“Olo o le Faatuatua,” Uo, Iulai 2023, 10–11.
Olo o le Faatuatua
Sa manao Dashanel i lona faatuatua ia Keriso ina ia umi ma malosi.
O lenei tala sa tupu i Jamaica.
Sa fesoasoani Dashanel i lona tuagane matua e aveese le falaoa pinati mai le ogaumu. Sa manaia tele le manogi!
Ona ia faalogoina lea o se tu’itu’i i le faitotoa. “Ua i ai iinei faifeautalai!” na valaau atu ai lona uso.
Sa tamoe atu Dashanel i le faitotoa. Sa fiafia o ia pe a o mai faifeautalai. Sa ia maua i taimi uma se lagona lelei ina ua la asiasi atu. O nisi taimi latou te aumaia ai ni taaloga mo ia ma nai ona tei e taaalo ai.
“Sa toe fai e Tyrell le falaoa pinati!” Na fai atu ai Dashanel. Sa fiafia lona tuagane e fai ni meaai mo faifeautalai.
“E le mafai ona ou faatali e tofo,” o le tala lea a Elder Colas. Sa la o mai ma Elder Yusaki i totonu ma saofafai i lalo i le fola. Sa saofafai faafesagai ma i latou ia Dashanel, lona tuagane ma lona uso, ma Tina.
“O le a se mea o le a tatou faia mo le lesona i le aso?” O le fesili lea a Dashanel.
Sa aumai i fafo e Elder Yusaki se faaputuga ipu. “O le a tatou fausia se olo o le faatuatua. O nei ipu taitasi e faatusa i se mea e mafai ona tatou faia e fausia ai lo tatou faatuatua ia Iesu Keriso.”
Sa amata ona faaputu e Elder Yusaki ia ipu e pei o se olo. Na vaai Dashanel o ipu e i ai upu e pei o le “tatalo,” “suesueina o tusitusiga paia,” ma le “ekalesia” na tusia ai.
“O mea uma nei ua e talosagaina i matou e fai o se aiga,” o lana tala lea.
“E sa’o lena,” na fai atu ai Sister Colas. “Pe a e faia nei mea, ua e fausia lou faatuatua ia Iesu Keriso.”
Sa feauauai Dashanel ma ona tei i le fauina o o latou lava olo i ipu a o latou faalogologo i le lesona.
Ina ua tuumuli faifeautalai, sa mafaufau Dashanel i mea sa la aoaoina atu. Sa manao o ia ia umi ma malosi lona faatuatua ia Keriso, e pei lava o le olo sa ia fausia.
A o mavae atu masina, sa aoao atili e Dashanel le talalelei mai faifeautalai. Sa amata ona latou o ma lona aiga i le lotu. Sa ia vaai faalemafaufau i lona olo o le faatuatua o tuputupu ae maualuga ma umi atu.
I se tasi aso ina ua tuumuli faifeautalai, sa talanoa atu Dashanel ia Tina. “E mafai ona ou papatiso?” na ia fesili ai.
“Ua e mautinoa ua e saunia?” o le fesili lea a Tina.
“Ioe,” o le tala lea a Dashanel. “Ou te fia mulimuli ia Iesu.”
“Ua lelei la,” na fai atu ai Tina. “Afai e te manao ai, e mafai ona e papatiso.”
Sa filifili foi le uso ma le tuagane o Dashanel e papatiso. Na fai mai Tina na te lei lagonaina le saunia e papatiso.
I le aso o lo latou papatisoga, sa laei ai Dashanel ma ona tei i ofu papae. Sa latou faatalitali ma le onosai ina ia papatisoina.
Ina ua oo i le taimi o Dashanel, sa fesoasoani Elder Yusaki ia te ia i totonu o le vai. Ona ia faia lea o le tatalo puupuu o le papatisoga ma tuu ifo o ia i lalo o le vai. Ina ua toe ea mai i luga Dashanel, sa le mafai ona taofi lona ataata! Sa ou lagonaina le fiafia ma le mama. Sa lei manao lava o ia e faagalo lenei lagona.
Sa faia pea e Dashanel ni mea e fausia ai lona faatuatua ia Iesu Keriso. Sa ia faitauina faatasi ma lona aiga ia tusitusiga paia. Sa tatalo o ia i le Tama Faalelagi. Sa ia faia ni mea agalelei mo isi. Ma sa ia manatuaina ona lagona ina ua papatisoina o ia. Sa manao o ia ia maua foi e Tina lena lagona.
“Tina, aisea e te le papatiso ai?” Sa fesili Dashanel i se tasi aso.
Sa filemu Tina mo se minute. “O oe o se faataitaiga lelei mo au. O lea la ua manaomia ona ou faia se faataitaiga mo oe,” o lana tala lea. “Ou te manao foi ia ou papatiso.”
I le aso o le papatisoga o Tina, sa matuai fiafia lava Dashanel. Ina ua sau Tina mai le vai, sa ataata tagata uma. Ua mafai nei e le aiga atoa o Dashanel ona fausia faatasi o latou olo o le faatuatua.
Ata na tusia e Alyssa Tallent