“Aua Lava Le Fiu,” Uo, Ape. 2023, 39.
Tamaiti ma le Autalavou
Aua Lava Le Fiu
I le taimi o le malologa o le taumafanafana, sa ou alu ai i se vasega enisinia o masini ropati i le aoga maualuga e lata ane i lo’u fale. O a’u o se tasi o tamaitiiti aupito laitiiti i le vasega. I le aso muamua na tuu ai i matou e o matou faiaoga i ni vaega. I nei vaega sa matou aoao ai i le auala e faapolokalama ai masini ropati. O polokalama na mafai ai ona matou fatuina ni auala mo masini ropati e faamae’a ai ni paso. Sa faigata tele ona aoao, ma sa tele ni aso na faaalu ai e le matou vaega. I ni isi aso, sa le’i o mai tagata i le vasega, o lea sa na o a’u lava ma se isi tagata e toatasi e galulue i la matou galuega faatino.
I le aso mulimuli, sa tonu ai i faiaoga e fai se taaloga malie ma le vasega atoa. Sa latou tuuina atu i vaega taitasi le tai 20 makaloni mamago ma le tai 10 masimelo. Sa latou fai mai ia i matou e fai se olo sili ona maualuga. Sa na o le toalua tagata o la’u vaega i lena aso, o lea na sau ai se tagata mai se isi vaega e fesoasoani ia i ma’ua.
Ata na tusia e Macky Pamintuan
Sa matou galulue i le olo mo se taimi umi lava ma taumafai i le mea sili na matou mafaia. O le olo na matou fausia na foliga mai na fai si lautele tele ae le maualuga tele. Sa matou lagona e pei e mafai ona matou faia ia sili atu. Sa mananao la’u vaega e faamaamulu, ae sa ou fai atu, “Aua nei o tatou fiu.” Sa matou aveina uma makaloni mai i pito ma tuu i le pito i luga. Sa faasolosolo malie le tuputupu a’e o le matou olo!
Ona matou te le’i fiu, sa matou tutusa ai ma se isi vaega i le tulaga muamua. Sa ou aoaoina e tusa lava po o le a le faigata o mea e oo i ai, e le tatau lava ona tatou fiu!