“O Le Kalapu O Le Faia o Mea ia Lelei Atu,” Uo, Iulai 2023, 20–21.
O Le Kalapu O Le Faia o Mea ia Lelei Atu
Sa iloa e Josie se auala e mafai ona ia mulimuli ai i le faataitaiga a Iesu Keriso.
O lenei tala sa tupu i le ISA.
Sa saofafai Josie ma lona tausoga o Ashlyn i lalo o se laau i fafo atu o lona fale.
“Maimau pe ana i ai se mea manaia e mafai ona ma faia e maua ai se tupe,” o le tala lea a Josie.
“Atonu e mafai ona matou maua ni tupe e ala i le faia o mea mo tagata,” o le tala lea a Ashlyn.
“Ae faapefea pe afai matou te faia o se kalapu?” Sa osooso fiafia Josie. “E pei o se kalapu e vaaia fagafao po o se kalapu e faasavali taifau.”
“E mafai ona tatou faia ituaiga mea uma,” o le tala lea a Ashlyn. “E manaomia lava e tagata le fesoasoani. Ma o le a latou totogiina i matou.”
Na sa’o lava Ashlyn. O aso uma lava e vaai ai Josie i tagata sa manaomia le fesoasoani.
Na faafuasei lava ona maua e Josie se isi manatu. Sa ia lagonaina le mafanafana i lona loto. Sa faamanatu atu ai ia te ia lona papatisoga i le tausaga ua te’a. Sa ia folafola atu o le a ia manatua pea Iesu ma mulimuli i Lana faataitaiga. Sa ia iloa se tasi o auala e mafai ona ia faia ai lena mea.
“Ae faapefea pe afai e i ai sa tatou kalapu e fesoasoani fua i tagata?” Sa fesili atu ai Josie. Na faatupulaia le malosi o le lagona mafanafana.
Sa faalapopoa mai mata o Ashlyn. “Manaia tele lena,” o lana tala lea. “E mafai ona tatou fesoasoani i tagata i le aoga ma le lotu—i soo se mea lava.”
“E mafai ona tatou ta’ua O Le Kalapu O Le Faia o Mea ia Lelei Atu!” Sa fai atu ai Josie. “Tatou amata taeao i le aoga.”
O le aso na sosoo ai i le malologa, sa taufetuli atu ai Ashlyn ma Josie i le faatausiusiuga o le malae taalo.
“O e vaai i se tasi e mafai ona tatou fesoasoani i ai?” Sa tu Ashlyn i ona tamatamaivae ma tilotilo agai atu i le ata o le nuanua.
“E lei oo i le taimi.” Sa saili e Josie ia pa manuki ma le suigi. Sa faasesee tamaiti ma faalue. Sa latou fiti polo ma taaalo ma ni maea osooso. Sa leai se tasi na foliga moni mai sa latou manaomia se fesoasoani. Sa foliga mai na tofu tagata uma ma se uo. Ona ia vaaia lea o se teineitiiti laitiiti na o ia lava i se maea osooso.
Sa uu mai e Josie le lima o Ashlyn. “Vaai atu iina!”
Sa maua e Josie ma Ashlyn ni maea ma savavali atu i le teineitiiti.
“Malo. O au o Josie.”
“Ma o a’u o Ashlyn. O ai lou igoa?”
Sa faate’ia le teineitiiti. “O au o Leslie.”
“E te fia taaalo faatasi ma maua?” Sa uu i luga e Josie se maea osooso.
Sa ataata Leslie. “Ioe!”
Sa aoao atu e Ashlyn ma Josie ia Leslie ni nai auala fou e oso ai i le maea. Ina ua tatagi le logo, sa la faatofa atu. Sa iai lagona lelei o Josie i totonu. Sa ia iloaina o le Agaga Paia.
Ina ua mavae lena, soo se taimi lava e vaai ai Josie ma Ashlyn ia Leslie i le auala savali, sa la faamalo atu ia te ia.
Sa vaavaai Josie ma Ashlyn mo nisi tagata e fesoasoani ai. O nisi taimi latou te fai atu ai ni mea lelei i tagata ma taumafai e faafiafia i latou. O isi taimi sa latou valaaulia ai tamaiti e taaalo ma laua.
I se tasi aso, sa ataata Josie i se tamaitiiti i fafo atu o le aoga. “Manaia lou mitiafu tainasoa,” sa ia fai atu ai.
Sa ataata le tamaitiiti ma tilotilo ifo i lalo i lona mitiafu. “Faafetai.”
A o nofo i lalo Josie, sa ia iloa ai e lei mafaufau lava o ia e fai lena mea mo le kalapu! Faatoa uma lava ona ia faia.
Sa mafaufau Josie i uo uma sa ia faia talu ona la amataina ma Ashlyn le la kalapu. Sa matuai fiafia lava Josie e fesoasoani i tagata. Na mafua ai ona ia manao e faia ni mea e sili atu ona lelei mo isi. O Le Kalapu O Le Faia o Mea ia Lelei Atu na faaleleia atili ai o ia. Ma sa manaia lena lagona.
Ata na tusia e Tania Rex