“Cameron ej Ripiano eo,” Eo Jera, Māe 2023, 40–41.
Cameron ej Ripiano eo
Cameron ekar jab jeļā kilen piano, ak ekar kōņaan jipan̄.
Bwebwenato in ekar bōk jikin ilo USA.
“N̄a nejin Anij,” Cameron ekar al ippān ajri ro jet ilo Būraimere. Cameron ekar pen an ron̄ļo̧kijeņ, bōtaab em̧m̧an ippān al. Im ejjab to renaaj al ilo būrookraam̧ eo an Būraimere. M̧ōttan juon allōn̄ bwe en iien!
Ke ekar jem̧ļo̧k iien al eo, Sister Jones ekar kōm̧m̧ane juon kōjjeļā. “Ripiano eo ad ilo Būraimere ej bojen em̧makūt. Jekōņaan bwe jet iaami en jipan̄ kōjan̄jan̄ piano n̄an būrookraam̧ eo an Būraimere. Ewōr ke iaami ej ekōņaan kōjan̄ juon ak ruo al?”
Cameron ekar kajutak pein. Ekar kōņaan jipan̄ kōn būrookraam̧ eo.
Sister Jones ekar je et ko etan ajri ro rekar kōņaan jipan̄. “Emma. Ben. Im Cameron! Ikar jaje ke kojeļā piano.” Eaar ettōn̄dikdik.
Cameron ejjan̄in kar bōk kūlaaj in piano m̧okta, akō em̧m̧an ippān make kōm̧m̧an al ilo piano eo ilo m̧ōn jibūn.
“Ejjab likkuun em̧m̧an jon̄an aō jeļā,” ekar ba. “Bōtaab ij ļomņak imaron̄e n̄e inaaj kōmālmel wōt!”
“Kom̧m̧ool kōn am̧ kōņaan jerbal,” Sister Jones ekar ba. Ekar leļo̧k n̄an kajjojo ajri ro ruo al n̄an kōjan̄i.
Cameron ekar tarjen jon̄an an m̧ōņōņō. Ekar to an kōnaan ekkatak, im kiiō ej pojen ekkatak!
“Koreitok in m̧ōņōņō! Ewōr men eo ekar waļo̧k ilo Būraimere?” Jinen ekar kajjitōk ke rekar dreļo̧n̄e wa eo ālkin jar.
Cameron ekar ettōn̄ im kwaļo̧k dōā in n̄iin. “Ij tōn piano n̄an būrookraam̧ eo an Būraimere!”
“Elikkuun em̧m̧an ippa bwe kokņaan jipan̄,” Jinen ekar ba. “Ak ejjab ļap jon̄an am̧ jeļā piano n̄an kōm̧m̧ane men eo.”
Cameron ekar kajim̧we an jijet. “Imaron̄ ekkatak. Inaaj buuļ ekkatak. Imaron̄ kōjerbal piano eo nejin bubu.”
“Innām, jej aikuj jinoe!” Jinen eaar ba.
Jinen ekar jipan̄e Cameron kappukot juon an rikaki in piano. Rikaki eo ekar kwaļo̧k n̄an e wāween ko repidodo n̄an kōjan̄ e “I Love to See the Temple” im “The Church of Jesus Christ.”
Cameron ekar kōmālmel ilo m̧ōn jibūn ikutkut in wōt an maron̄. Ekar kōmālmel e kajjojo ļain in al ko āliji im bar āliji. Ekar kōm̧m̧ane elōn̄ bōd ko, ak ekar wōnm̧aanļo̧k im kajjeon̄ im wōnm̧aanļo̧k wōt im kōjan̄jan̄. Āliktata ekar maron̄ kōjan̄ al ko jim̧ōr.
Ejjab to ekar iien n̄an būrokuraam̧ eo an Būraimere. “Ejet am̧ en̄jake?” Jinen eaar kajjitōk.
Cameron ekar atabo̧kwoj bok in piano eo an ņae ioon ubōn. “Ikūm̧kūm̧. Ak bar m̧ōņōņō.”
Ke ekar iien n̄an an piano, pā ko pein Cameron rekar wūdiddid jidik. Jemedwōj Ilan̄, jouj im jipan̄ eō, ekar jar ilo kōļmenļo̧kijeņ eo an. Ekar bōk kūtuwōn. Innem ekar piano n̄an jon̄an eo em̧m̧antata emaron̄ e. Ajri ro jet rekar al ilo an kōjan̄jan̄.
Ilo jem̧ļo̧kin al eo, ekar ettōn̄dikdik. Elimo.” Ekar jeļā bwe Jetōb Kwojarjar ekar jipan̄ e.
Kiiō ke em̧ōj an kōjan̄ juon al, Cameron ekar ļapļo̧k an peran. Ekar ijjinoik al eo kein karuo. Adiin pein rekar m̧akūtkūt ioon kii ko ejjeļo̧k oktak jān an kar ekkatak.
Al in ekar em̧m̧antata ippān Cameron. Ekar ļōmņak kōn naan ko ilo an kōjan̄ e. “Ij tōmak ilo Rilo̧mo̧o̧r, Jisōs Kraist. Inaaj kautiej Etan.” Cameron ekar kate n̄an ekkatak al ko n̄an būrookram̧ eo.
Bōlen kōjan̄ piano eo ej juon wāween kwaļo̧k naan in kam̧ool eo aō, Cameron ekar ļōmņak.
Ālkin būrookraam̧ eo, jinen ekar atabo̧kwij Cameron.
“Ejet?” ekar kajjitōk.
“Ikar ikūm̧kūm̧ jinoin, ak ekar limo!” Cameron ekar ba. Ekar kōņaan wōnm̧aanļo̧k wōt im kōmālmel im ekkatak elōn̄ļo̧k al ko.
Kōmeļeļe ko jān Adam Koford