“Sefuluai po o le Aisa Kulimi?” Uo, Ape. 2023, 10–11.
Sefuluai po o le Aisa Kulimi?
E mafai ona toe totogi e Katy i se taimi mulimuli, a ea?
O lenei tala sa tupu i le ISA.
Sa tuu e Katy ma lona tuagane o Christian a la uila i luga o le mutia.
“E te manao i se aisa kulimi i le faleoloa?” Sa fesili atu ai Christian.
“Ioe!” Na fai atu ai Katy. Sa vevela fafo, ma o le tietie uila sa o se galuega faigata. Sa logolelei le aisa kulimi!
Sa tamoe atu Katy i totonu. Sa ia mauaina le tamai ato lea sa ia teuina ai ana tupe. Ina ua ia tatalaina, sa faanonō ona foliga. Sa le’i lava sana tupe mo se aisa kulimi.
Ona ia tilotilo atu lea i le fagu tupe i luga o lana fata. Sa ia teuina lana tupe o le sefuluai iina e avatu ai i le epikopo. Sa lava se tupe mo se aisa kulimi iina!
Sa ave e Katy ni tupe mai lana fagu sefuluai. Ona la faatopetope atu lea ma Christian i le faleoloa ma piki ia ituaiga sa la mananao ai. Sa lagona e Katy sina tausalaina a o ia etoeto lana aisa kulimi sukalati. Ae sa le’i tele se tupe na ia aveesea. E mafai ona ia toe totogia i se taimi mulimuli.
I ni nai vaiaso mulimuli ane, sa toe alu ai Katy e aumai se aisa kulimi. Sa le’i lava pea ni ana tupe, o lea sa ia aveina ai sina isi tupe mai lana fagu sefuluai. O le a ou toe totogia foi lenei tupe, sa ia fai ifo ai ia te ia lava.
Sa faaauau pea ona aveina e Katy tupe mai lana fagu sefuluai. Sa ia folafola atu i taimi uma e toe totogi mai. Ae sa faigata ona manatua le aofaiga sa ia aveina. Ma sa le’i lava ni ana tupe e totogi ai.
E le’i umi ae oo i le taimi o le faatalanoaga faaiu o le sefuluai a lona aiga. O le a latou feiloai ma Epikopo Leavitt. O le a ia fesili atu ia i latou taitoatasi pe na latou totogiina se sefuluai atoa i tupe uma na latou maua i lena tausaga.
I lena Aso Sa, sa tuu ai e Katy le vaega o totoe o lana sefuluai i totonu o se teutusi ma avatu i le epikopo. Ae sa ia iloaina e le lava. Sa le lelei le faalogo i lona manava.
Mulimuli ane, sa nonofo faatasi le aiga o Katy i le ofisa o Epikopo Leavitt.
“O oe o se tagata e totogi atoa le sefuluai?” Sa fesili atu Epikopo Leavitt ia Christian.
“Ioe!” Na fai mai ai Christian.
Sa feminoia’i Katy i lona nofoa. Mata e afaina le ta’u atu ia te ia o ia foi o se tagata e totogi atoa le sefuluai? Na te le’i totogia atoa lana sefuluai ae, o le a ia totogiina!
“O oe o se tagata e totogi atoa le sefuluai?” Na fesili atu ai Epikopo Leavitt ia Katy.
Sa tilotilo i lalo Katy. E sese le pepelo.
“Leai,” sa ia fai atu lemu ai. “Sa ou faaaogaina nisi o a’u tupe o le sefuluai e faatau ai aisa kulimi.”
“Ou te iloa e faafetai le Tama Faalelagi mo le sefuluai sa e totogiina. Ma a tatou faia se filifiliga sese, e mafai ona tatou salamo ma toe taumafai ia lelei atili.” Sa ataata atu Epikopo Leavitt ia Katy. “Ou te iloa o le a e taumafai e totogi atoa lau sefuluai i le lumanai.”
Sa lue atu le ulu o Katy. Sa manao o ia e avea ma se tagata e totogi atoa le sefuluai!
O le isi taimi na ia maua ai se tupe, na tuu ai e Katy le 10 pasene i lana fagu sefuluai. Ona ia toe tuu lea i totonu o se faasiliga. Pe ua lava lea e totogi ai tupe sa ou aveina? sa ia tomanatu ai. Sa ia faaopoopo nisi tupe, ne’i le lava.
Ae sa ia lagonaina pea le tausalaina. Atonu e mafai ona ia totogia ni sefuluai faasili seia ona lagonaina ua ia totogiina atoa. Sa ia tuu lona ulu i ona lima.
Sa sau Tina i totonu o le potu. “O le a le mea ua tupu?”
Sa mapuea Katy. “Ou te le iloa po o le a le tele o le sefuluai e manaomia ona ou totogiina e faaatoa ai mea sa ou faaaluina.”
Sa tuu atu e Tina se opo ia Katy. “Ua ou fiafia ua e manao e faaleleia au mea sese,” o lana tala lea. “Ae o nisi taimi e manaomia ona tatou amata i le mea o loo tatou i ai ma toe taumafai. O le a faamagalo i tatou e le Tama Faalelagi pe a tatou faia le mea sili tatou te mafaia e salamo ai.”
E sa’o lea? E oo lava i lana mea sese o le sefuluai?
Ina ua alu ese Tina, sa tatalo Katy. “Tama Faalelagi, ou te faamalie atu ou te le’i totogia atoa la’u sefuluai. Ou te manao e toe totogi, ae ou te le iloa po o le a le aofai o la’u aitalafu. E mafai ona E faamagalo mai ia te a’u ma tuu mai ou te toe amata ma toe taumafai?”
Sa lagona e Katy le toafilemu. Sa logolelei le ole atu mo se faamagaloga. Sa ia iloa o le a fesoasoani le Tama Faalelagi ia te ia ia faia ia sili atu mai lena taimi!
Ata na tusia e Matt Smith