“Ro M̧ōtta Kōm̧m̧an Kainōknōk jān Pepa,” Eo Jera, Māe 2023, 30–31.
Ro M̧ōtta Kōm̧m̧an Kainōknōk jān Pepa
Ekōjkan an Ari im ro m̧ōttan maron̄ jipan̄ Mrs. Franklin?
Bwebwenato in ekar bōk jikin ilo USA.
“Iien kakkije!” Rikaki eo an Ari ekar ikkūr.
Ro uwaan kūlaaj eo an Ari rekar ļain im etal n̄an jikin ikkure eo nam̧ōj. Ak Ari im ro m̧ōttan rekōn etal wōt n̄an ļāibrāre eo. Em̧m̧an ippāer baro bok im kōm̧m̧an craft ippān doon.
Kristin im Ella rekar pojak im kōttar ilo kōjem eo. Ari ekar bōke bok eo im jet pepa. Innem ekar tōl iaļ eo laļļo̧k ilo hall eo.
“Ij kōjatdikdik bwe The Dragon Keeper’s Secret ero̧o̧ltok!” Ari ekar ba. “Wiik in aō kōņaan kōjerbale.”
Ke rekar tōprakļo̧k ļāibrāre eo, leddik ro rekar jeaļ e Mrs. Franklin, rilale lāibrāre eo. Aolep iien ej karuwaineneik er kōn mejen ettōn̄ dikdik. Ak rainin mejen ettōn̄ dikdik.
Ari ekar jab em̧m̧an tūrin mejen ke ekar likūt bok eo an ioon tābōļ eo. “Mrs. Franklin ekar ke būrom̧ōj n̄an eok?”
Kristin ekar kōm̧akūtkūt aeran. “Bōlen ekar boub.”
“Bōlen.” Ari ekar jijet im kadiwōj juon pepa. Ekar kōkm̧anm̧an an limi, kōmetal lemlem eo kōn adi ļap eo pein.
“Ta eo jej kōm̧m̧ane rainin?” Ella ekar kajjitōk.
“Akō kein kōkaļļe bok ko?” Ari ekar ba. “Repidodo. Inaaj kwaļo̧k waj.”
Ari em̧ōj an kar jino jeļā kōm̧m̧an kainōknōk jān pepa (origami). Ekar juon kain jin̄a jān Japan, kōm̧m̧ane ilo ami limi pepa ko ilo elōn̄ kain jekjek ko. Ari ekar jeļā wāween kōm̧m̧ane aolep kain jekjek ko, im ekar katakin leddik ro m̧ōttan ta eo ekar ekkatak.
Ari ekar kwaļo̧k n̄an Kristin im Ella wāween kōm̧m̧ane kajjojo lemlem ko. Ejjab to aoleper jilu ewōr ippāer juon kein kōkaļļe bok e square.
“Ej etal n̄an kona eo, āinwōt in.” Ari ekar kōpeļļo̧k bok eo an im kadeļo̧n̄ kein kōkaļļe bok eo an n̄an kona in juon peij.
“Em̧m̧an!” Kristin ekar bōke bar juon pepa. “Ikōņaan kajjeon̄ make kōm̧m̧ane.”
Ilo aer jerbale, rekar ekōnono kōn bok ko em̧ōj aer kar riiti im ta eo rekōņaan nej baj riiti. Ari ekar kalimjōkļo̧k Mrs. Franklin. Ej mejen būrom̧ōj wōt.
Ejjab to Mrs. Franklin ekar bōjrakļo̧k ilo tābōļ eo aer.
“Iakwe, leddik raņ.” Ekar likūt juon bok ioon tābōļ eo. Ekar bok in dragon keeper eo! “Menin ej n̄an eok, Ari. Ijeļā ke eto am̧ kōņaan riiti.”
“Kom̧m̧ool!” Ari ekar bōke.
Mrs. Franklin ekar bōk kūtuwōn jidik. “Juon armej ekar ko̧o̧te kobban wa eo waō rainin. Rekar bōke aolepen bok ko aō im kōjan̄jan̄ ko aō.”
“Elukkuun nana!” Kristin ekar ba.
Mrs. Franklin ekar mejen būrom̧ōj n̄an er. “Em̧man, bwe m̧weiuk wōt. M̧weuik jemaron̄ bar ebbōk. Im̧ōņōņō bwe ejjeļo̧k en ekar joraāān.”
Ari ekar kalimjōk an Mrs. Franklin etal.
“Ikōņaan bwe jen kōm̧m̧ane juon men n̄an jipan̄,” Ella ekar ba.
Ari ekar reilaļļo̧k n̄an kein kōkaļļe bok eo kōm̧m̧an jān pepa eo ilo pein. “Bōlen jemaron̄!”
“Kain en an ta?” Kristin ekar kajjitōk.
Ari ekar ettōn̄ im kwaļo̧k drekā in n̄iin. “Itok n̄an m̧wem̧ō m̧ōjin jikuuļ. Ewōr juon aō ļōmņak.”
Raan eo tok juon, Ari, Kristin, im Ella rekar etal n̄an ļāibrāre eo ilo iien kakkije eo aer, āinwōt aer kōn kōm̧m̧ane. Ak ilo tōrein, rekar jab boktok wōt bok ko. Rekar kōm̧mane juon men eaorōk n̄an Mrs. Franklin.
“Kōm kar kōm̧m̧ani men kein n̄an kwe!” Ari ekar leļo̧k juon pāāk n̄an Mrs. Franklin. “Kōm jeļā ke kōm ban maron̄ lewaj men ko rekar ko̧o̧ti, ak kōmean̄ kar ļōmņak bwe men kein renaaj kam̧ōņōņōik eok.”
Mrs. Franklin ekar kalimjōk lowaan pāāk eo. Ekar obrak kōn jekjek in men ko kōm̧m̧an jān pepa, kein kōkaļļe bok ko, ek, annan̄ in menono, im babūb ko. Ekar lukkuun ettōn̄ dikdik.
“Eļap an em̧m̧an! Komi elukkuun em̧m̧ool.” Ekar kwaļo̧ktok juon origami jān pāāk eo. Kar limi bwe en kōm̧m̧ane juon bok jidikdik. “Ij tōn kōjerbale jōnōļ jidikdik in n̄an je aolepen ļōmņak ko aō relem̧ōņōņō!”
Ari ekar bar ettōn̄dikdikļo̧k. Ekar maron̄ aolep iien kōm̧m̧ane juon men em̧m̧an n̄an ro jet—juon lemlem n̄an juon pepa ilo juon iien.
Kōmeļeļe ko jān Brian Martin