“Ol Origami Fren,” Fren, Mei 2023, 30–31.
Ol Origami Fren
?Olsem wanem nao Ari mo ol fren blong hem oli save helpem Misis Franklin?
Stori ia i tekem ples long YSA.
“!Taem blong spel!” Tija blong Ari i singaot.
Ol fren blong Ari oli laenap blong go aotsaed long plei graon. Be oltaem, Ari mo ol fren blong hem oli stap go long laebri be i no plei graon. Oli laekem blong yusum ol buk mo mekem ol kraf tugeta.
Kristin mo Ella oli stap wet finis long doa. Ari i karem buk blong hem mo wan hip blong pepa. Afta hem i lidim rod i go daon long holwei.
“Mi hop se The Dragon Keeper’s Secret i kambak!” Ari i talem. “Mi wantem yusum blong sam wik afta givimbak.”
Taem oli go long laebri, ol gel oli sakem han long Misis Franklin, hem we i stap lukaotem skul laebri. Oltaem hem i stap welkamem olgeta wetem wan bigfala smael. Be tedei, smael blong hem i no hapi tumas.
Ari i mekem fes blong hem i nogud taem hem i putum buk blong hem long tebol. “?Yufala i luk se Misis Franklin i no filim hapi tumas?”
Kristin i muvum ol solda blong hem se i no save. “Ating hem i jes bisi nomo.”
“Ating.” Ari i sidaon mo pulumaot wan pis pepa. Hem i foldem gud mo i smutum wetem bigfala fingga blong hem.
“?Bae yumi mekem wanem tedei?” Ella i askem.
“?Olsem wanem long ol bukmak?” Ari i talem. “Hemia i isi nomo. Bae mi soem long yu.”
Ari i bin stap lanem olsem wanem blong mekem origami (foldem pepa). Hem i wan kaen art blong Japan, we oli mekem taem oli stap foldem ol pepa long ol defren sep. Ari i bin save olsem wanem blong mekem evri kaen sep, mo hem i tijim ol fren blong hem wanem hem i bin lanem.
Ari i soem long Kristin mo Ella olsem wanem blong foldem. I no longtaem, olgeta evriwan i gat wan smol skwea bukmak.
“I go long kona, olsem ia.” Ari i openem buk blong hem mo pusum bukmak ova long kona blong wan pej.
“!Naes tumas!” Kristin i karem wan nara pepa. “Mi wantem traem miwan.”
Taem oli stap mekem bukmak, oli tokbaot ol buk we oli bin ridim mo wanem oli wantem ridim long nekis taem. Ari i lukluk Misis Franklin bakegen. Hem i luk olsem se hem i no hapi smol.
I no longtaem, Misis Franklin i kam stanap long tebol blong olgeta.
“Halo ol gel.” Hem i putum wan buk long tebol. !Hem i buk blong dragon keeper! “Hemia i blong yu Ari. Mi save se yu stap wet blong ridim.”
“!Tangkyu! Ari i pikimap.
Misis Franklin i pulum win blong hem smol. “Wan man i stil long trak blong mi tedei. Oli karem evri buk mo miusik blong mi.”
“!Hemia i nogud ia!” Kristin i talem.
Misis Franklin i smael sore long olgeta. “I oraet, hem i ol samting nomo. Ol samting, yumi save putumbak ol nara samting long ples blong hem. Mi glad nomo se no gat wan i kasem kil.”
Ari i wajem Misis Franklin i wokbaot i go.
“Mi wantem tumas blong yumi save mekem wan samting blong help,” Ella i talem.
Ari i lukluk daon long origami bukmak we i stap long ol han blong hem. “!Ating yumi save mekem!”
“?Olsem wanem?” Kristin i askem.
Ari i smael. “Kam long haos blong mi taem skul i finis. Mi gat wan aedia.”
Long nekis dei, Ari, Kristin, mo Ella oli go long laebri long taem blong spel blong olgeta, olsem we oli stap mekem oltaem. Be long taem, oli no karem ol buk nomo i kam. Oli gat wan spesel samting blong Misis Franklin.
“!Mifala i bin mekem ol samting ia blong yu!” Ari i givim wan basket long Misis Franklin. “Mifala i save se mifala i no save putumbak evri samting we oli stilim long trak blong yu, be mifala i ting se bae ol samting ia i mekem yu hapi smol.”
Misis Franklin i lukluk insaed long basket. Hem i fulap long origami—ol bukmak, fis, ol hat, ol bataflae. Hem i smael bigwan.
“!Hemia i naes tumas! Tangkyu tumas.” Hem i pulumaot wan pis blong origami long basket. Oli foldem blong mekem wan smol buk. “!Bae mi yusum smol buk ia olsem jenol blong stap raetem evri smosmol hapi tingting blong mi long hem!”
Ari i smael i gobak. Oltaem bae hem i save mekem wan naes samting blong ol nara man—foldem wan pepa afta wan nara wan.
Ol pikja droing i kam long Brian Martin