“Jar eo an Rosi,” Eo Jera, Māe 2023, 14–15.
Jar eo an Rosi
Rosi ekar m̧ōk in en̄jake an jab ekkar n̄an ijo.
Bwebwenato in ekar bōk jikin ilo USA.
Rosi ekar joļo̧k backpack eo an n̄an ioon laļ. Ej kab kar m̧ōj an kajem̧ļo̧k raan eo kein karuo ilo kūlaaj eo an ekāāl. Im ekar jab juon raan em̧m̧an.
“Eita?” Jinen eaar kajjitōk.
Rosi ekar okjakļo̧k ioon jeia couch eo. “Jet ajri ilo kūlaaj eo aō rekar ba jet men ko rejjab em̧m̧an,” ekar ba. “Kōn an brown kūlū.”
Ekar jab likkuun lōn̄ armej ilo m̧ōn jikuuļ eo im rej kōļar in wōt Rosi, kōn menin ekar jab koņ an en̄jake ijo. Ak kakūtoto eo ekar kōm̧m̧an menin an jibukwi kattōn nana.
Jinen ekar inepata. Eaar ba, “jolo̧k bōd.” Ekar atabo̧kwije Rosi. “Inij kōnono n̄an rūkaki eo am̧ kake.”
Ak raan eo tok juon ilo jikin jikuuļ, rekar bar kakūtōtōiki Rosi. Juon Ļaddik ilo kūlaaj eo an ekar likkuun nana n̄ane aolep raan eo.
Rosi ekar en̄jake burom̧ōj. Ak ekar barāinwōt en̄jake matōrtōr. Jet iien n̄e laddik in ej kajoor nana n̄ane, Rosi ej bar akweele. Ak ekar jab kōkm̧anm̧an an mour.
Juon raan ke Rosi ekar tōpar m̧we jān jikin jikuuļ, ekar kajju ettōrļo̧k n̄an ruum̧ eo an. Ekar m̧ōk kōn aer kakūtōtōiki. Ekar m̧ōk kōn en̄jake eo ke ejjab ekkar n̄an ijo. Ekar likūt peet eo an ioon mejen im jan̄.
Ta eo inaaj kōm̧m̧ane? ekar ļōmņak. Ekar jab kōņaan en̄jake menin ilo aolepen iiō in jikuuļ eo.
Rosi ekar irļo̧k mejen. Innem ekar kalimjōkļo̧k annan̄ in Jisōs me ekar ped ilo jikin bok eo an. Jinen ekar leļo̧k n̄an Rosi n̄an jipan̄e kemeemej Jisōs.
Bōlen ij aikuj jar, ekar ļōmņak. Ekar jijet laļļo̧k ioon bukien neen im pokpā.
“Jemedwōj Ilan̄, elikun ļap aō metak itulowa. Ro ilo kūlaaj eo aō rej nana n̄an n̄a kōnke kōn an brown kilū, im ekōm̧m̧an menin an nana aō mour. Jouj im jipan̄ eō.”
Ej juon kar en̄jake em̧m̧an n̄an ba n̄an Jemedwōj Ilan̄ kōn en̄jake ko an. Ekar jeļā bwe E ekar ron̄jake. Ekar en̄jake okmeenen im iakwe, āinwōt juon ko̧o̧j emeoeo ekar jepooļe aolepen. Ekar en̄jake bwe kōļar in kilin ekar aiboojoj. Ekar juon ajri nejin Anij, im E ej iakwe e.
Ke ekar m̧ōj an Rosi jar, ekar wōr juon an ļōmņak. Bōlen ewōr men eo eļapļo̧k emaron̄ kōm̧m̧ane n̄an jipan̄ ilo m̧ōn jikuuļ eo an.
Wiik eo tok juon, Rosi im jinen rekar ekōnono ippān armej ro rej bōk eddoin jikuuļ eo kōn ta eo ekar waļo̧k n̄an e ilo kūlaajruum̧ eo. Rosi ekar kappukot ajri ro jet im rej bar nana n̄an er im rekar erom̧ m̧ōttā. Ekar kajjieon̄ kattoļo̧k e jān ļaddik eo ekar kakitōtōiki. Ilo m̧ōn jar eo ilo Jabōt, ekar kwaļo̧k an naan in kam̧ool bwe Jemedwōj Ilan̄ ej iakwe aolep.
Men ko ilo jikin jikuuļ rekar jab kajju em̧m̧an. Bōtaab ke ekar ben, Rosi ekar kemeemej wāween an kar en̄jake ke ekar jar. Ekar juon ajri nejin Anij, im kar iakwe e. Im kōnke ekar jeļā men eo, ekar maron̄ kōm̧m̧an jabewōt.
Kōmeļeļe ko jān Shawna J. C. Tenney