“Obrak kōn Iakwe,” Eo Jera, Māe 2023, 26–27.
Obrak kōn Iakwe
“Jemaron̄ ke bar jipan̄e baam̧le eo an Jose?” Marius ekar kajjitōk.
Bwebwenato in ekar bōk jikin ilo Philippines.
Ilo an Marius etal n̄an m̧weo im̧ōn, ej ron̄ an armej ro kōnono lowaan. Ekar alimōmoō ilo wūnto eo.
Ikōņaan jeļā wōn e ijin, ekar ļōmņak. Jinen ekar jokwe ilo bar juon laļ kōn jerbal, im ekkā an e wōt im Lola (Bubu) ilo m̧weo.
Ekar kōppelļo̧k kōjem̧ eo. Aolep ro m̧ōttan raar pād ijo!
“Surprise!” rekar ba.
“Kōm ekar kōņaan kam̧ōņōņō ippam̧ kōn medal eo am̧ kwar bōke ilo kampiit in Taekwondo,” Jose ekar ba, lukkuun eo m̧ōttan Marius.
“Ij m̧ōņōņō kōn eok.” Jibūn ekar keentok Marius kōn juon atabo̧kwij eļap. “Jinōm̧ e ilo taļeboon! Ijeļā ke ekōņaan ron̄ men otemjej kōn medal eo am̧.”
Ālkin an m̧ōj an Marius kōnono ippān jinen, e im ro m̧ōttan rekar m̧ōņōņō ilo bade eo. Rekar limo ilo aer kōnono im m̧ōn̄ā m̧ōn̄ā ko renno jibwin ekar kōmatti.
“Kokōņaan ke bowling ippa ilju?” Jose ekar kajjitōk m̧okta jān an kar etal.
“Aaet!” Marius ekar ba.
Ilo bon̄ eo m̧okta jān kiki, Marius ekar jar. “Jemedwōj Ilan̄, ij kam̧m̧oolol Eok kōn Am̧ letok n̄an eō ro m̧ōtta im baam̧le eo aō rem̧m̧an. Jouj im kōjeraam̧m̧an jinō ilo an ettoļo̧k. Im jouj im kōjeraam̧m̧an eō bwe in limo ilo ikkure bowling ippān Jose ilju.
Bōtaab raan eo tok juon, Marius ekar jab etal im bowling. Juon ļan̄ in wōt eļap ekar waļo̧k, im aolep armej rekar pād wōt lowaan m̧ōko. Marius ekar jijet ilo m̧weo, ron̄jake an eļļōļļōļ boro̧waj in m̧weo kōn wōt. Ekar kōņaan bwe en loe Jose.
Ekar wōt wōt, ium̧win jilu raan. Iaļ ko rekar ibwijleplep kōn dān. Jet em̧ ko ilo bukwon eo an Marius rekar barāinwōt ibwijleplep.
Tokālik Marius ekar loe jibūn ilo jikin m̧ōn̄ā eo. Ekar kōmat juon m̧ōn̄ā elukkuun enno bwiin.
“Ta ņe kwoj kōmatte?” ekar kajjitōk.
“Ij kōmat m̧ōn̄ā n̄an jet baam̧le ilo ward in ad,” ekar ba. “Eibwijleplep m̧ōko m̧weer, kōn menin bisop ekar kajjitōk bwe in jipan̄.”
Marius ekar ļōmņak kōn Jose. “Jemaron̄ ke kōm̧m̧an m̧ōn̄ā n̄an baam̧le eo an Jose? Remaron̄ bar aikuj jipan̄.”
“Juon ļōmņak em̧m̧an,” Jibūn ekar ba.
Marius ekar kōmattee jidik rice im lep būrae n̄an Jose im baam̧le eo an. Innām jipan̄ jibwin pāāki m̧ōn̄ā ko.
Āliktata ekar bōjrak wōt. Marius im jibwin rekar etal bwōļōn dren ko ļo̧k ilo iaļ ko n̄an bokļo̧k m̧ōn̄ā ko. Dān eo ekar tōpar bukien neen Marius!
Rekar loe Jose im baam̧le eo an rej jutak nam̧ōjen m̧weo m̧weer. Jose ekar jan̄.
Marius ekar atabo̧kwij ļaddik eo m̧ōttan. “Joļo̧k bwōd bwe eibwijleplep m̧wem̧ōm̧,” ekar ba. “Jisōs ej iakwe eok. Im kōmij barāinwōt.”
Ippān doon Marius im Jose rekar jipan̄ karreoiki men ko rebedkat ilowaan m̧weo m̧ōn Jose. Marius ekar al “N̄a nejin Anij.” ilo aer kar jerbal. Ke rekar bōjrak im kakkije, Marius ekar leļo̧k n̄an Jose m̧ōn̄ā ko ekar kōm̧m̧ani n̄ane.
“Kom̧m̧ool kōn am̧ jipan̄ baam̧le in aō,” Jose ekar ba. “Im kom̧m̧ool kōn m̧ōn̄ā ke! Enno.”
“Kwon jouj,” Marius ekar ba.
“Kwoļak lale komaron̄ ke ba n̄an eō eļapļo̧k kōn Jisōs? Im al eo koļakkar al kake?” Jose ekar kajjitōk.
“Aeet!” Marius ekar ba. “Kokōņaan ke itok im jar ippa Jabōt? Ej ijo in ij ekkatak kōn Jisōs. Im jemaron̄ bar al ippān doon.”
“EM̧M̧AN,” Jose ekar ba.
Marius ekar en̄jake okmeenen itulowa. Eaar m̧ōņōņō bwe emaron̄ kar jipan̄ Jose im baam̧le eo an. Im ekar m̧ōņōņō bwe emaron̄ bar kwaļo̧k gospel in.
Kōmeļeļe ko jān Jamie Bauza