“Kabwilōn̄lōn̄ eo an Jimena ilo Tampeļ,” Eo Jera, Māe 2023, 36–37.
Kabwilōn̄lōn̄ eo an Jimena ilo Tampeļ
Jimena ekar ikūm̧kūm̧. Ak ekar jeļā bwe Irooj enaaj kar jipan̄ e.
Bwebwenato in ekar bōk jikin ilo Guatemala.
Jimena ekar iuweļo̧k ilo wa eo im kōņak seat belt eo. E im jinen im jemān rekar ped ilo iaļ eo aer ļo̧k n̄an tampeļ. Enij kab tōn juon kattōn an kōm̧m̧ani peptaij ko an ilo tampeļ. Jemān ekar pojen peptaiji n̄an ro jibun̄ im jim̧m̧aan etto. Jimena ekar kijooror!
Ak Jimena ekar ļōmņak kōn juon men me ekar kōm̧m̧an menin an ikūm̧kūm̧ ilowa. “Baba,” ekar ba, “akō pump eo aō?”
Jimena ekar wōr ippān nan̄inemj in tōn̄al 1. N̄an an pād wōt ilo ājmour, ej aikuj aolep iien kōņake juon device ņae etan insulin pump n̄an jipan̄ e kōm̧man jon̄an ļābōļ in tōn̄al eo an ilo bōtōktōkin. Eļan̄n̄e ejjab kōņake ilo juon iien aitok kitien, enaaj en̄jake an nan̄nmej.
“Renaaj ke kōtļok aō kōņake lowaan tampeļ?” Jimena ekar kajjitōk Menono eo an ekar m̧ōkaj an emenono. Ak n̄e inaaj dreļo̧n̄ ilo dren eo“?”
“Enaaj em̧m̧an,” Jemen ekar ba. “Kwomaron̄ kōnake pump eo am̧ m̧ae iien kwoj dreļo̧n̄e dren eo. Innem m̧am̧a emaron̄ jipan̄ eok bar kōņake ilo iien eo wōt kwoj diwōjtok.”
Mama ekar emajidjid. “Im eļan̄n̄e kwonaaj jino en̄jake am̧ nan̄inmej ilo am̧ kom̧m̧ane peptaij ko, ba n̄an jem̧ōm̧ im enaaj kabōjrak eok.” Jinen ekar keen pein. “Jenaaj pād ippam̧ ilo aolepen iien eo.”
“EM̧M̧AN,” Jimena ekar ba. Eļakkar wōt ikūm̧kūm̧. Ak jinen im jemān rekar jipan̄ kaenōm̧m̧an e.
Ke rekar tōpar, Jimena ekar jibwe pein jinen im jemān ilo aer kar etetalļo̧k n̄an kōjem ko an tampeļ. Ilo iien eo wōt ej juur lowaan tampeļ eo, Jimena ekar en̄jake okmeenen, en̄jake in kaenōm̧man. Ekar jeļā bwe Jetōb Kwojarjar ekar ba n̄an e bwe Jemedwōj Ilan̄ enaaj kar jipan̄ e, men̄e ekar ikūm̧kūm̧. Aolep men renaaj EM̧M̧AN, āinwōt an kar jemān ba.
Jimena ekar jānij n̄an nuknuk ko remouj. Innem jinen Jimena ekar jipan̄ tūm̧wi pump eo an. “Enaaj bōk wōt jejjo minit ko,” Jinen ekar ba. Ekar atabo̧kwiji Jimena.
Jimena ekar dreļo̧n̄e dren eo. Jemān ekar kōttar e. Ekar lelo̧k pein im jipan̄e laļļo̧k ilo jikinwe ko.
Jemān ekar ba jar in peptaij eo im kōbabuiklaļļo̧k ņae ium̧win dren. Ke ekar walōn̄tak, Jimena ekar ettōn̄dikdik. Rekar kōm̧m̧ane bar jet peptaij.
“Em̧m̧ān ke am̧ mour?” Jemān ekar unoojdikdik ilo lo̧jiln̄in.
“Aaet!” Jimena ekar ba.
Jemān ekar peptaiji n̄an bar elōn̄ļo̧k armej. “Kwomaron̄ ke bar kōm̧mane eļōn̄ļo̧k?” ekar bar kajjitōk.
“Aaet!” Jimena ekar ba.
Ālkin peptaij eo āliktata, jinen ekar jipan̄ Jimena kōļaake pump eo an im etale jon̄an tōn̄al eo an Jimena. Mamá ekar ettōn̄ dikdik. Ekar em̧m̧an! Ekar āinwōt n̄e Jimena ekar jab tūm̧wi pump eo an n̄an jidik.
Tokālik rekar etal n̄an juon ruum̧ edik. Jemān ekar likūt pein ioon bōran Jimena. Ekar kapen e juon membōr ilo Kabun̄ eo an Jisōs Kraist im Armej ro Rekwojarjar ilo Raan ko Āliktata n̄an armej ro im remej me ekar peptaij kake er. Kiiō ro jibūn im jim̧m̧an etto remaron̄ kālet n̄an kobaļo̧k ilo Kabun̄ in an Jisōs Kraist!
Ilo nokon eo an baam̧le wiik eo tok juon, Jimena im ro jinen im jemān rekar ekōnono kōn tūreep eo aer n̄an tampeļ “Tampeļ eo ej m̧weo im̧ōn Irooj,” Jemān ekar ba. N̄e jej etal, jemaron̄ bōk kabwilōn̄lōn̄ ko ilo mour ko ad.”
“Kain kabwilōn̄lōn̄ rōt?” ekar kajjitōk ļaddik eo edik atin Jimena, Pablo.
“Ikar ikūm̧kūm̧ n̄an tūmwi insulin pump eo aō n̄an dreļo̧n̄e dren eo,” Jimena ekar ba. “Ak ke ikar kōm̧m̧ani peptaij ko, ikar jab en̄jake aō nan̄inmej. Ekar juon kabwilōn̄lōn̄!” Jimena ekar ettōn̄dikdik. “Im men̄e ikar mijak, Jetōb Kwojarjar ekar jipan̄ kainōm̧m̧an eō. Men eo ekar bar juon kabwilōn̄lōn̄.”
Kōmeļeļe ko jān Alyssa Petersen