“Tempol Open Haos,” Fren Mei 2023, 16–17.
Tempol Open Haos
!Svetan i glad tumas blong go insaed long tempol!
Stori ia i tekem ples long YSA.
Svetan i filim glad tumas. Famli blong hem i muvaot long Ajentina i go long Yunaeted Stet. !Mo naoia hem i taem blong go long bigfala plen!
Svetan i lukluk aotsaed long windo taem plen i flae aot. Hem i stap tingting long hemwan se bae niu hom blong hem i olsem wanem. Evri samting bae i defren. Wan niu haos. Wan niu bedrum. Ol niu neba. !Mo ol niu fren blong mitim olgeta! Svetan i glad tumas.
Svetan i save tu se niu hom blong hem i kolosap long wan tempol we oli jes bildim nomo. Long Ajentina, tempol i stap long we. Hem i bin luk long ol foto nomo.
Svetan i tanem hem i go long Mami. “?Yu ting se bae yumi save luk tempol taem yumi stap antap long skae?”
Mama i smael. “Mi no ting. Be bae yumi luk i no longtaem.”
Svetan i smael i gobak. Mami mo Papi i talem se tempol i no open yet. Be bae i no longtaem, bae i gat wan open haos. Hemia i minim se ol pipol oli save go insaed blong lukluk bifo oli dediketem. !Mo bae famli blong Svetan i go long open haos! Hem i no save wet blong luk tempol tru.
Sam aoa afta, Svetan mo famli blong hem oli stap long niu haos blong olgeta. I gat fulap samting blong mekem. Svetan i help blong openem mo karemaot ol bokis blong olgeta mo mekem hom blong olgeta i luk naes.
Long dei bifo oli mekem open haos, oli sidaon long siting rum blong toktok.
“Tempol hem i haos blong Lod,” Mami i talem. “Taem yumi stap insaed, yumi mas revren. ?Yu save hemia i minim wanem?”
“Blong toktok kwaet mekem se yumi save harem Tabu Spirit moa gud?” Svetan i askem.
“Hemia i stret,” Mama i talem. “Yumi save lanem fulap samting taem yumi stap insaed long tempol.”
Svetan i sakem hed blong agri. Hem i wantem blong stap revren blong mekem se hem i save filim Tabu Spirit insaed long tempol.
Long nekis moning, Svetan i wekap eli. Hem i jenis long ol klos blong hem blong Sandei. Kolosap hem i taem blong go.
Famli blong Svetan i go long tempol. Ol pipol oli helpem olgeta blong putum ol smol plastik kova ova long sus blong olgeta.
“?From wanem oli putum ol smol bag ia long leg blong mi Mami?” Svetan i askem.
“From se insaed long tempol, evri samting i niu mo i klin. Yumi wantem blong lukaotgud long olgeta.”
Wan woman i welkamem olgeta. Hem i ridim ol toktok long doa blong tempol: “Tabu Fasin long Lod— Haos blong Lod.”
Svetan i holem han blong Mami. Oli wokbaot i go insaed. !Evri samting i naes tumas! Ating heven i filim olsem nao.
“!Luk!” Svetan i talem kwaet. Hem i poenem wan peinting. “!Jisas hemia long we!”
Taem oli finis, Svetan i filim hapi. Hem i talem tangkyu we hem i save go insaed long tempol. Hem i wantem blong go insaed bakegen taem hem i kam moa bigwan.
Ol pikja droing oli kam long Mark Robison