“Gaoioiga o le Sau, Mulimuli Mai ia te A’u ,” Uo, Iulai 2023, 6–7.
Gaoioiga o le Sau, Mulimuli Mai ia te A’u
Mo afiafi faaleaiga po o le suesueina o tusitusiga paia—pe tau lava o se mea malie!
Mulimuli i le Taitai
O ata na tusia e Katy Dockrill
Mo le Galuega 1–5
Tala: Ina ua mavae le maliu o Iesu, sa valaauina Peteru e avea ma taitai o le Ekalesia a le Alii. E mafai ona e faitauina lenei tala i le itulau 46 po o le Galuega 2–3.
Pese: “Tu Mo Le Mea Tonu,” (Tusipese a Tamaiti, 81)
Gaoioiga: Filifili se tagata e toatasi e avea ma taitai. Tuu atu i le taitai e fai se faatinoga (e pei o le oso i luga i le vae e tasi po o le taavilivili). O isi e kopiina. Pe a suia e le taitai le faatinoga, e kopi e isi le faatinoga fou. Feauauai e avea ma taitai seia oo ina maua e tagata taitoatasi se avanoa.
Toe Mamā
Mo le Galuega 6–9
Tala: Sa taumafai se tagata e igoa ia Saulo e faaumatia le Ekalesia a Iesu Keriso. Ona ia salamo lea ma suia lona olaga. Sa avea o ia ma se faifeautalai ma aoaoina tagata e uiga ia Iesu Keriso. Na oo ina iloa o ia o Paulo. (Tagai Galuega 9:1–20.)
Pese: “Ua Ou Iloa o Soifua Lo’u Tama” (Tusipese a Tamaiti, 8)
Gaoioiga: Aumai sina palapala i ou lima. O le a sou lagona pe a palapala ou lima? O le isi, fufulu ou lima i se fasimoli ma le vai. O le fufuluina o o tatou lima e pei lava o le salamo. Ona o Iesu, ua mafai ai ona tatou salamo ma toe mamā pe a uma ona tatou agasala.
Lui o le Avea ma se Faifeautalai
Mo le Galuega 10–15
Tala: O Panapa ma Paulo o ni faifeautalai (tagai Galuega 13:2–4). Sa la aoaoina tagata e uiga i le Faaola. E aoao atu foi e faifeautalai o aso nei ia tagata e uiga ia te Ia.
Pese: “Tau Mai Tala ia Iesu” (Tusipese a Tamaiti, 36)
Gaoioiga: Filifili se luitau mai itulau 38–39 e fai faatasi, e pei o le auauna atu i se tuaoi. E faapefea ona avea oe ma se faifeautalai i le taimi nei?
O se Ata o Oe
Tala: Na aoao mai le Aposetolo o Paulo o i tatou uma o fanau a le Atua (tagai Galuega 17:28–29). E alofa le Tama Faalelagi i Ana fanau uma. Ua Ia tuuina mai ia i tatou taitoatasi ni meaalofa ma taleni eseese.
Pese: “O Au o se Atalii o le Atua” (Tusipese a Tamaiti, 2).
Gaoioiga: Tusi se ata o oe. I le pito i luga, tusi ai le “O Au o se Atalii o le Atua.” I tafatafa o le ata, tusi faamatalaga pe tusi ni ata o mea e te fiafia e fai. E mafai faapefea ona e faaaogaina au taleni e fesoasoani atu ai i isi?