“Prea blong Rosi,” Fren, Mei 2023, 14–15.

Prea blong Rosi

I Kam long Lucy Stevenson Ewell

(I kamaot long wan tru stori)

Rosi i taet blong filim se hem i no pat.

Stori ia i tekem ples long YSA.

Gel i stap sidaon long jea mo i no luk hapi taem mama blong hem i haggem hem

Rosi i slakem basket blong hem long floa. Hem i jes finisim nambatu dei blong hem long niu klas blong hem. Mo i no bin wan gud dei.

“?Wanem i rong?” Mama i askem.

Rosi i slakem hem long jea. “Sam pikinini long klas blong mi oli talem ol nogud samting long mi,” hem i talem. “Abaot braon skin blong mi.”

I no gat fulap man long skul we oli gat semmak kala skin olsem blong Rosi, mekem se hem i filim se hem i no pat long olgeta. Be ol jik blong olgeta i mekem hem i filim handred taem moa nogud.

Mama i luk wari. “Mi sore,” hem i talem. Hem i haggem Rosi. “Bae mi toktok long tija blong yu abaot hemia.”

Be long nekis dei long skul, oli jikim Rosi bakegen. Wan boe long klas blong hem i stap mekem nogud long Rosi ful dei.

Rosi i harem nogud. Be hem i filim kros tu. Samtaem taem boe ia i mekem nogud long hem, Rosi i stap tok bak. Be hemia i no mekem hem i filim moa gud.

Wan dei, taem Rosi i kambak long haos afta long skul, i ron stret i go insaed long rum blong hem. Hem i taet blong oli jikim hem. Hem i taet blong filim se hem i no pat. Hem i putum fes blong hem long pilo mo i krae.

?Bae mi mekem wanem? hem i tingting. Hem i no wantem filim olsem long ful yia blong skul.

Rosi i waepem ol ae blong hem. Afta hem i lukluk i go antap long smol statiu blong Jisas we i stap long kabod blong buk blong hem. Mama i bin givim long Rosi blong helpem hem blong tingbaot Jisas.

Ating mi mas prea, hem i tingting. Hem i go daon long ol ni blong hem mo foldem ol han blong hem.

“Dia Papa long Heven, mi stap harem nogud tumas insaed. Ol fren long klas blong mi oli stap mekem nogud long mi from braon skin blong mi, mo i mekem mi filim nogud tumas. Plis helpem mi.

I filim gud we blong tokbaot ol filing blong hem long Papa long Heven. Rosi i save se Hem i stap lisin. Hem i filim gud mo lav insaed, olsem wan sopsop blangket we oli putum raon long hem. Hem i filim se kala blong skin blong hem i naes. Hem i wan pikinini blong God, we Hem i lavem hem.

Taem Rosi i finis blong prea, hem i gat wan aedia. Ating hem i save mekem moa blong help long skul blong hem.

Long nekis wik, Rosi mo mama blong hem i toktok long olgeta we oli lukaot long skul abaot wanem i stap hapen long klasrum blong hem. Rosi i lukaotem ol nara pikinini long skul we oli stap buli long olgeta mo i kam fren wetem olgeta. Hem i traem blong stap long we long boe we i bin jikim hem. Mo long jos long Sandei, hem i serem testemoni blong hem se Papa long Heven i lavem evriwan.

Ol samting long skul oli no kam oraet kwiktaem. Be taem i had, Rosi i stap tingbaot olsem wanem hem i bin filim long taem blong prea blong hem. Hem i wan pikinini blong God, mo we God i lavem hem. Mo from se hem i save hemia, hem i save mekem eni samting.