“Lijem̧ao eo im Orca eo,” Eo Jera, Māe 2023, 8–9.
Juon Lijem̧ao im Juon Raj
Ekōjkan an nej jin̄n̄a ko an Dieter maron̄ jipan̄ ro jet?
Bwebwenato in ekar bōk jikin ilo Canada.
Dieter ekar kōņaan ron̄jake kweilo̧k eo eļap. Ekar kajjeon̄ tōt. Ekar kajjeon̄ ron̄jake katak ko. Bōtaab kōnke e autism ekar kōm̧m̧an menin an ben n̄ane. Ekar em̧m̧akūtkūt ioon jeia eo. Ekar ikkure kōn kein ikkure ko an. Ekar ettōr to ettōr tak.
Innem ekar kalimjōkļo̧k jemān. Jemān ekar jijet im ikōn̄ im ron̄jake rikōnono ro. Dieter ekar kōņaan āinwōt e. Kōn menin ekar kwaļo̧k kein jin̄n̄a ko an. Bōlen kōļare juon pija enaaj jipan̄ e jijet im ikōn̄.
Ke ekar kōļar, Dieter ekar ron̄jake an Elder Jeffrey R. Holland ekōnono. Elder Holland ekar ba kōn juon bwebwenato kōn Jisōs. Jisōs ekar kajjitōk ippān juon likao em̧weie n̄an leļo̧k aolepen jāān ko an n̄an rijeram̧ōl ro.*
Dieter ekar bar kōņaan jipan̄ armej ro ejjab bwe jāān ippāer. Im ekar wōr juon an ļōmņak.
“M̧am̧a, ikōņaan jin̄n̄aik juon lijem̧ao,” Dieter ekar ba. “Komaron̄ ke jin̄n̄aik juon n̄an n̄a?”
“Aaet,” M̧am̧a eaar ba. Ekar jin̄n̄aik juon lijem̧ao.
Dieter ekar katutu paintbrush eo an n̄an jino jin̄n̄a. Ekar jin̄n̄aik m̧oktata pā ko pein lijem̧ao eo. Ekar kōm̧m̧ane jet kooļ brown im jet kooļ orange. Ilo an kar jin̄n̄a, ekar ron̄jake katak ko jet. Men̄e aolepen katak ko rekar jem̧ļo̧k, Dieter ekar wōnm̧aanļo̧k wōt. Ekar kōņaan bwe lijem̧ao eo en likkuun jejjōt.
Āliktata Dieter ekar m̧ōj. Ekar kwaļo̧k lijem̧ao eo n̄an jinen.
“Eļap an em̧m̧an!” Jinen eaar ba. “Jej ke katotoiki?”
Dieter ekar kōm̧akūtkūt bōran jaab. “Ikōņaan wia kake im leļo̧k jāān eo n̄an jipan̄ armej ro ejjab bwe jāān ippāer. Āinwōt aer kar kōnono kake ilo kweilo̧k eo.”
M̧am̧a ekar ettōn̄ dikdik. “Jen lale ta eo jemaron̄ kōm̧mane.”
Ekar likūt jin̄n̄a eo an Dieter online n̄an wia kake. Jinen ekar jeiki bwe Dieter ekōņaan leļo̧k jāān eo n̄an juon shelter n̄an armej ro ejjeļo̧k m̧weer.
Raan eo juon, Dieter im jinen ekar lale post eo. Dieter ekar jab tōmak! Būjin armej rekar kōņaan wiaki pija eo an. Ekar m̧ōņōņō bwe ekar bujin armej rekar kōņaan jipan̄.
Juon restaurant ilo jikin eo an Dieter rekar kajjitōk n̄an wiaki jin̄n̄a eo. Rekar ba renaaj kar kōļļā 10 kattōn eļapļo̧k jān jon̄an eo Dieter im jinen rekar kajjitōk e! M̧ōn wia ko jet rekar kajjitōk bar jin̄n̄a ippān. Dieter ekar wōr an jerbal eļap n̄an kōm̧m̧ane!
Jinen ekar kōm̧m̧an annan̄ in menin mour, im Dieter ekar kadiwōj tok kein jin̄n̄a ko an. Ekar jin̄n̄aik juon oļip, juon ļaion, im juon raj. Ekar em̧m̧antata ippān raj. Ekar ņa etan, “Otis raj.” Juon m̧ōn wia m̧ōn̄ā iturin m̧weeo im̧ōn ekar wiaki. Iien eo tok juon Dieter ekar etal n̄an m̧ōn wia eo, ekar loe an ettoto ilo kiin m̧weo!
“Lale, m̧am̧a!” Dieter ekar jitōn̄ļo̧k jin̄n̄a eo.
“Wow!” Jinen eaar ba. “Kiiō jabdewōt iien jej itok, jemaron̄ keememej ekōjkan an kapeel ko am̧ kar jipan̄ armej.”
Dieter ekar lukkuun m̧ōņōņō bwe jin̄a ko an rem̧m̧an ippān armej. Ak ekar ļapļo̧k an m̧ōņōņō bwe emaron̄ jipan̄ ro jet. Ekar m̧ōņōņō kōn an kar ron̄jake ilo iien kweilo̧k eo eļap.
Kōmeļeļe ko jān Natalie Campbell