“Aapa atu mo Mars,” Uo, Ape. 2023, 40–41.
Aapa atu mo Mars
Sa i ai se misiona a Michelle. Ma na amata uma lava i le aoaoina.
O lenei tala sa tupu i le ISA.
Sa asu e Michelle pateta i luga o lana ipu mafolafola. Na tilotilo solo o ia i le laulau i lona aiga. O ia o le uii o le fanau e toa 10, ma o nisi o i latou ua i ai i le kolisi i le taimi nei. Sa fiafia o ia e faalogo o latou talanoa e uiga i mea sa latou aoaoina.
“O le a se mea e te manao e suesue pe a e alu i le kolisi?” o le fesili lea a lona tuagane. Sa suesue o ia ina ia avea ma se enisinia.
“Ou te le’i iloa tonu lava,” o le tala lea a Michelle.
“E mafai foi ona avea oe ma se enisinia,” na ia fai atu ai ia te ia. “E te atamai tele.”
Sa fiafia Michelle i lena manatu. Na fiafia o ia i le matematika ma le saienisi. Sa lelei ai foi o ia. Sa ia iloa e finagalo le Atua ia te ia e aoao. Ma sa ia iloa o le a fesoasoani o Ia ia te ia.
Ina ua matua Michelle, sa alu o ia i le kolisi e avea ma se enisinia. Sa ia galue malosi ia aoaoina. Sa faigata nisi o vasega. Ae sa le’i fiu ai lava Michelle.
A o i ai o ia i le kolisi, sa ia faasoa atu le talalelei i lana uo aoga o Ioane. Mulimuli ane, na faaipoipo i la’ua i le malumalu. Sa faauu Michelle ma maua lona faailoga o le Matuaofaiva. Na avea o ia ma se tina. Sa ia maua foi lana galuega na moemiti i ai o le fesoasoani lea e tatalaina loketi i le suesueina o le vateatea! Sa avea o ia ma taitai ma na faatulaga galuega faatino mo lana vaega.
I se tasi aso na fai atu ai le pule a Michelle ia te ia e galue i se galuega faapitoa. O le a ia fesoasoani e fausia se masini otometi e ta’u o le masini fealua’i e auina atu i Mars. Na fiafia tele Michelle! Mo le tele o masina, sa ia fauina ni masini fou ma faia ni faataitaiga.
Ae ina ua toeitiiti atoa le tausaga talu ona galue o ia i le masini fealua’i i Mars, sa maua ai e Michelle ma lona toalua se valaau faavitio taua. O se valaau mai ia Peresitene Henry B. Eyring. “Matou te fia valaaulia oulua e avea ma taitai misiona,” na saunoa ai Peresitene Eyring. “E te lua taliaina lenei valaauga?”
Sa fetilofa’i Ioane ma Michelle i le tasi ma le isi. O le auauna atu i se misiona o lona uiga o le a tuua e Michelle lana galuega na miti i ai. O le a ia misia le tatalaina o le masini fealuai i Mars! Ae sa ia iloa o le auauna atu i le Alii sa sili atu ona taua. Ina ua papatisoina o ia, sa ia folafola atu e faia soo se mea na Ia poloai mai ai.
“Ioe,” o lana tala lea. Sa lue atu le ulu o lona toalua. “O le a ma auauna atu.”
I ni nai vaiaso talu ona amata le misiona a Michelle ma Ioane, sa tuuvaa ai se loketi na aveina le masini fealua’i i Mars. Sa le’i matamata ai Michelle. Na ia faia isi mea taua. Sa ia faasoa atu le talalelei ma fesoasoani i faifeautalai i la latou misiona. O aso uma lava, na te laeiina ai se pine igoa uliuli na faapea mai “Sister Amos,” ma le suafa o le Faaola i lalo ifo.
Ina ua mavae le fitu masina, sa iu ina taunuu atu le loketi na aveina le masini fealua’i i Mars—e silia ma le 100 miliona maila (160 miliona km) le mamao. Na maua e Sister Amos le faatagaga e matamata ai i le tulaueleele i luga o le initoneti. Sa ia valaaulia foi a latou faifeautalai e matamata.
Sa popole Sister Amos. Sa galulue malosi o ia ma le toatele o isi i lenei galuega faatino! Mata o le a taunuu saogalemu le masini otometi?
Sa taunuu saogalemu! Sa alalaga fiafia faifeautalai uma. Ona faasoa mai lea e Sister Amos o lana molimau. “Na foafoaina e Iesu Keriso lalolagi e aunoa ma se gataaga,” o lana tala lea. “Sa Ia faia fetu, o paneta, ma le atulaulau atoa. E finagalo o Ia ia tatou aoao, tuputupu a’e, ma faaaoga a tatou taleni mo le lelei.”
Sa ataata o ia. Sa faafetai o ia mo auala na taitai ai o ia e le Atua i lona olaga. Ma sa faafetai o ia i le avea ai ma se faifeautalai—i le faasoaina atu o Lona alofa ofoofogia.
Ata na tusia e Alyssa Tallent