“Ol Aktiviti blongKam Folem Mi ,” Fren, Mei 2023, 10–11.
Ol Aktiviti blong Kam Folem Mi
!Blong famli haos naet, skripja stadi, o blong gat wan gud taem!
Stap Soem Fasin blong Talem Tangkyu
Ol pikja droing oli kam long Katy Dockrill
Stori: Ridim stori blong “Wan Man We I Talem Tangkyu” long pej 46. ?Olsem wanem nao yu save soem tangkyu?
Singsing: “Thanks to Our Father” (Children’s Songbook, 20)
Aktiviti: Katemaot 10 pis blong pepa. Long wanwan pis pepa, raetem wan samting we yu talem tangkyu from. Joenem ol pis pepa raon long olgeta mo glu o skojem ol en tugeta blong mekem wan jen. Hangem jen blong tangkyu blong yu long wan ples we yu save stap luk oltaem.
Supahiro blong Givim Seves
Blong Matiu 19–20; Mak 10; Luk 18
Stori: Jisas Kraes i tijim se yumi mas helpem ol pipol we oli stap long nid (luk long Mak 10:17–22). Ridim “Hoknaet mo Wel Fis” long pej 8 blong lanem olsem wanem wan boe we nem blong hem Dieter i folem Jisas.
Singsing: “Keep the Commandments” (Children’s Songbook, 146–47)
Aktiviti: Go long pej 12 mo !kam wan supahiro blong givim seves!
Tri We I Stap Lisin
Blong Matiu 21–23; Mak 11; Luk 19–20; Jon 12
Stori: Sakias i bin wantem blong luk Jisas, be ol man oli fulap tumas mo hem i no save lukluk. Sakias i klaem wan tri blong mekem se hem save luk mo harem Jisas moa gud. (Luk long Luk 19:2–8.)
Singsing: “Sapos Mi Lisin wetem Hat blong Mi” (Music for Children, https://www.churchofjesuschrist.org/study?lang=bis)
Aktiviti: !Mekem wan tri blong han! Long wan pis pepa, raet folem han blong yu. Han blong yu bae hem i stamba blong tri mo ol fingga blong yu bae oli ol branj. Raon long wanwan branj, raetem o droem ol wei we yu save lisin long Jisas.
Wan Misinari Naoia
Blong Josef Smit—Matiu 1; Matiu 24–25; Mak 12–13; Luk 21
Stori: Jisas Kraes i talem se bifo Hem i kam bakegen, bae oli prijim gospel long ful wol (luk long Josef Smit—Matiu 1:31). Yumi save help blong rere from Seken Kaming taem yumi stap serem gospel wetem ol narawan.
Singsing: “I Hope They Call Me on a Mission” (Children’s Songbook, 169)
Aktiviti: !Mekem misinari nem tag blong yuwan! Raetem nem blong yu long wan pis pepa mo katemaot. Biaen long hem, raetem wan samting we yu save mekem blong serem gospel naoia. Pinim o skojem nem tag blong yu long set blong yu.
Ol Leg blong Givim Seves
Blong Matiu 26; Mak 14; Jon 13
Stori: Jisas Kraes i wasem ol leg blong ol disaepol blong Hem (luk long Jon 13:4–16). Hem i lavem olgeta mo wantem blong givim seves long olgeta. Jisas i talem long olgeta blong folem eksampol blong Hem mo givim seves long wanwan long olgeta.
Singsing: “‘Give,’ Said the Little Stream” (Children’s Songbook, 236)
Aktiviti: Pleplei gem ia blong givim seves. Evriwan i sidaon mo putumaot leg blong olgeta long wan sekol. Wan pleya i jusum wan namba. Statem wetem leg blong olgetawan, pleya ia i poenem wanwan leg long sekol ia mo i stat kaon long namba we hem i jusum i go daon kasem “wan.” Leg ia we namba blong hem i foldaon long “wan” bae i aot. Afta, pleya ia i jusum wan namba mo kaon i go daon bakegen. Las man we i gat wan leg insaed long sekol, bae i jusum wan seves aktiviti blong grup i mekem.