tatou taitoatasi i o tatou igoa.