“Kōppeļļo̧k eo an Tampeļ eo,” Eo Jera, Māe 2023, 16–17.
Kōppeļlo̧k eo an Tampeļ eo
Svetan ekar lukkuun m̧ōņōņō in deļo̧n̄e tampeļ eo!
Bwebwenato in ekar bōk jikin ilo USA.
Svetan ekar en̄jaake m̧ōņōņō. Baam̧le eo an ekar em̧m̧akūt jān Argentina n̄an Amedka. Im kiiō ekar kiiō itok iien eo n̄an iuwe ilo baļuun kileplep eo!
Svetan ekar kalimjōk nam̧ōjļo̧k ilo wūņtō eo ilo an baļuun eo kelo̧k. Ekar ļōmņak enij elmen m̧weo m̧ōn ekāāl. Aolep men renaaj oktak. Juon em̧ ekāāl. Juon ruum̧ in kiki ekāāl. Juon bukon ekāāl. Im ro jeran rekāāl n̄an jeļā kajjeer! Svetan ekar m̧ōņōņō.
Svetan ekar barāinwōt jeļā bwe m̧weo m̧ōn ekāāl ekar epaake juon tampeļ eo ej kab m̧ōj kalōke. Ilo Argentina, tampeļ eo ekar likkuun ettoļo̧k. Ekar loe wōt ilo pija.
Svetan ekar jitļo̧k n̄an jinen. “Koļak lale jenij ke maron̄ loe tampeļ eo jān mejatoto?”
Jinen ekar ettōn̄ dikdik. “Ijjab ļōmņak jemaron̄.” Bōtaab jenaaj loe ejjab to jān kiiō.”
Svetan ekar ettōn̄ dikdikļo̧k. M̧am̧a im baba rekar ba bwe tampeļ eo ejjan̄in de peļļo̧k. Ak ejjab to enaaj wōr juon kōpelļo̧k. Meļeļein armej remaron̄ etal n̄an lowaan im lale m̧okta jān aer aje. Im baam̧le eo an Svetan’s rej etal n̄an open house eo! Ekar kijooror n̄an loe tampeļ eo ikōn likkuun mejen.
Jejjo awa tokālik, Svetan im baam̧le eo an rekar pād ilo m̧weo m̧weer ekāāl. Ekar likkuun lōn̄ men ko n̄an kōm̧m̧ani. Svetan ekar jipan̄ ekto kobban bo̧o̧k ko im kōkm̧anm̧an m̧weo m̧weer.
Ilo raan eo m̧okta jān kōpelļo̧k eo, rekar jijet ippān doon ilo etōņaak eo n̄an kenaan.
“Tampeļ eo ej m̧weo im̧ōn Irooj,” M̧am̧a ekar ba. “N̄e jeped lowaan, jej aikuj kautiej. Kojeļā ke ta meļeļein?”
“N̄an kadikdik ekōnono bwe en em̧m̧anļo̧k ad ron̄ Jetōb Kwojarjar eo?” Svetan ekar kajjitōk.
“Ejim̧we,” M̧am̧a ekar ba. “Jemaron̄ ekkatak eļapļo̧k n̄e jej pād ilowaan tampeļ eo.”
Svetan ekar kōm̧ajdikdik bōran. Ekar kōņaan kautiej bwe en maron̄ en̄jake Jetōb Kwojarjar ilo tampeļ.
Jibbon̄en eo juon, Svetan ekar m̧ōkaj an jerkak. Ekar kōņak nuknuk in raan in Jabōt ko an. Ejjab to ekar iien em̧m̧akūt.
Baam̧le eo an Svetan rekar tōprakļo̧k tampeļ eo. Armej ro rekar jipan̄ er kōņaki plastic cover ko n̄an pinej juuj ko aer.
“Etke rekar kōļaaki bāāk jidikdik kein ilo neō, M̧am̧a?” Svetan ekar kajjitōk.
“Kōnke aolep men ilowaan tampeļ eo rekāāl im erreo. Jekōņaan kejparoke.”
Juon kōrā ekar karuwaineneik er. Ekar riiti naan ko ilo kōjem eo an tampeļ eo: “Kwojarjar n̄an Irooj—M̧weo Im̧ōn Irooj.”
Svetan ekar jibwe pein jinen. Rekar etetal lowaan. Aolep men rekar aiboojoj! Bōlen āindein en̄jake eo ilo lan̄.
“Lale!” Svetan ekar unoojdikdik. Ekar jitōn̄ļo̧k juon pija. “Jisōs eņ!”
Ke ekar dedeļo̧k, Svetan ekar en̄jake m̧ōņōņō. Ekar kam̧m̧oolol bwe ekar maron̄ deļo̧n̄e tampeļ. Ekar kōņaan bar deļo̧n̄e n̄e enaaj rūttoļo̧k.
Kōmeļeļe ko jān Mark Robison