“O Le Tamā Ofoofogia o Magnolia,” Uo, Iulai 2023, 40–41.
Tamā Ofoofogia a Magnolia
“Fai mai nisi tamaiti e le o i matou o se aiga lelei aua o Tamā e le o se tagata o la tatou ekalesia.”
O lenei tala sa tupu i le ISA.
“Magnolia! Lily!” Na valaau mai ai Tamā. “Taimi mo tusitusiga paia ma le tatalo!”
Sa tilotilo ifo Magnolia i luga o le fola i autafa o le latou taifau, o Raindrop. Sa pulupulu Lily i lona palanikeke e sili ona fiafia i ai.
Sa manaia le taimi o tusitusiga paia ma le aiga. O nisi taimi latou te faatinoina faatasi ai tala o tusitusiga paia. Sa fesoasoani ia Magnolia e vaai faalemafaufau ai i tala. Ma le isi, sa fesoasoani lava Raindrop i taimi uma pe a i ai ni manu i tala!
Sa susue e Tamā ana tusitusiga paia ma faitau se fuaiupu. Ona ia pasia lea o le Tusi Paia lapoa ma le mamafa ia Magnolia. Sa latou auaua’i uma i le faitauina.
“Ma ia outou agalelei o le tasi i le isi,” na faitau ai Magnolia.*
Sa faauu o ia. Sa le agalelei tagata ia te ia i taimi uma i le lotu.
“Tina, Tama, e mafai ona ou talanoa ia te oulua?” sa ia fesili atu ai.
“Ae a, e mafai,” o le tala lea a Tina. “O le a?”
“I le Peraimeri ananafi, na tau mai ai e nisi tamaiti ia te au e le o i tatou o se aiga lelei aua o Tamā e le o se tagata o la tatou ekalesia.”
O le tamā o Magnolia sa auai i se isi lotu. Sa alu o ia i le sauniga faamanatuga ma lo latou aiga i Aso Sa. Sa ia tuuina atu ni lauga e uiga i le Agaga Paia i papatisoga o Lili ma Magnolia. Sa fai mai tagata uma sa ia faia se galuega maoae. O ia o se tama ofoofogia.
“O mea na latou fai mai na ou fia tagi ai.” Sa masusu Magnolia. “Aisea e agaleaga ai tagata?”
Sa fetilofa’i Tama ma Tina i le tasi ma le isi.
“Ou te fiafia na e tau mai ia i ma’ua le mea na tupu,” o le tala lea a Tama. “Ma te alolofa tele ma Tina i le tasi ma le isi. Ma e taua tele lo tatou aiga ia i ma’ua.”
Sa lue atu le ulu o Tina. “Ma e taua foi lo tatou aiga i le Tama Faalelagi. “E alofa le Atua i Ana fanau uma.”
Sa faapupuu atu Raindrop ia Magnolia. Sa ia valuina ona taliga.
“E silafia i tatou e le Tama Faalelagi, ma Na te silafia tatou te alolofa i le tasi ma le isi,” o le tala lea a Tama. “E leai se aiga e atoatoa, ae e mafai ona tatou taumafai pea i le mea sili tatou te mafaia.”
“Ae o loo tiga pea pe a fai mai e tagata ni tala le lelei e uiga i lo matou aiga,” o le tala lea a Magnolia. Na aoao i tatou e Iesu Keriso ina ia agalelei atu i tagata uma. O le fai atu o tala le lelei e foliga mai e le o le mulimuli lea ia Iesu.”
“E sa’o oe,” o le tala lea a Tama. “Atonu pe a e lagona le fia fai atu o se mea, e mafai ona e manatua ou lagona ina ua agaleaga atu isi ia te oe. Ona mafai lea ona e fai atu se tala agalelei nai lo lena.”
Sa manava umi o ia. “Ua lelei.” Sa fiafia o ia ona sa mafai ona ia talanoa atu ia Tina ma Tama.
“Taimi mo se sanuisi faaleaiga!” Sa toso mai e Tamā Lily ma Magnolia i se opo lapoa ma fusi mau i laua. Sa fusi e Tina i latou uma e toatolu. Sa tamoemoe faataamilo Raindrop ia i latou uma.
“E le mafai ona ou manava!” sa talasua atu ai Lily. Sa ata Magnolia.
“Ia faamanatu mai ia te a’u—o ai lea laa faitau?” O le fesili lea a Tamā. Sa ia faamamuluina lana fanau teine ma piki i luga ana tusitusiga paia.
“O lo’u taimi!” o le tala lea a Lily. “Ma o le taimi lea o Tamā mo le tatalo.”
Ina ua uma ona latou faitau, sa tootutuli tagata uma e tatalo. Sa lagona e Magnolia le toafilemu a o ia faalogologo atu ia Tamā o fai le tatalo. Sa ia iloa e alofa le Tama Faalelagi i lona aiga.
Ata na tusia e Constanza Basaluzzo