“Cameron We I Stap Plei Piano,” Fren, Mei 2023, 40–41.
Cameron We I Stap Plei Piano
Cameron i no bin save olsem wanem blong plei piano, be hem i wantem blong help.
Stori ia i tekem ples long YSA.
“Mi pikinini blong God,” Cameron i singsing wetem ol nara pikinini blong Praemeri. Cameron i no save harem gud samting, be hem i laekem blong singsing. Mo i no long taem, bae oli singsing long program blong Praemeri. !Wan manis nomo i stap!
Taem taem blong singsing i finis, Sista Jones i mekem wan anaonsmen. “Man blong plei piano blong Praemeri blong yumi, bae i muv i no long taem. Bae mifala i laekem tumas blong gat sam long yufala i plei piano blong program blong Praemeri. ?Eni wan long yufala i glad blong plei wan o tu singsing?”
Cameron i leftemap han blong hem. Hem i wantem blong help wetem program.
Sista Jones i raetemdaon ol nem blong ol pikinini we oli wantem blong help. “Emma. Ben. Mo !Cameron! Mi no bin save se yu save plei piano.” Hem i smael.
Cameron i neva tekem klas blong lanem piano bifo, be hem i laekem blong mekemap ol singsing long piano long haos blong bubu woman blong hem.
“Mi no plei gud tumas yet,” hem i talem. “!Be mi ting se mi save mekem sapos mi praktis!”
“Tangkyu blong wantem givim seves wetem gladhat,” Sista Jones i talem. Hem i givim tu singsing long wanwan pikinini blong plei long hem.
Cameron i filim se hem i wantem ron long ol holwei. Oltaem hem i bin wantem lanem, mo naoia, !bae hem i lanem!
“!Yu hapi we! ?Wan samting i hapen long Praemeri?” Mama i askem taem oli stap go insaed long trak afta long jos.
Cameron i smael. “!Bae mi plei piano blong program blong Praemeri!”
“Mi laekem tumas se yu wantem blong help,” Mama i talem. “Be yu no save olsem wanem blong plei gud inaf blong yu plei long program.”
Cameron i sidaon stret. “Mi save lanem. !Bae mi praktis strong! Mi save yusum piano blong bubu woman.”
“!Sapos i olsem, !yumi mas stat blong lanem nao!” Mama i talem.
Mama i helpem Cameron blong faenem wan piano tija. Tija i soem long hem ol simpol wei blong plei “I Love to See the Temple” mo “The Church of Jesus Christ.”
Cameron i praktis long haos blong bubu woman blong hem, plante taem olsem we hem i save mekem. Hem i praktisim wanwan laen blong ol singsing ia, bakegen mo bakegen. Hem i bin mekem plante mistek, be hem i gohed blong traem mo i gohed blong plei. Long en, hem i bin save plei tugeta singsing.
Kolosap bae hem i taem blong program blong Praemeri. “?Yu filim olsem wanem?” Mama i askem.
Cameron i holemtaet strong piano buk blong hem long jes blong hem, “Mi fraet. Be mi hapi tu.”
Taem i taem blong hem blong plei, ol han blong Cameron i seksek lelebet. Papa long Heven, plis helpem mi, hem i prea insaed long maen blong hem. Hem i pulum gud win blong hem. Afta hem i plei i gud we i gud olsem we hem i save mekem. Ol nara pikinini oli singsing folem hem.
Long en blong singsing, hem i smael. !Hemia i naes tumas! Hem i bin save se Tabu Spirit i stap helpem hem.
Naoia we hem i bin plei wan singsing finis, Cameron i filim moa tras long hemwan. Hem i statem nambatu singsing. Ol fingga blong hem i muvmuv krosem ol kibod semmak nomo olsem we hem i bin praktisim.
Singsing ia i fevret singsing blong Cameron. Hem i tingting long ol toktok blong singsing ia taem hem i stap plei. “Mi biliv long Sevya, Jisas Kraes. Mi givim ona long nem blong hem.” Cameron i bin wok had blong lanem ol singsing blong program ia.
Ating blong stap plei piano i wan wei blong stap serem testemoni blong mi, Cameron i tingting.
Afta long program, Mama i givim wan bigfala hag long Cameron.
“?I bin olsem wanem?” hem i askem.
“Mi bin fraet fastaem, !be mi bin laekem!” Cameron i talem. Hem i wantem blong gohed blong stap praktis mo lanem sam moa singsing.
Ol pikja droing oli kam long Adam Koford