O le Lototele mai le Agaga Paia.

Saunia e Mathias P., 13 tausaga, Victoria, Ausetalia

A o ou laitiiti, sa ta’u atu e fomai i o’u matua sa ou maua i le selective mutism. O se faaletonu o le popole lea e faigata ai ona tautala atu i isi. Sa na o tagata o lo’u aiga vavalalata e mafai ona ou talanoa atu i ai.

Sa ou lagonaina le popole i taimi uma, aemaise lava pe afai e talanoa mai se tasi ia te au. O le tatalo e le aunoa na ou maua ai se lagona lelei ma faatoafilemuina ai au. Sa ou vaaia foi se faufautua i le aoga mo se fesoasoani. Ae sa ou lagonaina e le’i iai se suiga i la’u faalogo. Sa toetoe lava a ou lagona le fiu, ae sa ou maua pea le faatuatua.

O lo’u aso fanau lona valu o le a oo mai. Sa luiina au e ou matua e faitau le Tusi a Mamona ma tatalo e fesoasoani mai ia te au e filifili pe papatiso. O po uma lava sa ou tatalo ai e fesili pe tatau ona ou papatiso. E masani lava ona ou maua le tali lava lea e tasi—o se lagona mafanafana, ma le toafimalie i lou loto. Sa ou iloa sa tau mai e le Agaga Paia ia te au o le papatisoga o le filifiliga sa’o lea.

Ina ua tuuina mai ia te au le meaalofa o le Agaga Paia ina ua uma lo’u papatisoga, sa ou faalogo i upu o le faamoemoe, alofa, ma le faamalosiauga. Sa ou iloa o le a faamafanafanaina au e le Agaga Paia ma tuuina mai ia te au le lototele.

Sa ou filifili e taumafai e talanoa i la’u uo mamae, o Charlie. Sa ou taumafai i le vaiaso atoa, ae sa matuai faigata lava. Ae i se tasi aso sa tuua na o i maua ma Charlie i le togalaau a le aoga. Sa ou faia se tatalo lemu i lou loto. Tama Faalelagi, faamolemole fesoasoani mai ia te au e fai atu se upu e tasi.

Ona tatala lea o lou gutu ma fai atu, “Malo Charlie!” Sa te’i o ia. Sa matuai o’u fiafia lava!

Ina ua mavae lena aso, sa faigofie atu ona faamaea nisi sini. E lei umi ae ou talanoa i tagata uma lava! Ou te faafetai na tuuina mai e le Agaga Paia ia te au le lototele e talanoa ai ia Charlie.