Saunoaga a Peniamina e uiga i Talafaasolopito o Aiga

O Peniamina e sau mai Buenos Aires, Atenitina. Sa matou fesili atu ia te ia ni fesili e uiga i talafaasolopito o aiga.

Na faapefea ona e amata faia talafaasolopito o aiga?

Sa amata ona ou faia le talafaasolopito o aiga faatasi ma lo’u tama. Sa ma faia faatasi i Aso Sa uma. Sa fesoasoani lo’u tama ia te au e aoao pe faapefea ona faaaoga le FamilySearch. Sa tatau ona ou faataitai ma faataitai. O lea la ua ou faia talafaasolopito o aiga ma lo’u tama po o lo’u tausoga o Jasmina.

O a ni mea e sili ona e fiafia ai e uiga i talafaasolopito o aiga?

Ou te fiafia e saili ni tagata fou e faaopoopo i la’u gafa o le aiga. Muamua, ou te maua faamaumauga tuai. Ona ou vaavaai lea mo igoa o o’u tuaa. Ou te maua o latou aso fanau ma le mea na latou fananau mai ai. Ou te maua isi nofoaga sa latou nonofo ai foi.

O a ni mea e te iloa e uiga i ou tuaa?

Sa ou aoaoina e i ai ou tuaa mai Italia ma Siamani. O se tasi o o’u tuaa mai Italia e tutusa lona igoa ma lo’u tuagane! O le igoa o lou tuagane o “Santiago,” o le “Giacomo” i le faa-Italia. Sa ou aoaoina foi o lo matou faaiu sa masani ona ese le sipelaga.

E faapefea ona e fesoasoani i isi tagata e fai talafaasolopito o aiga?

Ou te fesoasoani i lo’u tinamatua e faaaoga le FamilySearch. Sa ou aoaoina o ia i le ala e faaopoopo ai manatuaga. Sa ou fesoasoani foi ia te ia e faaopoopo tagata o loo misi i lona gafa o le aiga. O nisi o ona aiga sa tele naua igoa! Sa umi se taimi e tuu uma ai i totonu. Ae sa ou matua fiafia lava ona sa mafai ona ou fesoasoani ia te ia e aoao e faaaoga le FamilySearch, e pei lava ona fesoasoani lo’u tama ia te a’u.

O le a le isi poloketi talafaasolopito o aiga e te manao e fai?

Ou te manao e fai ni vitio mo a’u uo ma aiga e fesoasoani ai ia i latou e aoao pe faapefea ona faaaoga le FamilySearch. Ina ua ou amata, sa tatau ona ou aoaoina ni mea se tele. Ou te manao e aoao isi tagata ina ia mafai ona latou faia le mea lava lea e tasi.

Ata na tusia e Laura Zarrin