“O Le Faamamaina o le Togalaau,” Uo, Iulai 2023, 4–5.
O Le Faamamaina o le Togalaau
“O ai e mafai ona tatou valaaulia e fesoasoani mai ia i tatou?”
O lenei tala sa tupu i Egelani.
Sa ai e Iona lana u mulimuli o meaai ma ataata. Sa sili atu le manaia o le taumafataga o le afiafi pe a o mai faifeautalai.
“Matou te fia faasoa atu se savali ia te outou e uiga i le auauna atu,” o le tala lea a Sister Kearl. “Aisea e taua ai le auauna atu i isi?”
“Aua e fiafia ai Iesu!” o le tala lea a Elisa, le tuafafine laitiiti o Iona.
“E sa’o oe! E fiafia tele ai o Ia. Ma a tatou fesoasoani i isi, e faafiafiaina foi i tatou,” o le tala lea a Sister Christensen. “E te iloa se tasi o manaomia le fesoasoani?”
Sa mafaufau Iona mo se minute. “E le mafai ona ou mafaufau i se tagata, ae o la tatou togalaau i le aoga e mafai ona faaaoga sina fesoasoani.”
“Manaia le manatu,” o le tala lea a Tina.
Sa i ai i le aoga a Iona se togalaau e mafai ona latou faia ai gaoioiga i fafo. Ae sa leai se tasi na tausia le togalaau mo se taimi umi lava. Sa maualuluga le ola o le vao. Sa tele tama’i vao ninii.
“Matou te fiafia e fesoasoani ia te oe i lena mea!” o le tala lea a Sister Kearl. “O ai e mafai ona tatou valaaulia e fesoasoani e faamama faatasi ma i tatou?”
“O matou tausoga!” o le tala lea a Iakopo, le uso o Iona.
“Ma la tatou vasega Peraimeri,” o le tala lea a Iona.
O le aso na sosoo ai, na talanoa atu ai Tina i se tasi i le aoga ina ia maua mai se faatagana. Sa latou pikiina se aso e faamama ai le togalaau. Ona fesoasoani lea o Tina ia Iona ma ona tei e valaau o latou tausoga ma vasega o le Peraimeri.
I ni nai vaiaso mulimuli ane, sa feiloai ai Iona ma lona aiga i faifeautalai i le aoga. Sa i ai foi iina o latou tausoga ma uo mai le Peraimeri. Ua oo i le taimi e galulue ai!
Sa tui e Iona se pea totigilima lapopoa. “Vaai, Tina. E tetele o’u lima!”
Sa ata Tina. “E mafai ona e faaaogaina na lima tetele e fesoasoani ai e teu lenei togavao.”
Sa ia tuuina atu ia Iona ni kilipa sa foliga mai o se seleulu lapoa. Ona ia fesoasoani lea ia te ia e tipi ese lala ua pepe.
“E malie lenei mea,” o le tala lea a Iona.
A o teuteu e Iona, sa fesoasoani Elisa e eli faataamilo le togalaau. Sa fesoasoani Iakopo ia Tama e fau se fale manulele fou. Sa vele ese e isi ia vao ma ao mai fasilaau. Sa latou tuuina i totonu o ni ato palasitika lanumoana lapopoa. E oo lava i le uso laitiiti o Iona, o Ezra, na fesoasoani i le pikiina o maa.
E lei umi ae mama le togalaau. Sa faitauina e Iona ia taga sa latou faatumuina. “E 13 taga!” o lana tala lea. “Sa matou faamamaina le tele o lapisi.”
Na ataata Sister Christensen. “O lea la ua tatou manaomia maso lapopoa a tagata uma e fesoasoani ia i tatou e aveina atu mea nei i le taavale.”
Sa tofu Iona, Iakopo, ma Elisa ma se taga. Sa lagona e Iona le fiafia a o ia siiina le taga mulimuli i totonu o le taavale. O le fesoasoani i faifeautalai sa maua ai le fiafia. Sa manao foi o ia e avea ma se faifeautalai i se aso. Seia oo mai lena taimi, e tele auala e mafai ona ia auauna atu ai. Sa tau le mafai ona faatali o ia e mafaufau i le isi ana galuega faatino!
Ata na tusia e Samara Hardy