“Fakatupulekina ʻo e Fakaʻapaʻapá,” Ko e Kaumeʻá, Sepitema 2023, 4–5.
Fakatupulekina ʻo e Fakaʻapaʻapá
Naʻe pehē ange ʻe Noa, “ʻOua te ke lea ʻaki ia, kātaki.”
Naʻe hoko ʻa e talanoa ko ʻení ʻi ʻAositelēlia.
Naʻe tokoni ʻa Noa ki hono tuofefine ko Keleá ke tautau ha kafu ʻi he ʻū seá.
Naʻá ne fehuʻi ange, “ʻOku totonu nai ke ta tautau ʻeni heni?” Naʻá ne pukepuke hake ʻa e kafu lanu pulū ʻoku ʻi ai ʻa e fanga tofuaʻá.
“ʻIo! Pea te ta lava ʻo fakaʻaongaʻi ʻeni ko e matapaá.” Naʻe tuhu ʻa Kelea ki he tafaʻaki ʻe taha ʻo e kolotaú.
“Kuo taimi ki he akó!” Ko e ui atu ia ʻa e fineʻeikí.
Naʻe sio ʻa Noa ki hono tuofefiné. “Mahalo ʻe lava ke fakaʻosi ʻeta kolotaú ʻi he tuku ʻa e akó?”
Naʻe talaange ʻe Kelea, “Pea te ta lava ʻo kole kia Mami mo e Teti pe te tau lava ʻo vaʻinga ʻi loto ai.”
Naʻe malimali ʻa Noa mo kamo pē. Naʻá ne fiefia ʻi heʻene lava ʻo langa ha ngaahi kolotau mo vaʻinga mo hono tuofefine lahí!
ʻI he mālōlō siʻi ʻa e ʻaho ko iá, naʻe vaʻinga ʻa Noa mo hano ongo kaungāmeʻa ko Tai mo Maʻake.
Naʻe pehē ange ʻe Tai, “Tau kiʻi hopohopo veʻe taha.”
Naʻe talaange ʻe Noa, “ʻOku sai.” “Tau sio angē pe ko hai ʻe lava ʻo hopohopo fuoloa tahá!”
Naʻe kamata ke hopohopo ʻa e tamaikí. Naʻe kata ʻa Noa ʻi he taimi naʻá ne tuiʻi ai ʻa Maʻaké.
ʻI he taimi pē ko iá, naʻe lue mai ʻa Kelea mo ha tamaiki fefine mei heʻene kalasí.
Naʻe taʻataʻalo ange ʻa Kelea mo pehē ange, “Mālō e lelei.”
“ʻOiauē. ʻOku haʻu e tamaiki fefiné! ʻOku ʻikai ke tau fie vaʻinga mo kinautolu,” ko Tai ange ia. Naʻá ne ui leva ʻa Kelea mo hono ngaahi kaungāmeʻá ʻaki ha hingoa taʻeʻofa.
Naʻe ʻikai saiʻia ʻa Noa ʻi he ongo naʻá ne maʻu mei he ngaahi leá. Naʻe ʻikai sai ke ui ʻaki ʻa e kakaí ha ngaahi hingoa taʻeʻofa.
Naʻá ne siofi e tukunoaʻi ʻe Kelea mo hono ngaahi kaungāmeʻá ʻa Tai pea nau mavahé.
Naʻe fakakaukau ʻa Noa ʻoku totonu ke ne taukaveʻi ʻa Kelea, neongo kapau naʻe ʻikai ke ne fuʻu fiemaʻu ia. Ko hono tuofefiné ia, pea naʻá ne ʻofa ai.
Naʻe mānava loloa ʻa Noa. Naʻá ne talaange kia Tai, “ʻEi, kātaki, ʻoua te ke lea ʻaki iá. ʻOku ʻikai ke ne saiʻia ʻi hoʻo lea ʻaki iá. Pea ʻoku pehē pē mo au.”
“Sai. Sai,” ko e lea ange ia ʻa Tai mo ʻene fakamahikí.
Naʻe māpuhoi ʻa Noa. Naʻá ne ongoʻi sai ange he taimí ni.
ʻI he pō ko iá, naʻe vaʻinga ʻa Noa mo Kelea ʻi hona kolotaú pea mo Mami mo Teti.
“Naʻe fēfē ʻa e akó he ʻahó ni?” Ko e fehuʻi ange ia ʻa Teti ʻi heʻene tuku ha kaati ki he fokotuʻunga kātí.
Naʻe pehē ange ʻe Noa, “ʻI he ʻahó ni lolotonga ʻa e mālōlō siʻí, naʻe ui ʻe Tai ʻa Kelea ʻaki ha hingoa taʻeʻofa. Naʻá ku talaange ki ai ke tuku.”
Naʻe sio hake ʻa Kelea mei heʻene ʻū kātí. Naʻá ne fehuʻi ange, “Naʻá ke fai ia?”
Naʻe kamokamo ʻa Noa. “ʻIo. Naʻá ku ʻiloʻi naʻe ʻikai ke angaʻofa pe moʻoni ʻa e meʻa naʻá ne lea ʻakí.”
Naʻe malimali ʻa Mami, Teti, mo Kelea.
Naʻe pehē ange ʻe Kelea, “Mālō.”
Naʻe pehē ange ʻe Mami, “ʻOku ou fiefia ʻi hoʻo fakahaaʻi hoʻo fakaʻapaʻapa ki ho tuofefiné.”
Naʻe talaange ʻe Teti, “ʻIo, ko ha ngāue loto-toʻa ʻaupito ia.” “ʻOku mahuʻinga ke fakahaaʻi e fefakaʻapaʻapaʻakí. Tatau ai pē kapau ʻoku fiemaʻu ke tau fakatonutonuʻi hotau ngaahi kaungāmeʻá.”
Naʻe malimali ange ʻa Noa. Naʻá ne ongoʻi lelei ʻi heʻene ʻiloʻi kuó ne fai ʻa e meʻa totonú.
Ngaahi tā fakatātā ʻa Violet Lemay