“Tempol Merikel blong Jimena,” Fren, Mei 2023, 36–37.
Tempol Merikel blong Jimena
Jimena i bin fraet. Be hem i save se bae Lod i helpem hem.
Stori ia i hapen long Gwatemala.
Jimena i klaem i go insaed long trak mo putum strap blong jea blong hem. Hem mo papa mo mama blong hem oli stap go long tempol. Hemia bae i fas taem blong hem blong mekem ol baptaes long tempol. Papa bae i baptaesem hem long bihaf blong sam bubu blong olgeta we oli ded finis. !Jimena i no save wet!
Be afta, Jimena i tingbaot wan samting we i mekem hem i fraet insaed. “Papa,” hem i talem, “?be afta pam blong mi?”
Jimena i gat taep 1 blong sik suga. Blong stap helti, oltaem hem i werem wan smol lektronik tul we oli singaotem wan insulin pam, we i stap help blong kontrolem ol level blong suga long blad blong hem. Sapos hem i no werem pam ia blong wan longfala taem, bae hem i filim sik.
“?Bae oli letem mi blong werem insaed long tempol?” Jimena i askem. Hat blong hem i stap pam kwik. “?Olsem wanem taem bae mi go insaed long wota?”
“Bae hem i Oraet,” Papa i talem. “Yu save werem pam blong yu kasem taem we i taem blong yu go insaed long wota. Afta mama i save helpem yu blong putumbak kwiktaem taem yu kam aot stret long wota.”
Mama i sakem hed blong hem se yes. “Mo sapos yu stat blong filim sik taem yu stap mekem ol baptaes, talem nomo long Papa mo yu save stop.” Mama i skwisim han blong hem. “Bae mifala i stap wetem yu oltaem.”
“Okei,” Jimena i talem. Hem i stil filim fraet. Be mama mo papa i bin helpem hem blong filim gud smol moa.
Taem oli kasem tempol, Jimena i holem han blong papa mo mama taem oli wokbaot i go from ol doa blong tempol. Taem hem i stanap nomo i go insaed, Jimena i filim wan wom filing we i gat kamfot. Hem i save se Tabu Spirit i stap talem long hem se Papa long Heven bae i helpem hem, nomata se hem i fraet. Evri samting bae i Oraet, olsem we Papa i talem.
Jimena i jenis long ol waet klos. Afta mama i helpem hem blong tekemaot pam blong hem. “Bae i tekem sam minit nomo,” mama i talem. Hem i haggem Jimena.
Jimena i wokbaot i go insaed long wota. Papa i stap wet long hem. Hem i pusum han blong hem i kam mo helpem Jimena i wokbaot i go daon long ol step.
Papa i talem prea blong baptaes mo i draonem Jimena andanit long wota. Taem hem i kambak antap, Jimena i smael. Afta oli mekem sam moa baptaes.
“?Yu filim Oraet?” Papa i toktok slo long sora blong Jimena.
“!Yes!” Jimena i talem.
Papa i baptaesem hem sam moa long bihaf blong sam moa man. “?Yu save mekem sam moa?” hem i askem bakegen.
“!Yes!” Jimena i talem.
Afta long las baptaes, mama i helpem Jimena blong putumbak pam blong hem mo i jekem suga long blad blong Jimena. Mama i smael. !Hem i nomol! I olsem se Jimena i no bin tekemaot pam blong hem nating.
Afta, oli go long wan rum we i smol moa. Papa i putum ol han blong hem long hed blong Jimena. Hem i konfemem hem olsem wan memba blong Jos Ia blong Jisas Kraes blong Ol Lata-dei Sent, long bihaf blong olgeta ia we oli bin ded we hem i bin mekem baptaes blong olgeta. !Naoia ol bubu blong hem we oli ded finis, oli save jusum blong joenem Jos blong Jisas Kraes!
Long famli haos naet long nekis wik blong hem, Jimena mo papa mo mama blong hem oli tokbaot wokbaot blong olgeta i go long tempol. “Tempol hem i haos blong Lod,” Papa i talem. “Taem yumi go, yumi save gat ol merikel long laef blong yumi.”
“?Ol wanem kaen merikel?” smol brata blong Jimena, Pablo, i askem.
“Mi bin fraet blong tekemaot insulin pam blong mi blong go insaed long wota,” Jimena i talem. “Be taem mi stap mekem ol baptaes, mi no filim sik nating. !I bin wan merikel!” Jimena i smael. “Mo nomata we mi bin fraet, Tabu Spirit i bin helpem mi blong gat kwaet tingting. Hemia i bin wan merikel tu.”
Ol pikja droing oli kam long Alyssa Petersen