“Tala o le Papatisoga,” Uo, Iulai 2023, 30–31.
Tala o Papatisoga
“O se paionia o se tasi o le tagata muamua e faia se mea,” o le tala lea a Tina.
O lenei tala sa tupu i le ISA.
Sa faataamilo ma faamemelo atu Maria i lona ofu paepae i le faaata. O le ofu lava lea e tasi na ofuina e lona tina i lona papatisoga. Sa faaleleia e Tina o le Tina o le Tina Marluce ia fetaui ia Maria. O lea la ua mafai e Maria ona ofuina i lona lava papatisoga!
“E lalelei oe!” Sa uu e Tina le lima o Maria ma faataavili o ia.
Sa ata Maria. “E mafai ona ou ofuina i le aso atoa?”
“Sei o tatou sefeina le ofuina mo lou papatisoga ina ia tumau ai le manaia ma le mama, ua lelei?” Na fai atu ai Tina.
“Ua lelei.” O le a papatisoina Maria pe a atoa lona valu tausaga, ma sa ia saunia mo sina taimi. Sa alu o ia i le Peraimeri, faitau tusitusiga paia, ma e oo lava i le alu i papatisoga o ana uo. Ae o lona aso fanau sa foliga mai e mamao lava!
Sa feosofi i luga Maria ma Tina i luga o le sofa. “Tina, o le a lou matua ina ua e papatiso?”
“Sa 16 ou tausaga.”
“Oka! Aisea na e faatali umi ai?”
Sa fusi mau e Tina ia Maria. “Ona ou te lei iloa e uiga i le Ekalesia toefuataiina a Iesu Keriso seia oo i lena taimi. Ae sa amata ona ou alu i gaoioiga a le Ekalesia ma ni uo. Ma o le tele o lo’u aoaoina, o le tele foi lea o lo’u manao e papatiso!”
Aisea?” O le fesili lea a Maria.
“Ona sa ou manao ia maua sou aiga e faavavau.” Sa tusi atu Tina i le ata o le malumalu o loo tautau i luga a’e o i latou. “Sa ou aoaoina e i ai se aso e mafai ai ona faamauina a’u i lo’u aiga i se malumalu e faavavau. O le i ai o se aiga e faavavau o la’u miti lea. Ma o le papatisoga o le laasaga muamua lea! O lea la ua taunuu la’u miti.”
Sa ataata Maria. “E i ai lou Tama, Mallory, ma le pepe o Maeva! Ma a’u foi, ioe.”
Ioe, e sao lelei. Ma Tinamatua Angela.”
“Na papatiso Tinamatua faatasi ma oe?”
“Sa faatalitali o ia mo ni nai tausaga. Ae soo se taimi lava matou te malaga ai e latalata i le malumalu, matou te fiafia lava e tutu ma tilotilo i ai.”
Sa mafaufau Maria ia Tina ma Tinamatua o tilotilo faatasi i malumalu. Ae faapefea Tama? E fia ona tausaga ina ua papatiso o ia?”
“Sa 11 o ia.”
“Ma sa nofo o ia i Pasila i lena taimi?”
“E sa’o oe,” o le tala lea a Tina. “O loo i ai tagata i le lalolagi atoa o loo aoao e uiga ia Iesu ma le papatisoga. O le toatele o i latou o ni paionia.”
“Paionia?”
“O se paionia o se tagata muamua e faia se mea,” na faamalamalama atu ai e Tina.
Sa mafaufau Maria i lena mea. “E pei o oe le tagata muamua i lou aiga na papatiso?”
Sa lue atu le ulu o Tina ma ataata.
O le taimi lava lena, na savali atu ai Tama i totonu o le potu ma oso i luga o le sofa.
“Tama, o oe o se paionia mo lou aiga?”
“Se mea faapena. Ina ua uma ona ou papatiso, sa ou iloa ai o Tinamatua Rosimere ua avea nei ma se tagata o le matou ekalesia! Ae e lei alu o ia i le tele o tausaga.”
“E mo’i? O le a le mea na tupu?”
“Sa amata ona ou alu i le lotu. Ona amata lea ona o ou tuagane, ona sosoo ai foi lea ma Tinamatua Rosimere. E oo lava i le Tina o le Tina o le Tina Marluce na auai!”
Na vaai faalemafaufau Maria o alu tama i le lotu na o ia lava, ona ia aumaia lea o le toatele o lona aiga faatasi ma ia.
“Oka,” o le tala lea a Maria. “Ou te fiafia e faalogo i au tala. Na latou faia ia sili atu ai ona ou fiafia e papatiso.”
“Faafetai mo le fai mai o nei fesili uma, Maria,” o le tala lea a Tama. “E mafai la ona matou fesili atu ia te oe?”
Sa lue atu le ulu o Maria. O le a sa latou tala a fai atu ai?
Aisea e te manao ai e papatiso?”
Sa mafaufau Maria i mea sa ia aoaoina mai tusitusiga paia ma ona lagona i le lotu. “Ona ou te fia mulimuli ia Iesu ma faatasi ma lou aiga e faavavau.”
Sa ataata uma Tina ma Tama, ma sa fusi e Maria ona matua. “Ua tau le mafai ona ou faatali!”
Ata na tusia e Tammie Lyon