“Hoknaet mo Wel Fis,” Fren, Mei 2023, 8–9.
Hoknaet mo Wel Fis
?Olsem wanem bae ol peinting blong Dieter i helpem ol narawan?
Stori ia i hapen long Kanada.
Dieter i wantem blong lisin long jeneral konfrens. Hem i bin traem blong sidaon kwaet. Hem i traem blong lisin long ol toktok. Be hem i gat sik long saed blong tingting mo hemia i mekem i had long hem blong fokas. Hem i tantanem hem long jea. Hem i pleplei wetem ol pleiplei blong hem. Hem ronron olbaot.
Afta hem i lukluk i go long Papa. Papa i stap sidaon kwaet mo i stap lisin long olgeta we oli stap givim toktok. Dieter i wantem blong kam olsem hem. Mekem se hem i karemaot ol art saplae blong hem. Ating sapos hem i kalarem wan pikja, bae i helpem hem blong sidaon kwaet.
Taem hem i stap kala, Dieter i lisin long Elda Jeffrey R. Holland i toktok. Elda Holland i talem wan stori abaot Jisas. Jisas i askem wan rij man blong givim evri mane blong hem long olgeta we oli pua.*
Dieter i wantem blong helpem ol pipol we oli nogat inaf mane tu. Mo afta, hem i gat wan aedia.
“Mama, mi wantem pentem wan hoknaet,” Dieter i talem. “?Yu save droem wan blong mi?”
“Yes,” Mama i talem. Hem i droem wan hoknaet.
Dieter i draonem peintbras blong hem long sam peint. Hem i pentem ol wing blong hoknaet ia fastaem. Hem i mekem sam feta i braon mo sam i orenj. Taem hem i peint, hem i lisin long ol nara toktok. Nomata we evri toktok i finis, Dieter i gohed blong stap wok. Hem i wantem hoknaet ia blong i stret evriwan.
Dieter i finis. Hem i soem hoknaet long Mama.
“!Hem i luk naes!” Mama i talem. “?Bae yumi hangem antap?”
Dieter i sakem hed blong hem se no. “Mi wantem salem mo givim mane blong hem blong helpem ol pipol we oli nogat inaf mane. Olsem we oli tokbaot long konfrens.”
Mama i smael. “Bae yumi luk wanem yumi save mekem.”
Hem i postem pikja blong peinting blong Dieter blong salem onlaen. Mama i raetem se Dieter i wantem blong givim mane long wan ples blong ol pipol we oli nogat hom.
Long nekis dei, Dieter mo Mama i jekem post blong hem. !Dieter i no save bilivim! Plante man oli wantem pem pikja blong hem. Hem i glad tumas se fulap man oli wantem blong help.
Wan ples blong kakae long siti blong Dieter i askem blong pem peinting ia. Oli talem se !bae oli pem 10 taem moa bitim wanem we Dieter mo Mama blong hem i askem! Ol nara stoa oli askem hem from ol peinting tu. !Dieter i gat fulap wok blong mekem!
Mama i droem sam moa animol, mo Dieter i karemaot ol peint blong hem. Hem i pentem wan wael dog, wan laeon, mo wan wel fis. Hem i laekem wel fis moa bitim evri wan. Hem i putum nem blong peinting ia “Otis Wel Fis.” Wan stoa blong salem kaekae kolosap long haos blong hem i bin pem. Nekis taem we Dieter i go long stoa, !hem i luk i stap hang long wol!
“!Luk mama!” Dieter i poen i go long peinting.
“!Waw!” Mama i talem. “Naoia, eni taem yumi kam long ples ia, bae yumi tingbaot olsem wanem talen blong yu i bin helpem ol man.”
Dieter i glad tumas se ol man oli laekem ol peinting blong hem. Be hem i glad moa se hem i save helpem ol narawan. Hem i glad se hem i bin lisin long taem blong jeneral konfrens.
Ol pikja droing oli kam long Natalie Campbell