Fulap Tumas wetem Lav

Alelie Coronel-Camitan

(I kamaot long wan tru stori)

“?Yumi save helpem famli blong Jose tu?” Marius i askem.

Stori ia i hapen long Filipin.

Taem Marius i wokbaot i go long haos blong hem, hem i save harem ol man oli stap toktok insaed. Hem i spae tru long windo.

Huia i stap long ples ia, hem i tingting long hemwan. Mama blong hem i stap laef long wan nara kantri blong wok, mekem se plante taem, i gat hem nomo wetem Lola (Bubu woman) long hom.

Hem i openem doa. !Evri fren blong hem oli bin stap long taem ia!

“!Sapraes!” oli talem.

“Mifala i wantem selebretem yu mo medol we yu kasem long Taekwondo kompetisen blong yu,” Jose, bes fren blong Marius i talem.

“Mi hapi tumas long yu.” Lola i haggem skwisim Marius. “!Mama blong yu i stap long fon! Mi save se bae hem i wantem harem evri samting abaot medol blong yu.”

Afta we Marius i finis toktok long Mama, hem mo ol fren blong hem oli gat gud taem long pati. Oli gat gud taem blong toktok mo kakae naes kaekae blong Lola.

“?Yu wantem plei boling tumoro?” Jose i askem bifo hem i go.

“!Yes!” Marius i talem.

Long naet ia bifo Marius i silip, hem i talem wan prea. “Papa long Heven, mi talem tangkyu long Yu blong givim mi ol naesfala fren mo famli. Plis blesem mama blong mi taem hem i go long we. Mo plis blesem mi blong gat gud taem blong plei boling wetem Jose tumoro.”

Be long nekis dei, Marius i no gat janis blong go plei boling. Wan bigfala hariken blong ren i kam mo evriwan i mas stap insaed nomo. Marius i sidaon long haos, mo i stap lisin long ren i stap kilkilim ruf. Hem i wantem tumas blong luk Jose.

Ren i gohed blong ren blong tri dei. Ol strit oli fulap long wota. Sam haos blong ol neba blong Marius oli fulap tu long wota.

Sam taem afta, Marius i faenem Lola insaed long kijin. Hem i stap kukum wan samting we i smel naes we.

“?Yu stap kukum wanem?” hem i askem.

“Mi stap mekem kaekae blong sam famli long wod blong yumi,” hem i talem. “Ol haos blong olgeta i fulap long wota mekem se bisop i askem mi blong help.”

Marius i tingting long Jose. “?Yumi save mekem kaekae blong famli blong Jose? Ating olgeta tu i nidim help.”

“Hemia wan gudfala aedia,” Lola i talem.

Marius i kukum sam raes mo fraenem sam eg blong Jose mo famli blong hem. Afta hem i helpem Lola blong fulumap kaekae.

Ren i jes stop nao blong ren. Marius mo Lola i wokbaot long ol dip wota long strit blong go putum ol kaekae. !Wota i dip kasem ni blong Marius!

Oli faenem Jose mo famli blong hem we oli stap stanap aotsaed long haos blong olgeta. Jose i stap krae.

Marius i haggem fren blong hem. “Mi sori we wota i fulap long haos blong yu,” hem i talem. “Jisas i lavem yu Mo mifala tu i lavem yu.”

Tugeta, Marius mo Jose i help blong klinim ol samting we i sofmad long haos blong Jose. Marius i singsing “Mi mi Pikinini blong God” taem oli stap wok. Taem oli spel smol. Marius i givim kaekae we hem i mekem blong Jose.

“Tangkyu blong helpem famli blong mi,” Jose i talem. “!Mo tangkyu long kaekae! Hem i tes naes we.”

“I stret nomo,” Marius i talem.

“?Yu ting se yu save tokbaot moa Jisas long mi? ?Mo singsing we yu bin stap singsing long hem?” Jose i askem.

“!Yes!” Marius i talem. “?Yu glad blong kam long jos wetem mi long Sandei? Ples ia nao mi stap lanem abaot Jisas long hem. Mo yumi save singsing tugeta tu.”

“OK,” Jose i talem.

Marius i filim gud insaed. Hem i glad hem i bin save helpem Jose mo famli blong hem. Mo hem i hapi se hem i save serem gospel tu.

Ol pikja droing oli kam long Jamie Bauza